នៅថ្ងៃចន្ទ ទី២ មីនា នេះ ជាថ្ងៃទីបីនៃសង្គ្រាមនៅមជ្ឈិមបូព៌ា សង្គ្រាមអាមេរិក-អ៊ីស្រាអែល វាយប្រហារអ៊ីរ៉ង់ ស្នូរផ្ទុះបានលាន់ឮសាជាថ្មីនៅតាមបណ្តាទីក្រុងនៃក្រុមប្រទេសអារ៉ាប់ក្នុងតំបន់ឈូងសមុទ្រ និងប្រទេសអ៊ីស្រាអែល គឺជាការវាយប្រហាររបស់អ៊ីរ៉ង់ ដែលបន្តបាញ់មីស៊ីល និងដ្រូន ដើម្បីសងសឹកចំពោះការវាយប្រហារតាមផ្លូវអាកាសរួមគ្នារវាងអ៊ីស្រាអែល និងសហរដ្ឋអាមេរិក ដែលបានសម្លាប់មេដឹកនាំកំពូលរបស់ខ្លួន។
បណ្ដាញសារព័ត៌មាន Al Jazeera ចុះផ្សាយសំឡេងផ្ទុះខ្លាំងៗនៅក្នុងប្រទេសគុយវ៉ែត បារ៉ែន នៅទីក្រុងដូហា នៃប្រទេសកាតារ និងនៅទីក្រុង Abu Dhabi នៃប្រទេសអេមីរ៉ាតអារ៉ាប់រួម ដែលសុទ្ធតែជាប្រទេសអារ៉ាប់ មានមូលដ្ឋានទ័ពអាមេរិក។
បើតាមកងទ័ពអ៊ីស្រាអែល អ៊ីរ៉ង់បានបន្តបាញ់មីស៊ីលបន្ថែមទៀតមកលើអ៊ីស្រាអែល និងបានណែនាំឱ្យប្រជាជនរត់ទៅជ្រកកោនតាមកន្លែងមានសុវត្ថិភាពដែលរដ្ឋាភិបាលបានរៀបចំ។ ចូលដល់សង្គ្រាមថ្ងៃទី៣ អ៊ីស្រាអែល និងអាមេរិក កំពុងបន្តការវាយប្រហារតាមផ្លូវអាកាសរបស់ខ្លួនលើប្រទេសអ៊ីរ៉ង់ យ៉ាងខ្លាំង។
ការវាយប្រហាររួមគ្នារបស់សហរដ្ឋអាមេរិក និងអ៊ីស្រាអែល ទៅលើប្រទេសអ៊ីរ៉ង់ បានបង្កសំឡេងផ្ទុះជាច្រើនបានបន្លឺឡើងយ៉ាងកក្រើកក្នុងទីក្រុងតេហេរ៉ង់ ខណៈយោធាអ៊ីស្រាអែល បានប្រកាសថា ខ្លួនកំពុងវាយប្រហារកម្ទេចគោលដៅភេរវករចំកណ្តាល «បេះដូង» នៃរដ្ឋធានីតេហេរ៉ង់។
កងទ័ពអាកាសអ៊ីស្រាអែល បានបើកប្រតិបត្តិការទ្រង់ទ្រាយធំដើម្បីដណ្តើមប្រៀបលើដែនអាកាស និងត្រួសត្រាយផ្លូវវាយលុកចូលទីក្រុងតេហេរ៉ង់ ប៉ុន្តែការវាយសងសឹករបស់អ៊ីរ៉ង់ ទៅលើអ៊ីស្រាអែល កាន់តែមានសន្ទុះយ៉ាងខ្លាំង។
កងឆ្មាំបដិវត្តន៍អ៊ីរ៉ង់ ប្រកាសនៅថ្ងៃចន្ទនេះថា កងកម្លាំងរបស់ខ្លួនបានវាយប្រហារទៅលើគោលដៅជាច្រើនក្នុងប្រទេសអ៊ីស្រាអែល ដែលក្នុងនោះ ការិយាល័យនាយករដ្ឋមន្ត្រីអ៊ីស្រាអែល Benjamin Netanyahu នៅទីក្រុង Tel Aviv ក៏បានរងការវាយប្រហារដែរ។ ក្រៅពីទីក្រុង Tel Aviv ទីក្រុង Haifa និងទីក្រុង Jerusalem ក៏រងការវាយប្រហារផងដែរដោយមីស៊ីល និងដ្រូនរបស់អ៊ីរ៉ង់។ នេះបើតាមទីភ្នាក់ងារសារព័ត៌មាន IRNA នៃប្រទេសអ៊ីរ៉ង់។
សេចក្ដីថ្លែងការណ៍របស់កងឆ្មាំបដិវត្តន៍អ៊ីរ៉ង់ បានហៅនាយករដ្ឋមន្ត្រី Netanyahu ថាជាឧក្រិដ្ឋជនសង្គ្រាមនៃរបប Zionism។
ស្របពេលនេះ បញ្ជាការដ្ឋានស្រុកមួយនៃប្រទេសអ៊ីស្រាអែល ក៏បានប្រកាសកោះហៅកងទ័ពបម្រុងប្រមាណ ២ម៉ឺននាក់ជាបន្ទាន់ ដើម្បីចុះជួយសង្គ្រោះជនស៊ីវិលអ៊ីស្រាអែល ដែលរងគ្រោះដោយសារការបាញ់ស្រោចមីស៊ីលសងសឹកពីសំណាក់ប្រទេសអ៊ីរ៉ង់។
អ្នកនាំពាក្យយោធាអ៊ីស្រាអែល ឧត្ដមសេនីយ៍ត្រី ហ្វី ដេហ្វ្រីន បានប្រកាសតាមកញ្ចក់ទូរទស្សន៍កាលពីថ្ងៃអាទិត្យ ទី១ មីនា ថា ក្នុងប្រតិបត្តិការនេះ អ៊ីស្រាអែលបានកម្ទេចឃ្លាំងស្តុកមីស៊ីលរបស់អ៊ីរ៉ង់ អស់ប្រមាណពាក់កណ្តាល និងបានទប់ស្កាត់ការផលិតមីស៊ីលថ្មីៗយ៉ាងហោចណាស់ ១៥០០គ្រាប់បន្ថែមទៀត។
ឧត្ដមសេនីយ៍ត្រី ហ្វី ដេហ្វ្រីន បានសង្កត់ធ្ងន់ថា កន្លងមក រដ្ឋាភិបាលតេហេរ៉ង់ បានផលិតមីស៊ីលបាញ់ពីដីទៅដីរាប់សិបគ្រាប់ក្នុងមួយខែៗ។
តាមទីភ្នាក់ងារព័ត៌មានអ៊ីរ៉ង់ បានឱ្យដឹងថា អតីតប្រធានាធិបតីអ៊ីរ៉ង់ លោក ម៉ាមូដ អាម៉ាឌីនេហ្សាដ ដែលធ្លាប់កាន់អំណាចពីឆ្នាំ២០០៥ ដល់ឆ្នាំ២០១៣ ត្រូវបានសម្លាប់នៅក្នុងការវាយប្រហារតាមអាកាសរួមគ្នារវាងសហរដ្ឋអាមេរិក និងអ៊ីស្រាអែល កាលពីអាទិត្យ ទី១ មីនា។
យោងតាមប្រភពដដែល ការវាយប្រហារដ៏រន្ធត់នេះ បានកំណត់គោលដៅចំភូមិគ្រឹះរបស់លោកផ្ទាល់តែម្តង ដែលស្ថិតក្នុងសង្កាត់ Narmak ភាគឦសានរដ្ឋធានីតេហេរ៉ង់ ដោយបានសម្លាប់រូបលោក និងអង្គរក្សការពារផ្ទាល់ជាច្រើននាក់ផ្សេងទៀត។
ប្រធានាធិបតីអាមេរិក លោក ដូណាល់ ត្រាំ បានព្យាករថា ប្រតិបត្តិការយោធាប្រឆាំងនឹងអ៊ីរ៉ង់ អាចនឹងប្រើពេល ៤សប្ដាហ៍ បើទោះជាការវាយប្រហាររបស់សហរដ្ឋអាមេរិក និងអ៊ីស្រាអែល បានសម្លាប់មេដឹកនាំកំពូលអ៊ីរ៉ង់ លោក Ali Khamenei ក៏ដោយ។
លោក ត្រាំ បានព្យាករដូចនេះនៅក្នុងបទសម្ភាសន៍ជាមួយសារព័ត៌មានអង់គ្លេស Daily Mail។ ក្នុងបទសម្ភាសន៍នេះ លោក ត្រាំ បានលើកឡើងថា «វាជាដំណើរការមានរយៈពេល ៤សប្ដាហ៍។ យើងគិតថាវានឹងមានរយៈពេល ៤សប្ដាហ៍។»
តាមការវិភាគរបស់លោកប្រធានាធិបតីអាមេរិក អ៊ីរ៉ង់ជាប្រទេសធំមួយ ដូចនេះនឹងចំណាយពេល ៤សប្ដាហ៍ ឬអាចតិចជាងនេះ។
ចំពោះមរណភាពរបស់លោក Ayatollah Ali Khamenei ជាកំពូលជនផ្ដាច់ការនៅប្រទេសអ៊ីរ៉ង់ វ័យ ៨៧ឆ្នាំ ប្រធានាធិបតីរុស្ស៊ី លោក វ្ល៉ាឌីមៀ ពូទីន កំពូលជនផ្ដាច់ការដែលជាអ្នកបញ្ឆេះសង្គ្រាមឈ្លានពានប្រទេសអ៊ុយក្រែន បានផ្ញើសាររំលែកទុក្ខទៅកាន់ប្រធានាធិបតីអ៊ីរ៉ង់។
លោក ពូទីន ចាត់ទុកថាការសម្លាប់លោក Khamenei ជាទង្វើបំពានលើក្រមសីលធម៌ និងច្បាប់អន្តរជាតិ។
ប្រព័ន្ធផ្សព្វផ្សាយរដ្ឋអ៊ីរ៉ង់ ជាច្រើន បានទទួលស្គាល់ថា លោក Ayatollah Ali Khamenei ពិតជាត្រូវបានសម្លាប់នៅក្នុងការវាយប្រហារតាមផ្លូវអាកាសរបស់សហរដ្ឋអាមេរិក និងអ៊ីស្រាអែល កាលពីថ្ងៃសៅរ៍ ទី២៨ កុម្ភៈ។
លោក ដូណាល់ ត្រាំ បានប្រកាសថា ទោះជាការមេដឹកនាំកំពូលអ៊ីរ៉ង់ លោក Ayatollah Ali Khamenei ស្លាប់ក៏ដោយ តែការវាយប្រហារតាមផ្លូវអាកាសរួមគ្នាធ្វើឡើងដោយសហរដ្ឋអាមេរិក និងអ៊ីស្រាអែល នៅតែបន្តរហូតរបបសាធារណរដ្ឋឥស្លាមអ៊ីរ៉ង់ ត្រូវបានផ្ដួលរំលំ៕
© 2026, ឌឹ ខេមបូឌា ដេលី. All rights reserved.