បុគ្គលិកនៃវិទ្យាស្ថានពហុបច្ចេកទេសភូមិភាគបាត់ដំបង ស្នើសុំឱ្យរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ ដកតំណែងលោក ឈឹម ធឿន ដោយសារការប្រព្រឹត្តអំពើពុករលួយ ក្រោមកម្មវិធីគោលនយោបាយអភិវឌ្ឍន៍ជំនាញបច្ចេកទេស និងវិជ្ជាជីវៈ ឬហៅកាត់ថា C1 ពិសេសក្នុងទំហំទឹកប្រាក់ជាង ៤លានដុល្លារអាមេរិក។
បុគ្គលិក មន្ត្រីរាជការ និងគ្រូបង្រៀននៃវិទ្យាស្ថានពហុបច្ចេកទេសភូមិភាគតេជោសែនបាត់ដំបង បានប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះនៅថ្ងៃទី១០ មីនា នេះថា នាយកវិទ្យាស្ថានពហុបច្ចេកទេសភូមិភាគតេជោសែនបាត់ដំបង លោក ឈឹម ធឿន បានប្រព្រឹត្តអំពើពុករលួយលើកម្មវិធីគោលនយោបាយអភិវឌ្ឍន៍ជំនាញបច្ចេកទេស និងវិជ្ជាជីវៈរបស់រដ្ឋាភិបាលយ៉ាងធ្ងន់ធ្ងរ។
ទឹកប្រាក់ជាង ៤លានដុល្លារនេះ ក្រសួងការងារ បានផ្តល់ឱ្យតាមសំណើរបស់វិទ្យាស្ថានដែលបានរាយការណ៍ថា ខ្លួនមានសិស្ស C1 ឬសិស្សក្នុងការអនុវត្តកម្មវិធីគោលនយោបាយរបស់រាជរដ្ឋាភិបាលសម្រាប់ការអភិវឌ្ឍជំនាញវិជ្ជាជីវៈ និងបច្ចេកទេសជាង ១ម៉ឺននាក់ (១០១២៥នាក់) ដែលបានចាប់ផ្តើមកាលពីអំឡុងខែតុលា ឆ្នាំ២០២៣ និងត្រូវបានបញ្ចប់កាលពីចុងឆ្នាំ២០២៥ កន្លងទៅនោះ។
ប្រភពដដែលរៀបរាប់ថា ក្នុងគោលការណ៍កម្មវិធីគោលនយោបាយអភិវឌ្ឍន៍ជំនាញបច្ចេកទេស និងវិជ្ជាជីវៈ ឬហៅថា C1 ក្រសួងបានតម្រូវឱ្យវិទ្យាស្ថានប្រើប្រាស់ថវិកានេះទ្រទ្រង់ការសិក្សារបស់សិស្សក្នុងម្នាក់ៗ ១លាន ៧សែនរៀល (១៧០០០០០រៀល)។
បើគិតតួលេខសិស្សដែលវិទ្យាស្ថានបានផ្តល់ឱ្យក្រសួង គឺមានចំនួន ១ម៉ឺន ១២៥នាក់ ដូច្នេះបើយកទៅគុណនឹងទឹកប្រាក់ ១លាន ៧សែនរៀលនោះ នឹងឃើញទឹកប្រាក់សរុបជាង ១៧ពាន់លានរៀល (១ ៧២១ ២៥០ ០០០លានរៀល) ដែលស្មើនឹងជាង ៤លានដុល្លារអាមេរិក (៤ ១៩៨ ១៧០ដុល្លារ)។
បុគ្គលិក មន្ត្រីរាជការ និងគ្រូបង្រៀនទាំងនេះ អះអាងថា ការពិតជាក់ស្តែង វិទ្យាស្ថានមិនមានសិស្សដល់ជាង ១ម៉ឺននាក់ដូចក្នុងរបាយការណ៍នោះទេ ព្រោះទិន្នន័យពិតប្រាកដ គឺមានសិស្សមិនលើសពី ២០ថ្នាក់ទេ ហើយក្នុងមួយថ្នាក់ៗ គឺមានសិស្សត្រឹមតែ ៥នាក់ទៅ ១០នាក់ប៉ុណ្ណោះ។ ចំណែកឯសិស្សដែលបានបោះបង់ការសិក្សា វិទ្យាស្ថាននៅតែរក្សាឈ្មោះទុកក្នុងប្រព័ន្ធដដែល ឬហៅថាបញ្ជីឈ្មោះខ្មោច ខណៈបញ្ជីវត្តមានសិស្សរៀនប្រចាំថ្ងៃដែលមានឈ្មោះចាប់ពី ២៥នាក់ទៅ ៣០នាក់ ក្នុងមួយថ្នាក់ៗនោះ គឺជាបញ្ជីឈ្មោះក្លែងក្លាយប៉ុណ្ណោះ។
ប្រភពដដែលទម្លាយថា វិធីសាស្ត្រដែលលោក ឈឹម ធឿន ប្រព្រឹត្តអំពើពុករលួយ រួមមានការក្លែងបន្លំវិក្កយបត្រ ការបំប៉ោងតួលេខសិស្ស ការធ្វើរបាយការណ៍ចំណាយក្លែងក្លាយ ការកាត់ប្រាក់ម៉ោងគ្រូបង្រៀនវគ្គ C1 មកនៅត្រឹម ២ដុល្លារក្នុងមួយម៉ោង បញ្ចូលសិស្ស ៣ថ្នាក់ទៅ ៤ថ្នាក់ មកឱ្យរៀនក្នុងថ្នាក់តែមួយដើម្បីកាត់បន្ថយលុយដែលត្រូវបង់ទៅឱ្យគ្រូបង្រៀនពី ៣នាក់ទៅ ៤នាក់ មកនៅត្រឹមតែម្នាក់ ជាដើម។
បុគ្គលិកទាំងនេះអះអាងថា ចាប់តាំងពីនាយករដ្ឋមន្ត្រីកម្ពុជា លោក ហ៊ុន ម៉ាណែត ប្រកាសឱ្យចាប់ផ្តើមអនុវត្តកម្មវិធីគោលនយោបាយអភិវឌ្ឍន៍ជំនាញបច្ចេកទេស និងវិជ្ជាជីវៈ ឬ C1 ពិសេសនេះមក លោក ឈឹម ធឿន ដែលជាប្រធានវិទ្យាស្ថានពហុបច្ចេកទេស ដែលមានប្រាក់ខែត្រឹមតែ ២លានរៀលក្នុង ១ខែនោះ ក៏ចាប់ផ្តើមមានទ្រព្យសម្បត្តិហូរហៀរជាងមុនដែរ។
ជាក់ស្តែងសព្វថ្ងៃនេះ លោក ឈឹម ធឿន មានឡានទំនើបៗ ៣គ្រឿង មានលុយទិញដីចម្ការរាប់សិបហិកតានៅឃុំស្នឹង ស្រុកបាណន់ និងមានលុយធ្វើរបងព័ទ្ធដីចម្ការនោះអស់រាប់សែនដុល្លារថែមទៀត ព្រមទាំងទិញដីក្នុងតម្លៃរាប់សិបម៉ឺនដុល្លារនៅក្នុងឃុំអន្លង់វិល ស្រុកសង្កែ ខេត្តបាត់ដំបង ផងដែរ។
លើសពីនេះ គាត់ក៏បានទិញផ្ទះក្នុងបុរីកាណាឌីយ៉ា ក្បែរផ្សារម៉ាក្រូ ក្នុងក្រុងសៀមរាប ចំនួន ២ល្វែងដែរ ដែលផ្ទះក្នុងបុរីនោះមានតម្លៃយ៉ាងតិចចាប់ពី ២០ម៉ឺនដុល្លារឡើងទៅ ហើយសព្វថ្ងៃនេះ លោក ឈឹម ធឿន ក៏កំពុងសាងសង់វីឡាដ៏ស្កឹមស្កៃមួយទៀតនៅស្រុកកំណើតរបស់គាត់ផងដែរ។
ប្រភពដដែលបញ្ជាក់ថា លោក ឈឹម ធឿន និងក្រុមគ្រួសាររបស់គាត់មិនមានអាជីវកម្មក្រៅឡើយ ក្រៅពីមានតួនាទីជានាយកវិទ្យាស្ថានពហុបច្ចេកទេសភូមិភាគតេជោសែនបាត់ដំបង នោះ ប៉ុន្តែទ្រព្យសម្បត្តិដែលគាត់មានក្នុងរយៈពេលចុងក្រោយនេះ គឺស្មើនឹងអាជីវករប្រកបអាជីវកម្មធំៗដែលមានចំណូលរាប់ម៉ឺនដុល្លារក្នុង ១ខែៗដូច្នោះដែរ។
សារព័ត៌មាន The Cambodia Daily មិនទាន់អាចទាក់ទងលោក ឈឹម ធឿន សុំការបំភ្លឺជុំវិញការចោទប្រកាន់នេះបាននៅឡើយទេរហូតដល់ម៉ោងផ្សាយនេះ។
អង្គការតម្លាភាពអន្តរជាតិ បានចេញសេចក្តីថ្លែងការណ៍ព័ត៌មានស្ដីពីសន្ទស្សន៍នៃការយល់ឃើញពីអំពើពុករលួយប្រចាំឆ្នាំ២០២៤ កាលពីខែកុម្ភៈ ឆ្នាំ២០២៥ ថា កម្ពុជាជាប់ចំណាត់ថ្នាក់លេខ១៥៨ ក្នុងចំណោមប្រទេស ១៨០ នៅលើពិភពលោក ជាប្រទេសដែលរុំព័ទ្ធទៅដោយអំពើពុករលួយធ្ងន់ធ្ងរ៕
© 2026, ឌឹ ខេមបូឌា ដេលី. All rights reserved.