ក្រសួងមហាផ្ទៃ ព្រមានតាមសេចក្តីប្រកាសព័ត៌មានជាបន្តបន្ទាប់ ជាពិសេសក្រោយពីរឹបអូសទ្រព្យសម្បត្តិមេខ្លោងបណ្ដាញឆបោក ថាប្រទេសកម្ពុជាគ្មានកន្លែងសុវត្ថិភាពសម្រាប់ពួកឧក្រិដ្ឋជនឡើយ ព្រោះថាយ៉ាងហោចណាស់ ជនបរទេសត្រូវបានសមត្ថកិច្ចឃាត់ខ្លួនជិត ៤០០នាក់ (៣៩៨នាក់) ក្រោយបង្ក្រាបទីតាំងពាក់ព័ន្ធបទល្មើសអនឡាញ ៤កន្លែង ត្រឹមតែរយៈពេល ២ថ្ងៃនៅដើមសប្តាហ៍នេះ។
បន្ថែមលើនេះទៀត សមត្ថកិច្ចក៏រឹបអូសបានកុំព្យូទ័រ All In One ជាង ១០០គ្រឿង (១៣៣គ្រឿង) កុំព្យូទ័រយួរដៃជាង ៦០គ្រឿង (៦៦គ្រឿង) ទូរសព្ទដៃជាង ៦០០គ្រឿង (៦១៩គ្រឿង) CPU កុំព្យូទ័រជិត ២០គ្រឿង (១៨គ្រឿង) និង Tablet៥គ្រឿងផងដែរ។
ចំណែកឯនៅខេត្តកែប សមត្ថកិច្ចបង្ក្រាបទីតាំងពាក់ព័ន្ធបទល្មើស Online Scams ចំនួន ១កន្លែង ដោយឃាត់ខ្លួនជនសង្ស័យ ១៤នាក់។ រីឯខេត្តបន្ទាយមានជ័យ ក៏សមត្ថកិច្ចបង្ក្រាប និងឃាត់ខ្លួនជនសង្ស័យជាង ១០០នាក់ (១៣៩នាក់) ផងដែរ រួមទាំងកុំព្យូទ័រ ទូរសព្ទដៃ និងឧបករណ៍សម្ភារៈមួយចំនួនសម្រាប់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យាថែមទៀត។
ប្រភពដដែលអះអាងថា យោងតាមការធ្វើកោសល្យវិច័យលើសម្ភារៈវត្ថុតាងឧបករណ៍អេឡិចត្រូនិក សមត្ថកិច្ចបានសន្និដ្ឋានថា ទីតាំងពាក់ព័ន្ធអំពើឆបោកតាមប្រព័ន្ធបច្ចេកវិទ្យាទាំងនេះ ស្ថិតក្រោមរូបភាពក្លែងបន្លំជានគរបាលប្រទេសជប៉ុន ដែលមានគោលដៅជនជាតិជប៉ុន ឆបោកក្រោមរូបភាពលួងលោមស្នេហា (ROMANCE SCAMS) និងក្រោមរូបភាពវិនិយោគ ដែលគោលដៅលើប្រទេសប៉ាគីស្ថាន បង់ក្លាដេស និងប្រទេសវៀតណាម ផងដែរ។
កាលពីថ្ងៃទី៧ ខែមេសា ឆ្នាំ២០២៦ អគ្គនាយកអន្តោប្រវេសន៍ បានចេញសេចក្តីប្រកាសព័ត៌មានថា ចាប់ពីថ្ងៃទី១ ដល់ថ្ងៃទី៥ ខែមេសា ឆ្នាំ២០២៦ កម្ពុជាបានបណ្តេញជនបរទេសដែលពាក់ព័ន្ធករណីឆបោកតាមប្រព័ន្ធអនឡាញ (Online Scams) ជាង ១ពាន់នាក់ (១០៨៤នាក់) ចេញពីប្រទេសរបស់ខ្លួន ដែលមានជិត ៣០សញ្ជាតិ (២៧សញ្ជាតិ)។
កាលពីថ្ងៃទី៥ ខែកុម្ភៈ ឆ្នាំ២០២៦ ក្រសួងមហាផ្ទៃ បានផ្សព្វផ្សាយអំពីការបង្ក្រាបឧក្រិដ្ឋកម្មតាមអនឡាញថា ប្រទេសកម្ពុជាប្ដេជ្ញាបោសសម្អាតបទល្មើសអនឡាញឱ្យអស់ត្រឹមខែមេសា ឆ្នាំ២០២៦ នេះ។
យ៉ាងណាមិញ អង្គការអន្តរជាតិ Amnesty International ផ្សាយកាលពីថ្ងៃព្រហស្បតិ៍ ទី២ ខែមេសា សប្តាហ៍មុន ដែលគេស្រាវជ្រាវឃើញថា រាជរដ្ឋាភិបាលបានបន្តផ្តល់អាជ្ញាបណ្ណដល់បនល្បែងកាស៊ីណូដែលមានឈ្មោះជាប់ទាក់ទិននឹងមុខរបរឧក្រិដ្ឋឆបោក ឬហៅថា online scam ដែលខ្លួនប្ដេជ្ញាថានឹងបោសសម្អាតឲ្យអស់នោះតាំងពីខែធ្នូ ឆ្នាំ២០២៥ ដល់ខែមករា ឆ្នាំ២០២៦។
Amnesty International បានរកឃើញថា គណៈកម្មការចាត់ចែងបនល្បែងនៃក្រសួងពាណិជ្ជកម្ម បានទទួលស្គាល់បនល្បែង ១២ទីតាំងដែលមានអ្នកគ្រប់គ្រងជាម្ចាស់អគារ និងជាម្ចាស់បនល្បែងជាមួយគ្នាដែលមានឈ្មោះជាឧក្រិដ្ឋជន។
ក្រុមអ្នកសង្កេតការណ៍លើកឡើងថា កម្ពុជាទំនងជាមិនលុបបំបាត់បទល្មើសអនឡាញបានទេ ព្រោះរដ្ឋាភិបាល ឬស្ថាប័នមានសមត្ថកិច្ច មិនអាចអនុវត្តច្បាប់លើសែស្រឡាយ បក្ខពួក អ្នកមានអំណាចកំពូលៗផងនោះ ដូចជា ឧកញ៉ា ហ៊ុន តូ ក្មួយបង្កើតលោក ហ៊ុន សែន ជាដើម ដែលល្បីល្បាញខាងប្រព្រឹត្តល្មើសអនឡាញរហូតមកនោះ។
ជាក់ស្តែង ក្រុមអ្នកស្រាវជ្រាវរូបិយប័ណ្ណគ្រីបតូ Chainalysis កាលពីចុងឆ្នាំ២០២៤ បានចង្អុលមុខក្រុមហ៊ុន Huione របស់លោក ហ៊ុន តូ ថាបានជាប់ពាក់ព័ន្ធនឹងបទល្មើសឆបោករូបិយប័ណ្ណគ្រីបតូ ព្រមទាំងជាប់ពាក់ព័ន្ធនឹងទីផ្សារឆបោករូបិយប័ណ្ណគ្រីបតូខ្មៅងងឹតក្នុងតម្លៃទឹកប្រាក់រហូតដល់ជាង ៤៩ពាន់លានដុល្លារអាមេរិក តាំងពីឆ្នាំ២០២១ ផងដែរ។
កាលពីដើមខែនេះ នាយករដ្ឋមន្ត្រី ហ៊ុន ម៉ាណែត បានបញ្ជាឲ្យរឹបអូសយកទ្រព្យសម្បត្តិមេខ្លោងឆបោកជនជាតិចិន ទាំងពីរនាក់ លោក ចេន ហ្ស៊ី (Chen Zhi) និងលោក លី ស្យ៊ុង (Li Xiong) មានធនាគារ ព្រីនស៍ (Prince), Panda និង ហួយវ័ន (Huione) ដាក់ចូលរតនាគារជាតិ គិតជាទឹកប្រាក់សរុបប្រមាណ ១០០ពាន់លានដុល្លារ។
យ៉ាងណាក៏ដោយ គេមិនដែលឃើញរដ្ឋាភិបាលដែលដឹកនាំដោយត្រកូលហ៊ុន បើកការស៊ើបអង្កេតលើសាច់ញាតិរបស់ខ្លួនម្នាក់នេះឡើយ បើទោះបីជាលោក ហ៊ុន តូ ត្រូវសារព័ត៌មានអន្តរជាតិផ្សាយ និងបង្ហាញភស្តុតាងជាបន្តបន្ទាប់ក៏ដោយ។
សារព័ត៌មាន The Cambodia Daily នឹងព្យាយាមចងក្រងអត្ថបទផ្សាយអំពីបណ្ដាញឆបោកតាមប្រព័ន្ធបច្ចេកវិទ្យាដូចសម្បុកពីងពាងនៅស្រុកខ្មែរ ដែលរហូតដល់ពលរដ្ឋខ្មែរមួយចំនួនហៅស្រុកកំណើតរបស់ខ្លួនថាជាស្រុកចោរ ជូនជ្រាបនៅពេលក្រោយ ថាតើមានអ្នកណា ស្ថាប័នណាជាប់ទាក់ទិន ហើយនិយាយថាមិនដឹងនោះ៕
© 2026, ឌឹ ខេមបូឌា ដេលី. All rights reserved.