ស្នងការនគរបាលជាតិប្រទេសកម្ពុជា កំពុងសហការជាមួយទីភ្នាក់ងារនគរបាលជាតិកូរ៉េខាងត្បូង ដើម្បីពង្រឹងកិច្ចសហប្រតិបត្តិការប្រឆាំងនឹងបទល្មើសឆ្លងដែន និងបទល្មើសឆបោកតាមប្រព័ន្ធបច្ចេកវិទ្យាឱ្យកាន់តែមានប្រសិទ្ធភាព។
នគរបាលជាតិកម្ពុជា-កូរ៉េ បានចេញសេចក្តីប្រកាសព័ត៌មានរួមគ្នានៅថ្ងៃទី២៩ មេសា នេះថា ស្នងការនគរបាលជាតិនៃប្រទេសទាំងពីរ បានព្រមព្រៀងគ្នាពង្រឹងកិច្ចសហប្រតិបត្តិការប្រឆាំងនឹងបទល្មើសឆ្លងដែន បទល្មើសឆបោកតាមប្រព័ន្ធបច្ចេកវិទ្យា និងបទល្មើសឆបោកនានាតាមគ្រប់រូបភាពផងដែរ។ កិច្ចសហប្រតិបត្តិការនេះ ក៏ប្រឆាំងទៅនឹងបទល្មើសពាក់ព័ន្ធផ្សេងទៀតដែរ ដូចជា អំពើឃាតកម្ម ការចាប់ពង្រត់ ចាប់ជំរិត ការបង្ខាំងដោយខុសច្បាប់ ការបាត់ខ្លួន ការប្រយុទ្ធប្រឆាំងបទល្មើសគ្រឿងញៀន និងល្បែងស៊ីសងខុសច្បាប់ថែមទៀត។
សេចក្តីប្រកាសព័ត៌មានដដែលនេះ អះអាងថា កងកម្លាំងនគរបាលជាតិនៃប្រទេសទាំងពីរបានប្ដេជ្ញាធ្វើកិច្ចសហប្រតិបត្តិការយ៉ាងជិតស្និទ្ធក្នុងការធានាសុវត្ថិភាពសម្រាប់ប្រជាពលរដ្ឋនៃប្រទេសទាំងពីរ ព្រោះបណ្ដាញឧក្រិដ្ឋកម្មឆ្លងដែន រួមទាំងក្រុមធ្វើប្រតិបត្តិការមជ្ឈមណ្ឌលឆបោកតាមប្រព័ន្ធបច្ចេកវិទ្យា គឺជាការគំរាមកំហែងយ៉ាងធ្ងន់ធ្ងរដល់ពិភពលោក។
ប្រភពដដែល បញ្ជាក់ថា រយៈពេល ៤ខែ ចាប់ពីចុងខែធ្នូ ឆ្នាំ២០២៥ ដល់ខែមេសា ឆ្នាំ២០២៦ នគរបាលកម្ពុជា និងកូរ៉េ បានសហការគ្នាចាប់ខ្លួនជនសង្ស័យជាង ១០០នាក់ (១៦៦នាក់) និងជួយសង្គ្រោះពលរដ្ឋកូរ៉េ បាន ៥នាក់ ដែលនេះគឺជាការបង្ហាញនូវចំណុចរបត់សំខាន់នៃកិច្ចសហប្រតិបត្តិការក្នុងការអនុវត្តច្បាប់ទ្វេភាគីនៃប្រទេសទាំងពីរ។
អគ្គស្នងការនគរបាលជាតិ លោក ស ថេត នៅថ្ងៃទី២៩ ខែមេសា ឆ្នាំ២០២៦ នេះ បានជួបជាមួយអគ្គស្នងការស្តីទីនៃទីភ្នាក់ងារនគរបាលជាតិកូរ៉េ លោក Yoo Jae Seong ក្នុងទីក្រុងសេអ៊ូល នៃសាធារណរដ្ឋកូរ៉េ។ ភាគីទាំងពីរ បញ្ជាក់ថា កិច្ចសហប្រតិបត្តិការយ៉ាងជិតស្និទ្ធ និងសាមគ្គីភាពរបស់កងកម្លាំងនគរបាលនៃប្រទេសទាំងពីរនេះ គឺមានសារសំខាន់យ៉ាងខ្លាំងក្នុងការធានាសុវត្ថិភាពសម្រាប់ប្រជាពលរដ្ឋនៃប្រទេសទាំងពីរ និងការកសាងសន្តិសុខសាធារណៈក្នុងតំបន់ ជុំវិញការប្រយុទ្ធប្រឆាំងនឹងការឆបោកតាមប្រព័ន្ធបច្ចេកវិទ្យា និងបទល្មើសពាក់ព័ន្ធផ្សេងទៀត។
យ៉ាងណាមិញ យោងតាមសេចក្តីរាយការណ៍ស៊ើបអង្កេតពីអង្គការ Humanity Research Consultancy គេបានបង្ហាញកាលពីពេលថ្មីៗនេះថា មានមនុស្សយ៉ាងតិច ២៨នាក់ ដែលជាមេខ្លោងនៃក្រុមឧក្រិដ្ឋកម្មអនឡាញនៅក្នុងប្រទេសកម្ពុជា ដែលក្នុងនោះក៏មានមន្ត្រីជាន់ខ្ពស់ក្នុងជួររដ្ឋាភិបាល ឧកញ៉ា និងមនុស្សជំនិតនឹងមេដឹកនាំបក្សកាន់អំណាច លោក ហ៊ុន សែន រួមទាំងសមាជិកគ្រួសារត្រកូលហ៊ុនផងដែរ។
ចំណែកឯរដ្ឋមន្ត្រីក្រសួងមហាផ្ទៃ លោក ស សុខា ដែលត្រូវជាក្មួយប្រុសបង្កើតលោក ស ថេត ក៏មានឈ្មោះក្នុងបញ្ជីមេខ្លោងនៃក្រុមឧក្រិដ្ឋកម្មអនឡាញនៅក្នុងប្រទេសកម្ពុជានេះថែមទៀត។
ពាក់ព័ន្ធនឹងបញ្ហានេះ អតីតអ្នកឧកញ៉ា ហេង សិទ្ធី ដែលត្រូវបានរដ្ឋាភិបាលកម្ពុជាចាប់ខ្លួនដាក់ពន្ធនាគារសព្វថ្ងៃនេះ ធ្លាប់បានទម្លាយកាលពីដើមឆ្នាំ២០២៥ ថា លោក ស សុខា និងលោក ស ថេត តែងតែទទួលលុយសំណូកពីឧក្រិដ្ឋជនជាថ្នូរនឹងការមិនឆែកឆេរផ្ទះ និងកន្លែងប្រព្រឹត្តបទល្មើសអនឡាញ ទីតាំងចាប់ជំរិតមនុស្ស រួមទាំងទីតាំងបង្ខាំងមនុស្សរហូតមក។ រីឯទីតាំងរកស៊ីផ្ទេរប្រាក់ខ្មៅកខ្វក់ មានឈ្មោះជំពាក់ជំពិននឹងលោក ហ៊ុន តូ ដែរ។
លោកបញ្ជាក់ថា ការទទួលសំណូកពីការបង់ថ្លៃការពារទីតាំងប្រព្រឹត្តអំពើឧក្រិដ្ឋនានា ដូចជា ទីតាំងផលិត និងចែកចាយគ្រឿងញៀន ទីតាំងបនល្បែង និងទីតាំងរកស៊ីផ្លូវភេទខុសច្បាប់ រួមទាំងការពារក្រុមចោរកម្ម និងក្រុមប្លន់ប្រដាប់អាវុធ ជាដើម។ កាលពីជំនាន់មុន ល្បីថាលោក ហុក ឡង់ឌី ក៏មានជាប់ពាក់ព័ន្ធដូចគ្នានេះដែរ។
ជុំវិញបញ្ហានេះ ពលរដ្ឋដែលរងគ្រោះក្នុងអំពើឆបោក ទម្លាយកាលពីពេលថ្មីៗនេះថា អំពើឆបោកតាមអនឡាញនៅកម្ពុជា កំពុងបំប្លែងបន្លំខ្លួនទៅតាមតំបន់សេដ្ឋកិច្ចពិសេស តំបន់រោងចក្រ បុរី ផ្ទះជួល សណ្ឋាគារ និងអគារកំពុងសង់ ជាដើម បន្ទាប់ពីមានការបង្ក្រាបតាមអគារធំៗ ខ្ពស់ៗក្នុងរយៈពេលចុងក្រោយនេះ។
ប្រភពដដែលបញ្ជាក់ថា ចំណែកឯក្រុមឧក្រិដ្ឋជន ក៏បានផ្លាស់ប្ដូរទីតាំងទៅរស់នៅសម្ងំតាមបុរី និងផ្ទះជួលសិន ក្រោមកិច្ចសហការរវាងម្ចាស់បុរី និងអាជ្ញាធរផងដែរ ប៉ុន្តែរាល់ពេលមានការបង្ក្រាប សមត្ថកិច្ចតែងផ្តល់ដំណឹងដល់ម្ចាស់បុរី ដើម្បីជម្លៀសក្រុមឧក្រិដ្ឋជនទាំងនោះទៅទីតាំងផ្សេង ដើម្បីសុវត្ថិភាព៕
© 2026, ឌឹ ខេមបូឌា ដេលី. All rights reserved.