មន្ត្រីជាន់ខ្ពស់គណបក្សសង្គ្រោះជាតិ នៅក្រៅប្រទេស CNRP-A (CNRP-American) បានសម្រេចដាក់ពាក្យលាឈប់ពីតួនាទីរបស់ខ្លួនដែលជាមន្ត្រីជាន់ខ្ពស់ប្រចាំសហរដ្ឋអាមេរិក ដោយចោទថា ក្រុម CNRP-A និងក្រុម CNRP-O (CNRP Oversea) លួចជួយគណបក្សបេះដូងជាតិនៅកម្ពុជា ដែលទើបនឹងបង្កើតឡើងកាលពីពេលថ្មីៗនេះ។
អនុប្រធានគណបក្សសង្គ្រោះជាតិ CNRP-A លោក យ៉ង់ ណុយ ឬលោក យ៉ង់ ប្រេឌី ណុយ ឬ Brady Young បានសរសេរលើគណនី Facebook របស់លោកនៅថ្ងៃទី៥ ខែសីហា ឆ្នាំ២០២១ ថា ការលាលែងពីតំណែងនេះ គឺដោយសារតែក្រុម CNRP-A និងក្រុម CNRP-O នៅតែបន្តគាំទ្រ និងជួយផ្គត់ផ្គង់គណបក្សបេះដូងជាតិ ដែលផ្ទុយស្រឡះពីគោលការណ៍ សម រង្ស៊ី និង កឹម សុខា ជាមនុស្សតែមួយដែលជាជំហរដើមរបស់គណបក្សពីមុនមក។
លោកអះអាងថា ក្រុម CNRP-A និងក្រុម CNRP-O តែងវាយប្រហារជេរប្រមាថអ្នកបង្កើតបក្សថ្មីៗ ប៉ុន្តែផ្ទុយទៅវិញ បើសូម្បីតែអ្នកដែលធ្លាប់ជេរគេឯងនោះក៏លួចទៅបង្កើតបក្សថ្មី ឬគាំទ្រ និងជួយឧបត្ថម្ភដល់បក្សថ្មីដែរនោះ គឺមានន័យថាពួកគេបានរត់ចោលគណបក្សសង្គ្រោះជាតិបាត់ហើយ។ លោកថា ករណីនេះជាការបញ្ជាក់យ៉ាងច្បាស់ផងដែរថា ពួកគេបានក្បត់គណបក្សសង្គ្រោះជាតិហើយនៅពេលនេះ ដូច្នេះលោកត្រូវតែលាឈប់ដើម្បីរក្សាជំហរនៅជាមួយគណបក្សសង្គ្រោះជាតិបន្តទៀត។
លោក យ៉ង់ ប្រេឌី ណុយ ឬ Brady Young បញ្ជាក់ជំហរថា បេះដូងលោកនៅជាមួយគណបក្សសង្គ្រោះជាតិជានិច្ច ទោះថ្ងៃនេះ ឬថ្ងៃស្អែក ឆ្នាំនេះ ឬឆ្នាំក្រោយ ក៏មិនប្រែប្រួលដែរ ដូច្នេះបើសមាជិកដទៃទៀតមានបេះដូងសង្គ្រោះជាតិពិតប្រាកដ អាចមកចូលរួមសកម្មភាពនយោបាយជាមួយលោកបាននៅទីក្រុងឡងប៉ិច ដើម្បីបុព្វហេតុជាតិ និងប្រជាជន។
មន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា បានប្រាប់សារព័ត៌មាន The Cambodia Daily នៅថ្ងៃទី៥ ខែសីហា ថា ការសម្រេចចិត្តរបស់អនុប្រធានគណបក្សសង្គ្រោះជាតិ CNRP-A លោក យ៉ង់ ប្រេឌី ណុយ គឺជារឿងត្រឹមត្រូវ ព្រោះការលួចចេញទៅបង្កើតបក្សថ្មីចោលគណបក្សសង្គ្រោះជាតិ គឺជាអំពើក្បត់ដៃគូនយោបាយរបស់ខ្លួនដែលមិនអាចអត់ឱនឲ្យបាន។
លោកបញ្ជាក់ថា ការចេញទៅបង្កើតបក្សថ្មីរបស់មន្ត្រីជាន់ខ្ពស់បក្សសង្គ្រោះជាតិភាគីលោក សម រង្ស៊ី គឺកំពុងតែដើរចូលក្នុងអន្ទាក់ល្បែងនយោបាយរបស់បក្សកាន់អំណាច ព្រោះថាមេបក្សកាន់អំណាចលោក ហ៊ុន សែន ធ្លាប់បានបញ្ជាក់ជំហររបស់លោករួចហើយកាលពីថ្ងៃទី១ ខែសីហា កន្លងទៅនេះថា អ្នកចង់សុំសិទ្ធិធ្វើនយោបាយឡើងវិញ ទាល់តែធ្វើឲ្យលោកសប្បាយចិត្តជាមុនសិន ដូច្នេះការបង្កើតបក្សថ្មីនេះគ្រាន់តែចូលរួមបំពេញមហិច្ឆតារបស់លោក ហ៊ុន សែន តែប៉ុណ្ណោះ។
កាលពីថ្ងៃទី១ ខែសីហា ឆ្នាំ២០២១ មន្ត្រីជាន់ខ្ពស់គណបក្សសង្គ្រោះជាតិ CNRP-A ប្រចាំសហរដ្ឋអាមេរិក លោក យ៉ង់ ប្រេឌី ណុយ បានដាក់លិខិតលាលែងពីអនុប្រធានគណបក្សសង្គ្រោះជាតិ CNRP-A និងលាលែងពីគណៈកម្មការផ្សព្វផ្សាយព័ត៌មានរបស់គណបក្សនេះផងដែរ។
យ៉ាងណាក៏ដោយ លោក យ៉ង់ ប្រេឌី ណុយ ធ្លាប់ត្រូវបានគណបក្សសង្គ្រោះជាតិ បញ្ចប់សមាជិកភាពរបស់លោកម្តងរួចមកហើយកាលពីថ្ងៃទី១៦ ខែឧសភា ឆ្នាំ២០១៦ បន្ទាប់ពីលោកបានសរសេរនៅលើគណនីហ្វេសប៊ុកផ្ទាល់ខ្លួនរបស់លោក ដោយចោទកូនប្រុសរបស់លោកនាយករដ្ឋមន្ត្រី ហ៊ុន សែន គឺលោក ហ៊ុន ម៉ាណែត ថាជាកូនមេដឹកនាំវៀតណាម លោក ឡេ ឌឹកថរ នៅពេលនោះ។
ប៉ុន្តែអតីតមន្ត្រីបក្សប្រឆាំងរូបនេះ ត្រូវបានគណបក្សតែងតាំងជាអនុប្រធានគណបក្សសង្គ្រោះជាតិ CNRP-A សាជាថ្មី នៅក្នុងពិធីសមាជគណបក្សសង្គ្រោះជាតិលើកទី២ នៅសហរដ្ឋអាមេរិក ទីក្រុងអាតាឡង់តា កាលពីថ្ងៃទី២ ខែធ្នូ ឆ្នាំ២០១៨ កន្លងទៅ ក៏ជាថ្ងៃដែលប្រកាសជាឯកតោភាគីតែងតាំងអតីតប្រធានគណបក្សសង្គ្រោះជាតិ លោក សម រង្ស៊ី ជាប្រធានគណបក្សស្តីទីនៅពេលនោះទៅវិញ។
ជុំវិញបញ្ហានេះ អតីតអគ្គលេខាធិការគណបក្សសង្គ្រោះជាតិក្រៅប្រទេស CNRP-O លោក ប៉ុន សៅរី កាលពីថ្ងៃទី២២ ខែមិថុនា ឆ្នាំ២០២១ បានរិះគន់ចំៗថា សកម្មជននៅមូលដ្ឋានដែលបានតស៊ូលះបង់ដើម្បីស្ដារលទ្ធិប្រជាធិបតេយ្យកន្លងមក បានផ្តល់ក្តីសង្ឃឹមទៅលើគណបក្សសង្គ្រោះជាតិតែមួយប៉ុណ្ណោះ ប៉ុន្តែមន្ត្រីបក្សប្រឆាំងដែលចេញទៅបង្កើតបក្សថ្មីទាំងនោះមិនដឹងខ្លួនទេថា ទង្វើរបស់ពួកគេក្នុងពេលនេះ គឺជាការចូលរួមជាមួយលោក ហ៊ុន សែន ក្នុងការបំផ្លាញ និងរំលាយគណបក្សសង្គ្រោះជាតិយ៉ាងពេញទំហឹង៕