រដ្ឋមន្ត្រីក្រសួងមហាផ្ទៃ លោក ស ខេង បង្ហាញក្តីបារម្ភដោយសារជនជាតិបរទេសបានយកទឹកដីនៃរាជាណាចក្រកម្ពុជា ធ្វើជាទីកន្លែងសម្រាប់ប្រព្រឹត្តបទល្មើសឆបោកតាមប្រព័ន្ធទូរគមនាគមន៍ដែលជាបទល្មើសថ្មីមួយយ៉ាងសាហាវ។
ក្នុងពិធីសម្ពោធដាក់ឲ្យប្រើប្រាស់ជាផ្លូវការនូវអគាររដ្ឋបាលកម្ពស់ ១០ជាន់ និងអគារសាលប្រជុំកម្ពស់ ៣ជាន់សម្រាប់ស្នងការដ្ឋាននគរបាលរាជធានីភ្នំពេញ នៅព្រឹកថ្ងៃទី៨ ខែកញ្ញា ឆ្នាំ២០២២ នេះ លោក ស ខេង ថ្លែងថា បទល្មើសឆបោកតាមប្រព័ន្ធទូរគមនាគមន៍ ជាបញ្ហាកំពុងកើតមានសព្វថ្ងៃ។
លោកចាត់ទុកបទល្មើសនេះថាជាបទល្មើសថ្មីមួយយ៉ាងសាហាវ ដោយវាមិនមែនបទល្មើសប្រពៃណី ហើយមកទល់ពេលនេះ ក្រសួងបានទទួលពាក្យបណ្តឹង ១ករណីដែលកើតឡើងនៅរាជធានីភ្នំពេញ ដោយសមត្ថកិច្ចជំនាញកំពុងតាមដានដើម្បីធ្វើការដោះស្រាយបញ្ហានេះ។
ទោះបីជានៅរាជធានីភ្នំពេញ ក្រសួងទើបតែទទួលបានពាក្យបណ្ដឹង ១ករណីក៏មែនពិត ប៉ុន្តែនៅកន្លែងផ្សេងទៀត ជាពិសេសនៅខេត្តព្រះសីហនុ បានកើតឡើងច្រើនហើយ។ លោក ស ខេង បានបង្ហាញក្ដីបារម្ភដោយលោកថា បច្ចុប្បន្នក្រុមជនល្មើសជួញដូរមនុស្សតាមប្រព័ន្ធទូរគមនាគមន៍ កំពុងយកទឹកដីប្រទេសកម្ពុជាធ្វើជាកន្លែងប្រព្រឹត្តបទល្មើស ខណៈមេខ្លោងដែលប្រព្រឹត្តបទល្មើសជាជនបរទេស។
លោកបានក្រើនរំឭកទៅសមត្ថកិច្ចជំនាញ ត្រូវសហការគ្នាដោយធ្វើការយ៉ាងហ្មត់ចត់ទប់ស្កាត់បទល្មើសទាំងនេះឱ្យកាន់តែមានប្រសិទ្ធភាព ដើម្បីលើកមុខមាត់កម្ពុជា ជាពិសេសបន្តបង្ការ ទប់ស្កាត់ និងបង្ក្រាបអំពើអនាចារ ការជួញដូរមនុស្ស ជាពិសេសស្ត្រីនិងកុមារ អំពើហិង្សាក្នុងគ្រួសារ និងក្មេងទំនើងតាមសង្កាត់ និងខណ្ឌនានាក្នុងរាជធានីភ្នំពេញ។
អនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស អ្នកស្រី ជូ ប៊ុនអេង លើកឡើងកាលពីថ្ងៃទី១២ ខែសីហា ឆ្នាំ២០២២ ថា ក្នុងឆ្នាំ២០២១ កន្លងទៅ បទល្មើសជួញដូរមនុស្ស សមត្ថកិច្ចបង្ក្រាបបាន ៣៥៩លើក ដែលជាការកើនឡើងពីរដង ប្រៀបធៀបនឹងឆ្នាំ២០១៩ ដែលមានត្រឹម ១៥៥ករណីប៉ុណ្ណោះ។
អ្នកស្រីបង្ហាញពីការឈឺចាប់ទៅលើឧក្រិដ្ឋជនមួយចំនួនដែលត្រូវបានគេរាយការណ៍ថា បានយកប្រទេសកម្ពុជាធ្វើជាកន្លែងជួញដូរ ដែលជាផ្នែកមួយត្រូវបានគេរាប់បញ្ចូលទៅក្នុងសេចក្តីរាយការណ៍វាយតម្លៃចំណាត់ថ្នាក់លេខ៣ នោះ ដែលអ្នកស្រីថាជាចំណាត់ថ្នាក់បាតតារាង។
កាលពីថ្ងៃទី២០ ខែកក្កដា ឆ្នាំ២០២២ សហរដ្ឋអាមេរិកបានដាក់ប្រទេសកម្ពុជាក្នុងបញ្ជីខ្មៅរបស់ខ្លួន ដោយវិធានការនេះ សហរដ្ឋអាមេរិកសំអាងថា ការជួញដូរជនបរទេសចូលមកក្នុងប្រទេសកម្ពុជាកំពុងមានការកើនឡើងឥតថយចុះ ក៏ដូចជាការរំលោភបំពានផ្សេងទៀតពាក់ព័ន្ធនឹងវិស័យការងារ ពលករចំណាកស្រុក ហើយមន្ត្រីមួយចំនួនសមគំនិតក្នុងប្រតិបត្តិការឆបោកតាមប្រព័ន្ធអ៊ីនធឺណិត៕