ដោយឡែកពីប្រទេសភូមា ជាប់នឹងប្រទេសថៃ ករណីផ្ទុះការសង្ស័យថាមេដឹកនាំរបបសឹកភូមា ឧត្ដមសេនីយ៍ មីន អ៊ុងឡាំង ត្រូវបានឃុំខ្លួនក្រោមរូបភាពនៃរដ្ឋប្រហារ។
យោងតាមការចុះផ្សាយក្នុងសារព័ត៌មានភូមា ខណៈនេះ Myanmar Now មានការសង្ស័យថា ក្រុមមន្ត្រីយោធាជាន់ខ្ពស់ភូមា បានចាប់ខ្លួនឧត្តមសេនីយ៍ មីន អ៊ុងឡាំង ដោយឧត្ដមសេនីយ៍នៅជុំវិញខ្លួនលោក ហើយឃុំខ្លួននៅក្នុងរដ្ឋធានីណៃពិដោ។
ការឃុំខ្លួនលោក មីន អ៊ុងឡាំង ដើម្បីផ្លាស់ប្ដូរមេដឹកនាំរដ្ឋាភិបាល ព្រោះថាប៉ុន្មានខែមកនេះ របបសឹកបានរងការរិះគន់យ៉ាងខ្លាំងពីសំណាក់អ្នកគាំទ្ររបស់ខ្លួន ស្របពេលកងកម្លាំងយោធានៃរបបសឹក បានបាត់បង់ទឹកដីជាបន្តបន្ទាប់ ក្រោមការវាយលុកពីក្រុមប្រដាប់អាវុធជនជាតិភាគតិចដែលប្រឆាំងរបបសឹក។
ពាក្យចចាមអារ៉ាមនេះ កំពុងផ្ទុះការរំជើបរំជួលនៅក្នុងប្រទេសភូមា ជាពិសេសនៅរដ្ឋធានីណៃពិដោ និងទីក្រុងធំៗឯទៀតនៃប្រទេសនេះ។
ភ្លាមៗនោះ របបសឹកភូមា បានចេញសេចក្ដីថ្លែងការណ៍ថា ការលេចឡើងនូវពាក្យចចាមអារ៉ាមដែលថាក្រុមឧត្ដមសេនីយ៍ជាន់ខ្ពស់បានធ្វើរដ្ឋប្រហារថ្មីមួយទៀត ដោយឃុំខ្លួនលោក មីន អ៊ុងឡាំង គឺជាសកម្មភាពឃោសនាដើម្បីបង្កឱ្យមានការភាន់ច្រឡំ ដែលជាទង្វើរបស់ក្រុមជនក្បត់។
របបសឹកភូមា បានចេញសេចក្តីថ្លែងការណ៍ច្រានចោលពាក្យចចាមអារ៉ាម ដោយអះអាងថាជាការឃោសនាដែលមានគោលដៅរាំងស្ទះសុខសន្តិភាព និងស្ថិរភាពប្រទេស ហើយបានចោទប្រកាន់អ្នកផ្សព្វផ្សាយពាក្យចចាមអារ៉ាមទាំងនោះថាជាក្រុមជនក្បត់។
តែជាមួយគ្នានេះ មានការចុះផ្សាយថាលោក មីន អ៊ុងឡាំង ចង់ស្វែងរកសិទ្ធិជ្រកកោននៅឯក្រៅប្រទេស ដែលក្នុងនោះមានប្រទេសចិន ផងដែរ។ ហេតុការណ៍នេះកើតឡើងក៏ចំពេលរដ្ឋមន្ត្រីការបរទេសចិន លោក Wang Yi ត្រូវមកដល់ប្រទេសភូមា នៅថ្ងៃទី១៤ សីហា នេះ ហើយត្រូវជួបពិភាក្សាជាមួយលោក មីន អ៊ុងឡាំង។
លោក មីន អ៊ុងឡាំង ជាមេរដ្ឋប្រហារនៅថ្ងៃទី១ ខែកុម្ភៈ ឆ្នាំ២០២១ ជាព្រឹត្តិការណ៍មួយដែលពួកយោធាឡើងកាន់អំណាចជាថ្មី ដោយបញ្ចប់រដ្ឋាភិបាលប្រជាធិបតេយ្យរបស់អ្នកស្រី អ៊ុងសាន ស៊ូជី ដែលទើបមានអាយុ ៥ឆ្នាំ។
បច្ចុប្បន្ននេះ អ្នកនយោបាយភូមា មកពីបក្សសម្ព័ន្ធជាតិដើម្បីប្រជាធិបតេយ្យ ដឹកនាំដោយអ្នកស្រី ស៊ូជី ជាង ៣០០នាក់កំពុងជាប់ឃុំខ្លួន ក្នុងនោះមានទាំងអ្នកស្រី ស៊ូជី ផងដែរ។
នៅពេលនេះ ប្រទេសភូមា កំពុងធ្លាក់ក្នុងសង្គ្រាមស៊ីវិលដែលក្រុមរដ្ឋាភិបាលស្រមោលនៃបក្សសម្ព័ន្ធជាតិដើម្បីប្រជាធិបតេយ្យ រួមសហការគ្នាជាមួយកម្លាំងទ័ពជនជាតិដើម កំពុងវាយពង្រីកទីតាំងបានកាន់តែច្រើនពីរបបសឹក ដែលស្ថិតនៅក្រោមមេរដ្ឋប្រហារឧត្ដមសេនីយ៍ មីន អ៊ុងឡាំង៕
© 2024, ឌឹ ខេមបូឌា ដេលី. All rights reserved.