អ្នកស្រាវជ្រាវខាងការអភិវឌ្ឍផ្នត់គំនិត លើកឡើងថា ការមិនធានាបាននូវការគោរពសិទ្ធិមនុស្សពីរដ្ឋាភិបាលខ្មែរ នឹងមិនផ្តល់ផលចំណេញដល់ប្រទេសកម្ពុជា និងពលរដ្ឋខ្មែរឡើយ។
អ្នកផ្តល់ប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី២ ធ្នូ នេះថា ការថ្កោលទោសរបស់សមាជិកសភាអាស៊ាន ជុំវិញករណីចាប់សកម្មជនភៀសខ្លួននយោបាយក្រោមកិច្ចសហការរវាងរដ្ឋាភិបាលកម្ពុជា និងរដ្ឋាភិបាលថៃ នៅពេលនេះ គឺជាមេរៀនមួយសម្រាប់រដ្ឋាភិបាលនៃប្រទេសទាំងពីរដែលមិនត្រូវអនុវត្តវិធានការដោយរំលោភបំពានច្បាប់អន្តរជាតិបែបនេះបន្តទៀតទេ។
លោក សេក សុជាតិ លើកឡើងថា ជុំវិញការរឹតត្បិតសេរីភាព និងសិទ្ធិរបស់ពលរដ្ឋនៅពេលនេះ កម្ពុជាកំពុងស្ថិតក្នុងស្ថានភាពដែលមជ្ឈដ្ឋានអន្តរជាតិកំពុងផ្ដោតក្រសែភ្នែកឃ្លាំមើលជុំទិស ទាំងអាស៊ាន និងសហភាពអឺរ៉ុប។ លោកបន្តថា កម្ពុជាអាចនឹងត្រូវរងនូវរឹតត្បិតបន្ថែមទៀត ឬមួយអាចត្រូវរងនូវទណ្ឌកម្មណាមួយ ជាដើម។
ប្រភពដដែលអំពាវនាវឱ្យរដ្ឋាភិបាលកម្ពុជាពិចារណារកវិធីលើកកម្ពស់សិទ្ធិមនុស្សឡើងវិញ បន្ទាប់ពីកិច្ចសហការរបស់ខ្លួនជាមួយរដ្ឋាភិបាលថៃ ក្នុងការចាប់បញ្ជូនសកម្មជនភៀសខ្លួនក្រោមហេតុផលនយោបាយដែលពោរពេញទៅដោយការរិះគន់ពីមជ្ឈដ្ឋានអន្តរជាតិជាបន្តបន្ទាប់នៅពេលនេះ។
កាលពីថ្ងៃទី៣០ ខែវិច្ឆិកា ឆ្នាំ២០២៤ សមាជិកសភាអាស៊ាន (APHR) បានចេញមុខថ្កោលទោសរដ្ឋាភិបាលកម្ពុជា និងរដ្ឋាភិបាលថៃ ជុំវិញការចាប់បញ្ជូនសកម្មជនខ្មែរពីប្រទេសថៃ ដោយបង្ខំ កាលពីចុងខែវិច្ឆិកា កន្លងទៅថ្មីៗនេះ។
សមាជិកក្រុមប្រឹក្សាភិបាលរបស់សភាអាស៊ាន (APHR) និងជាសមាជិកសភាមកពីប្រទេសម៉ាឡេស៊ីលោក Wong Chen បានលើកឡើងថា “ការនិរទេសសកម្មជនការពារសិទ្ធិមនុស្សរបស់កម្ពុជា និងថៃ នាពេលនេះ បានបញ្ជាក់ពីការចូលរួមដ៏គួរឱ្យព្រួយបារម្ភរបស់ថៃ ជាមួយនឹងរបបផ្ដាច់ការកម្ពុជា ដែលគាបសង្កត់ និងបង្ក្រាបអ្នកមានគំនិតផ្ទុយលើសពីព្រំដែនរបស់ខ្លួន។”
ចំណែកប្រធានសភាអាស៊ាន អ្នកស្រី Mercy Chriesty Barends និងជាសមាជិកសភាមកពីប្រទេសឥណ្ឌូនេស៊ី បានអះអាងថា “សភាអាស៊ានបានអំពាវនាវឱ្យរដ្ឋាភិបាលថៃ បញ្ឈប់រាល់ការនិរទេសជនភៀសខ្លួននយោបាយទាំងអស់ និងបំពេញកាតព្វកិច្ចរបស់ថៃ ស្របតាមច្បាប់សិទ្ធិមនុស្សអន្តរជាតិឱ្យបានហ្មត់ចត់ឡើងវិញ។”
រីឯសមាជិកក្រុមប្រឹក្សាភិបាលសភាអាស៊ាន លោក Kasit Piromya និងជាអតីតសមាជិកសភាថៃ បានលើកឡើងថា “ការដាក់សម្ពាធដោយការឃុំខ្លួនសកម្មជនទាំងនោះនៅក្នុងពន្ធនាគារដាច់ៗដោយឡែកពីគ្នា គឺជាទង្វើដែលមិនមែនគ្រាន់តែជាការធ្វើទុក្ខបុកម្នេញដល់ស្មារតីក្រុមគ្រួសារពួកគេប៉ុណ្ណោះទេ ប៉ុន្តែជាការបរាជ័យនៃការប្ដេជ្ញាចិត្តរបស់អាស៊ានចំពោះសិទ្ធិមនុស្សផងដែរ។”
កាលពីថ្ងៃទី២៤ ខែវិច្ឆិកា ឆ្នាំ២០២៤ អាជ្ញាធរថៃ បានចាប់បញ្ជូនសកម្មជននយោបាយខ្មែរចំនួន ៦នាក់ទៅដាក់ពន្ធនាគារនៅប្រទេសកម្ពុជា តាមការស្នើរបស់អាជ្ញាធរខ្មែរ និងត្រូវបានកាត់ទោសពីបទក្បត់ជាតិ ដែលប្រឈមនឹងការជាប់គុកចាប់ពី ៧ឆ្នាំដល់ ៣០ឆ្នាំ៕
© 2024, ឌឹ ខេមបូឌា ដេលី. All rights reserved.