រដ្ឋមន្ត្រីការបរទេសសិង្ហបុរីអំពាវនាវឱ្យដោះលែងអ្នកស្រី អ៊ុងសាន ស៊ូជី និងអ្នកទោសនយោបាយទាំងអស់

ឌឹ ខេមបូឌា ដេលី

1 year ago

សំណុំរឿងភូមា ចាប់ផ្ដើមសើរើឡើងវិញ-នៅក្នុងកិច្ចប្រជុំថ្នាក់រដ្ឋមន្ត្រីការបរទេសអាស៊ានកាលពីសប្ដាហ៍មុន ធ្វើឡើងនៅទីក្រុងបាងកក រដ្ឋមន្ត្រីការបរទេសនៃប្រទេសសិង្ហបុរី លោក Vivian Balakrishnan បានព្យាយាមលើកឡើង និងនិយាយធ្ងន់ៗវាយប្រហាររបបសឹកនៅភូមា។

តាមការចុះផ្សាយរបស់សារព័ត៌មានសិង្ហបុរី The Strait Times ប្រមុខការបរទេសសិង្ហបុរី បានទាមទារឱ្យអាស៊ានដើរតួឲ្យសកម្មឡើងវិញក្នុងការជួយដោះស្រាយវិបត្តិនៅប្រទេសភូមា។

លោក Balakrishnan បានទាមទារឱ្យរបបសឹកភូមា ដោះលែងអ្នកស្រី អ៊ុងសាន ស៊ូជី ជាបន្ទាន់ ហើយត្រូវបញ្ចប់ហិង្សាវាយបង្ក្រាបបាញ់សម្លាប់ក្រុមប្រឆាំង។ លោករដ្ឋមន្ត្រីការបរទេសសិង្ហបុរី ក៏បានអំពាវនាវឱ្យលែងអ្នកទោសមនសិការទាំងអស់ ហើយសម្របស្ថានការណ៍នយោបាយទៅរកការចរចា។

លោកបញ្ជាក់ថា វិបត្តិនៅភូមា បានប៉ះពាល់ខ្លាំងមិនត្រឹមតែមុខមាត់ប្រទេសភូមា នោះទេ វាកំពុងប៉ះពាល់ខ្លាំងដល់សមាគមអាស៊ានផងដែរ។ លោកទទូចថា លោកចង់ឃើញរបបសឹកដោះលែងអ្នកស្រី ស៊ូជី ជាបន្ទាន់។

តាមប្រមុខការបរទេសសិង្ហបុរី នៅសល់ប៉ុន្មានសប្ដាហ៍ទៀត របបនៃការធ្វើរដ្ឋប្រហារមានអាយុ ៤ឆ្នាំ ដែលនាំឱ្យប្រទេសនេះធ្លាក់ក្នុងហិង្សានយោបាយ និងសង្គ្រាមស៊ីវិល។

តាមប្រភពព័ត៌មានដដែលនេះ ការលើកឡើងពីលោករដ្ឋមន្ត្រីការបរទេសសិង្ហបុរី ទទួលបានការគាំទ្រពីសមភាគីនៃសមាគមអាស៊ាន។ ក្រុមរដ្ឋមន្ត្រីការបរទេសអាស៊ាន ចាត់ទុកការផ្ដល់សេរីភាពសម្រាប់អ្នកស្រី ស៊ូជី បើពួកយោធាអាចធ្វើបាន គឺជាការបង្រួបបង្រួមជាតិភូមា ដំណាក់កាលដំបូង។

អ្នកស្រី ស៊ូជី ត្រូវបានឃុំខ្លួនភ្លាមៗនៅថ្ងៃទី១ ខែកុម្ភៈ ឆ្នាំ២០២១ ជាថ្ងៃរដ្ឋប្រហាររបស់ពួកយោធា ដែលផ្ដួលរំលំរដ្ឋាភិបាលប្រជាធិបតេយ្យដឹកនាំដោយគណបក្សសម្ព័ន្ធជាតិដើម្បីប្រជាធិបតេយ្យ ដែលអ្នកស្រី ស៊ូជី ជាប្រធានបក្ស។ អ្នកស្រី ស៊ូជី មានអាយុ ៧៩ឆ្នាំ។ អ្នកស្រីប្រឈមមុខនឹងការជាប់ទោសដែលរបបសឹកទម្លាក់លើអ្នកស្រីរយៈ ២៧ឆ្នាំ ក្នុងបទចោទក្បត់ជាតិ និងទទួលប្រាក់សំណូក ដែលសហគមន៍អន្តរជាតិចាត់ទុកថារឿងគំនុំនយោបាយ។

រដ្ឋមន្ត្រីការបរទេសសិង្ហបុរី លោក Vivian Balakrishnan បានសង្កត់ធ្ងន់ថា ការចរចាដែលភាគីពាក់ព័ន្ធទាំងអស់ចូលរួមជជែកគ្នា នឹងនាំឱ្យប្រទេសភូមា អាចរកឃើញដំណោះស្រាយ និងការបង្រួបបង្រួមជាតិឡើងវិញ ប៉ុន្តែមេដឹកនាំរបបសឹកអះអាងថា ខ្លួនជាអ្នកការពារប្រជាធិបតេយ្យដែលពិតណាស់ចង់ធ្វើឱ្យប្រទេសជាតិមានការឯកភាពជាតិឡើងវិញ។

មេដឹកនាំយោធាវាយប្រហារពួកបស្ចិមប្រទេសដោយចោទថាជាការរុញឱ្យកម្លាំងប្រឆាំងងើបឡើងកាន់អាវុធប្រឆាំងនឹងរដ្ឋាភិបាលយោធា។ មេដឹកនាំយោធាកំពុងកាន់អំណាចនៅប្រទេសភូមា ឧត្ដមសេនីយ៍ មីន អ៊ុងឡាំង (Min Aung Hlaing) ដែលលើកខ្លួនឯងជានាយករដ្ឋមន្ត្រី បាននិយាយថា រដ្ឋាភិបាលយោធាកំពុងកាន់អំណាចជាបណ្ដោះអាសន្នក្នុងគោលបំណងពង្រឹងលទ្ធិប្រជាធិបតេយ្យ បន្តផែនការរៀបចំការបោះឆ្នោតដែលប្រកបដោយយុត្តិធម៌ ដោយត្រឹមត្រូវ ផ្ទេរអំណាចទៅរដ្ឋាភិបាលស៊ីវិល។

ពួកយោធាភូមា កំពុងបាត់បង់ទីតាំងធំៗជាបន្តបន្ទាប់ចាប់តាំងពីសម្ព័ន្ធភាពនៃចលនាប្រដាប់អាវុធជនជាតិភាគតិច បានរួមផ្តុំកម្លាំងគ្នាបើកយុទ្ធនាការវាយលុកទ្រង់ទ្រាយធំតាំងពីចុងឆ្នាំ២០២២ ដោយចាប់យកបានទីប្រជុំជន និងទីតាំងជាច្រើនរបស់ពួកយោធា។

លោក Min Aung Hlaing ថាប្រហែលជាមិនអាចទៅរួចទេក្នុងការរៀបចំការបោះឆ្នោតនៅទូទាំងប្រទេស ដោយសារតែអស្ថិរភាព និងសង្គ្រាមបង្កឡើងដោយក្រុមប្រឆាំង។

ប្រទេសភូមា ក្នុងតំបន់អាស៊ីអាគ្នេយ៍កំពុងធ្លាក់ក្នុងសង្គ្រាមស៊ីវិលដ៏ធ្ងន់ធ្ងរ ចាប់តាំងពីពួកយោធាធ្វើរដ្ឋប្រហារនៅថ្ងៃទី១ ខែកុម្ភៈ ឆ្នាំ២០២១ ជាពិសេសចាប់តាំងពីខែតុលា ឆ្នាំ២០២៣ ដែលក្រុមប្រឆាំងរួបរួមនឹងកម្លាំងតស៊ូដើម្បីប្រជាធិបតេយ្យ បានធ្វើសកម្មភាពវាយយកទីក្រុង និងទីប្រជុំជនជាង ៥០នៅទូទាំងប្រទេស ហើយចាប់ខ្លួនទាហានកងទ័ពរបបសឹកច្រើនពាន់នាក់។

អ្នករាយការណ៍ពិសេសនៃអង្គការសហប្រជាជាតិប្រចាំប្រទេសភូមា លោក Tom Andrews បាននិយាយថា របបសឹកនឹងបន្តបាត់បង់ទីតាំងឈរជើងរបស់ពួកគេបន្តទៀត ព្រោះកូនទាហានដូចជាលែងចង់កាន់អាវុធទៀតហើយ។ ដូចគ្នានេះ ការដែលយុវជនច្រើនពាន់នាក់មិនស្ម័គ្រចិត្តចូលបម្រើកងទ័ព នឹងធ្វើឱ្យរបបសឹកមិនច្បាស់លាស់នៃការពង្រឹងទីតាំងមូលដ្ឋានឈរជើងរបស់ខ្លួន។

របបសឹកភូមា កំពុងធ្វើដំណើរចូលឆ្នាំទី៤ ដែលនៅសល់ប៉ុន្មានសប្ដាហ៍ទៀតនេះ។ បើតាមសេចក្តីរាយការណ៍ពីភ្នាក់ងារជនភៀសខ្លួននៃអង្គការសហប្រជាជាតិ ប្រជាពលរដ្ឋភូមា ប្រមាណជាង ៣លាននាក់បានរត់ចោលភូមិ និងសហគមន៍របស់គេ ដោយសារតែតំបន់ដែលពួកគេរស់នៅកំពុងធ្លាក់ក្នុងសង្គ្រាមប្រយុទ្ធគ្នា៕