អតិថិជនដែលចាញ់បោកគម្រោងដីឡូត៍ ៦A រាប់ពាន់នាក់ គ្រោងធ្វើកូដកម្មដុតកង់ឡាននៅខាងមុខខ្លោងទ្វារបុរី នៅថ្ងៃទី១៩ ខែមករា ឆ្នាំ២០២៥ ខាងមុខនេះ ក្នុងបំណងទាមទារឱ្យឧកញ៉ា ឡេង ណាវ៉ាត្រា ចេញមុខដោះស្រាយសំណង ដីខ្យល់ និងផ្ទះខ្យល់ ដែលឧកញ៉ារូបនេះបានលក់ឱ្យពួកគេអស់ជាច្រើនឆ្នាំកន្លងមក។
អតិថិជនដែលបានចាញ់បោកគម្រោងអចលនទ្រព្យ ៦A របស់ឧកញ៉ា ឡេង ណាវ៉ាត្រា ជាច្រើនពាន់នាក់ ប្រាប់សារព័ត៌មាន The Cambodia Daily ជាបន្តបន្ទាប់នៅថ្ងៃទី១០ មករា នេះថា ពួកគេគ្រោងនឹងធ្វើកូដកម្មដោយការដុតកង់ឡាននៅមុខខ្លោងទ្វារបុរី ព្រមទាំងថតផ្សាយផ្ទាល់ដាក់តាមបណ្ដាញសង្គមនានា ដូចជា ហ្វេសប៊ុក (Facebook) និងតិកតុក (TikTok) ជាដើម ដើម្បីឱ្យឧកញ៉ា ឡេង ណាវ៉ាត្រា ចេញមុខដោះស្រាយដោយផ្ទាល់ជុំវិញការបោកប្រាស់នេះ។
ប្រភពដដែលបញ្ជាក់ថា ពួកគេនឹងថតវីដេអូផ្សាយផ្ទាល់ក្នុងបុរីតាមប្លង់ (ប្លុក) នីមួយៗ ដូចជា ប្លុក A ប្លុក B និង ប្លុក C ជាដើម ដោយសារតែម្ចាស់គម្រោង គឺអ្នកឧកញ៉ា ឡេង ណាវ៉ាត្រា បានសន្យាខ្យល់ជាមួយពួកគេរាប់ឆ្នាំកន្លងមក ហើយមកដល់ពេលនេះ ឧកញ៉ា ឡេង ណាវ៉ាត្រា នៅតែបន្តគេចវេះមិនចេញមុខដោះស្រាយដដែល។
ការអះអាងនេះ ធ្វើឡើងស្របពេលដែលពលរដ្ឋក្រីក្រជាច្រើនបានចាញ់បោកក្នុងគម្រោងអចលនទ្រព្យរបស់ឧកញ៉ា ឡេង ណាវ៉ាត្រា ស្ទើរតែ ២៥ខេត្ត-ក្រុងទៅហើយក្នុងគម្រោងលក់ដីខ្យល់ និងផ្ទះខ្យល់របស់ឧកញ៉ារូបនោះ។
ទាក់ទិនទៅនឹងបញ្ហានេះ អតីតអ្នកឧកញ៉ា ហេង សិទ្ធី បានសរសេរលើគណនីហ្វេសប៊ុករបស់ខ្លួនកាលពីថ្ងៃទី៧ ខែមករា នេះថា ការដែលអ្នកឧកញ៉ា ឡេង ណាវ៉ាត្រា លក់ដីខ្យល់ និងផ្ទះខ្យល់ឱ្យពលរដ្ឋ ដោយសារតែគាត់ធ្វើតាមបញ្ជារបស់លោក ហ៊ុន តូ តែប៉ុណ្ណោះ។
លោក ហេង សិទ្ធី អំពាវនាវឱ្យឧកញ៉ា ឡេង ណាវ៉ាត្រា យកលុយដែលគាត់បានអួតអាងទាំងប៉ុន្មានទៅសងពលរដ្ឋដែលមិនទាន់ទទួលបានដី និងផ្ទះ ក្រោយទិញអចលនទ្រព្យពីគម្រោងរបស់ឧកញ៉ារូបនេះនាពេលកន្លងមកនោះ។
អ្នកឧកញ៉ា ឡេង ណាវ៉ាត្រា ត្រូវគេសង្ស័យថាជាឧកញ៉ាលក់ដីឡូត៍ ផ្ទះល្វែងឱ្យក្រុមគ្រួសារត្រកូលហ៊ុន ព្រោះថាសូម្បីតែមេគ្រួសារត្រកូលហ៊ុនដ៏មានអំណាចបំផុតនៅកម្ពុជា គឺលោក ហ៊ុន សែន ក៏ធ្លាប់ចេញមុខការពារទង្វើអាក្រក់របស់ឧកញ៉ារូបនេះដែរ។ ជាក់ស្តែង កាលពីអំឡុងខែសីហា ឆ្នាំ២០២២ ក្នុងពិធីជួបសំណេះសំណាលជាមួយពលរដ្ឋក្នុងវេទិកាមួយ បន្ទាប់ពីមានការស្នើសុំឱ្យចាប់ខ្លួនឧកញ៉ា ឡេង ណាវ៉ាត្រា ពាក់ព័ន្ធនឹងការកាប់បំផ្លាញព្រៃឈើនៅឧទ្យានសួនសត្វភ្នំតាម៉ៅ លោក ហ៊ុន សែន បានអះអាងថា បើចង់ឱ្យលោកចាប់ម្ចាស់ក្រុមហ៊ុនដែលកាប់បំផ្លាញព្រៃឈើភ្នំតាម៉ៅ ដាក់គុក គឺមានតែចាប់រូបលោកដាក់គុកតែម្តងទៅ។
ក្រៅពីចេញមុខការពារឧកញ៉ា ឡេង ណាវ៉ាត្រា ជុំវិញការកាប់បំផ្លាញព្រៃឈើភ្នំតាម៉ៅ លោក ហ៊ុន សែន ក៏បានចេញមុខការពារឧកញ៉ារូបនេះម្តងទៀតជុំវិញការរំលោភកិច្ចសន្យាមិនប្រគល់ដី និងផ្ទះជូនអតិថិជនដែលបានទិញដីឡូត៍ និងផ្ទះល្វែងពីក្រុមហ៊ុនរបស់គាត់នាពេលកន្លងមកដែរ។
លោក ហ៊ុន សែន ធ្លាប់បានអះអាងកាលពីអំឡុងឆ្នាំ២០២៤ ថា លោកក៏បានដឹងពីការយឺតយ៉ាវរបស់ក្រុមហ៊ុនឧកញ៉ា ឡេង ណាវ៉ាត្រា ក្នុងការប្រគល់ផ្ទះដល់អតិថិជនដែរ ប៉ុន្តែដោយសារក្រុមហ៊ុននេះបានកប់ទុនលើដីច្រើនពេក។
លោក ហ៊ុន សែន បញ្ជាក់ថា លោកពិតជាដឹងពីការលក់ផ្ទះឱ្យអតិថិជនរបស់ក្រុមហ៊ុនឧកញ៉ា ឡេង ណាវ៉ាត្រា ខុសកិច្ចសន្យា ប៉ុន្តែឧកញ៉ា ឡេង ណាវ៉ាត្រា មិនទាន់ក្ស័យធននោះទេ។
យ៉ាងណាក៏ដោយ រហូតដល់ពេលនេះ អតិថិជនរងគ្រោះជាច្រើនបានអះអាងថា ក្នុងកិច្ចសន្យាសាងសង់ផ្ទះរបស់ពួកគេជាមួយក្រុមហ៊ុនឧកញ៉ា ឡេង ណាវ៉ាត្រា គឺមានរយៈពេលត្រឹមតែ ១៦ខែប៉ុណ្ណោះ នោះពួកគេនឹងទទួលបានផ្ទះចូលទៅរស់នៅតែម្តង។ ប៉ុន្តែជាអកុសល រហូតដល់ពេលនេះ គឺហួសកិច្ចសន្យា ៤ឆ្នាំហើយ ពួកគេនៅតែមិនទាន់ទទួលបានផ្ទះទៀត ខណៈឧកញ៉ា ឡេង ណាវ៉ាត្រា ព្យាយាមគេចវេះមិនចេញមុខដោះស្រាយទាល់តែសោះ៕
© 2025, ឌឹ ខេមបូឌា ដេលី. All rights reserved.