អាជ្ញាធរជាតិអប្សរា អំពាវនាវឲ្យសាធារណជនទាំងអស់បញ្ឈប់ការផ្តល់ចំណី ចៀសវាងប៉ះពាល់ ឬលេងជាមួយសត្វស្វានៅក្នុងតំបន់អង្គរ ដោយសារតែស្វាមានចរិតកាច និងបង្កជារបួសស្នាមទៅដល់ភ្ញៀវទេសចរ។
យោងតាមសេចក្ដីប្រកាសព័ត៌មានចេញផ្សាយនៅថ្ងៃទី៤ ខែកុម្ភៈ នេះ អាជ្ញាធរជាតិអប្សរា ឲ្យដឹងថា រយៈកាលថ្មីៗនេះ ចំនួនសត្វស្វានៅក្នុងតំបន់រមណីយដ្ឋានអង្គរមានការកើនឡើងគួរឱ្យកត់សម្គាល់។ បច្ចុប្បន្ន តាមរយៈការផ្តល់ចំណីជាប្រចាំពីក្រុមបុគ្គលមួយចំនួនតូចក្នុងគោលបំណងផលិតមាតិកាជាប្រយោជន៍ផ្ទាល់ខ្លួន បានផ្លាស់ប្ដូរទម្លាប់រស់នៅបែបធម្មជាតិនៃសត្វស្វា ពីសត្វព្រៃ ទៅជាសត្វស្រុក ដែលមានចរិតកាច ចេះដណ្ដើមចំណី និងឈានរហូតដល់ការបង្កជារបួសស្នាមទៅលើមនុស្ស ជាដើម។
អាជ្ញាធរជាតិអប្សរា បានទទូចដល់សាធារណជន ភ្ញៀវទេសចរជាតិ-អន្តរជាតិ មគ្គុទ្ទេសក៍ទេសចរណ៍ និងប្រតិបត្តិករវិស័យទេសចរណ៍ក្នុងខេត្តសៀមរាប ទាំងអស់ ផ្សព្វផ្សាយនូវខ្លឹមសារនេះ ក៏ដូចជាណែនាំ និងបញ្ឈប់នូវសកម្មភាពណាមួយដែលអាចនាំមកនូវបញ្ហាបង្កឡើងដោយសត្វស្វាជាយថាហេតុ។
ប្រភពដដែលអះអាងថា អាជ្ញាធរជាតិអប្សរាធ្វើការជាមួយស្ថាប័នជំនាញនានានៃក្រសួងកសិកម្ម រុក្ខាប្រមាញ់ និងនេសាទ រដ្ឋបាលព្រៃឈើ និងមន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប ដើម្បីស្វែងរកដំណោះស្រាយក្នុងពេលឆាប់ៗខាងមុខនេះ។
អាជ្ញាធរជាតិអប្សរា បានឲ្យដឹងថា នៅតំបន់ក្រុងអង្គរធំឯណោះវិញ សត្វស្វាក៏កំពុងបង្កការរំខាន និងហានិភ័យដល់ភ្ញៀវទេសចរ ក៏ដូចជាថ្មប្រាសាទផងដែរ។ ក្រៅពីនេះ សត្វស្វាដែលតែងមានចរិតរពឹស ចេះរត់តោងរថយន្ត និងធ្វើឱ្យបាក់កញ្ចក់ និងបាក់ផ្លិតរថយន្ត។
យោងតាមច្បាប់ស្ដីពីព្រៃឈើ មាត្រា៤៨ ចែងថា ពពួកសត្វព្រៃគ្រប់ប្រភេទនៅក្នុងព្រះរាជាណាចក្រកម្ពុជា ជាទ្រព្យសម្បត្តិរបស់រដ្ឋ និងជាសមាសភាគនៃធនធានព្រៃឈើ មានដូចជា ពពួកថនិកសត្វ ឬសត្វបំបៅទឹកដោះ បក្សីបក្សា ឧរង្គសត្វ ឬសត្វលូន/វារ ថលជលិកសត្វ ឬសត្វរស់ក្នុងទឹកផង លើគោកផង បាណកសត្វ ឬសត្វដង្កូវ កណ្តូប។ល។ និងសត្វឥតឆ្អឹងកងផ្សេងៗទៀត ព្រមទាំងពង និងកូនរបស់វា៕
© 2025, ឌឹ ខេមបូឌា ដេលី. All rights reserved.