នាយករដ្ឋមន្ត្រីខ្មែរ លោក ហ៊ុន ម៉ាណែត ប្ដេជ្ញាថានឹងប្រកាន់ខ្ជាប់នូវគោលនយោបាយការបរទេសឯករាជ្យ អព្យាក្រឹតជាអចិន្ត្រៃយ៍ និងមិនចូលបក្សសម្ព័ន្ធ ដោយផ្អែកលើរដ្ឋធម្មនុញ្ញរបស់ខ្លួន និងផលប្រយោជន៍ស្នូលសម្រាប់ជាតិ។
ក្រសួងការបរទេស និងសហប្រតិបត្តិការអន្តជាតិ នៅថ្ងៃទី១០ មីនា នេះ បានចេញសេចក្តីប្រកាសព័ត៌មានជុំវិញការលើកឡើងពីនាយករដ្ឋមន្ត្រី លោក ហ៊ុន ម៉ាណែត ដែលថ្លែងក្នុងពិធីបិទសន្និបាតបូកសរុបលទ្ធផលការងារឆ្នាំ២០២៤ នៃក្រសួងការបរទេស កាលពីថ្ងៃទី៥ ខែមីនា ឆ្នាំ២០២៥ នេះថា ប្រទេសកម្ពុជានៅតែបន្តប្រកាន់ខ្ជាប់នូវគោលនយោបាយការបរទេសឯករាជ្យ ដោយផ្អែកលើគោលការណ៍នៃច្បាប់អន្តរជាតិ និងធម្មនុញ្ញអង្គការសហប្រជាជាតិ។
លោក ហ៊ុន ម៉ាណែត លើកឡើងថា ដើម្បីធ្វើឱ្យប្រសើរឡើងថែមទៀតលើវិស័យការទូត ប្រទេសកម្ពុជាត្រូវតែធ្វើឱ្យស៊ីជម្រៅនូវទំនាក់ទំនងទ្វេភាគីដែលមានស្រាប់ និងពង្រីកទំនាក់ទំនងស្និទ្ធស្នាលជាមួយប្រជាជាតិទាំងអស់ ជាដើម។ ជាងនេះទៀត ត្រូវពង្រឹងអព្យាក្រឹតរបស់អាស៊ាន តាមរយៈការពង្រឹងឯកភាព និងតួនាទីស្នូល។ លើសពីនេះ ត្រូវលើកកម្ពស់ការទូតសេដ្ឋកិច្ច និងវប្បធម៌ ដើម្បីពង្រីកវត្តមានរបស់កម្ពុជានៅលើទីផ្សារពិភពលោក រួមទាំងចូលរួមការប្រយុទ្ធប្រឆាំងនឹងព័ត៌មានមិនពិត និងត្រូវពង្រឹងសមត្ថភាពផ្នែកការទូតរបស់កម្ពុជាបន្ថែមទៀតផងដែរ។
នាយករដ្ឋមន្ត្រីរូបនេះបញ្ជាក់ថា ប្រទេសកម្ពុជាត្រូវតែពង្រឹងគោលនយោបាយការបរទេស និងការប្រាស្រ័យទាក់ទងជាយុទ្ធសាស្ត្រ ដើម្បីពង្រឹងភាពធន់របស់ខ្លួនក្នុងការការពារផលប្រយោជន៍ស្នូលរបស់ជាតិ រួមមានឯករាជ្យ អធិបតេយ្យភាព បូរណភាពទឹកដី សន្តិភាព និងឯកភាពជាតិ រួមទាំងការចម្រើនផ្នែកសង្គម-សេដ្ឋកិច្ចផងដែរ។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី១០ មីនា នេះថា បើគណបក្សប្រជាជនកម្ពុជាដឹកនាំប្រទេសដោយប្រកាន់ខ្ជាប់នូវគោលនយោបាយការបរទេសឯករាជ្យ អព្យាក្រឹតមែន ម្ល៉េះប្រជាធិបតេយ្យរបស់កម្ពុជាដែលមានចែងក្នុងរដ្ឋធម្មនុញ្ញ និងកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ មិនធ្លាក់ដុនដាបដូចសព្វថ្ងៃនេះទេ។
លោក ម៉ែន ណាត លើកឡើងថា គោលនយោបាយរបស់មេដឹកនាំបក្សកាន់អំណាច កំពុងស្ថិតក្រោមឥទ្ធិពលរបស់វៀតណាម និងចិន ដូច្នេះទោះលោក ហ៊ុន ម៉ាណែត អះអាងពីឯករាជ្យ អព្យាក្រឹតយ៉ាងណាក៏ដោយ ក៏ប្រទេសសេរីប្រជាធិបតេយ្យនានាមិនជឿជាក់លើកម្ពុជាឡើយ។
លោកបន្តថា ស្ថិតក្រោមវៀតណាម គឺដោយសារអំណាចដឹកនាំដែលលោក ហ៊ុន ម៉ាណែត ត្រូវការគាំទ្រពីវៀតណាម ដើម្បីឡើងកាន់តំណែងជាប្រធានបក្សប្រជាជនកម្ពុជាបន្តពីលោក ហ៊ុន សែន ចំណែកឯការស្ថិតនៅក្រោមចិន ពីព្រោះពួកគេត្រូវការខ្ចីលុយចិន ដើម្បីចិញ្ចឹមអំណាចរបស់ខ្លួន។
ទាក់ទិននឹងបញ្ហានេះ លោក ហ៊ុន សែន ធ្លាប់បានអះអាងចំពោះប្រធានាធិបតីសាធារណរដ្ឋប្រជាមានិតចិន លោក ស៊ី ជីនពីង កាលពីពេលកន្លងទៅថា ការកសាងសន្តិភាព ស្ថិរភាព និងការអភិវឌ្ឍលើគ្រប់វិស័យនៅកម្ពុជា អាចកើតឡើងបានដោយអាស្រ័យលើការគាំទ្រឥតឈប់ឈររបស់ចិន ហើយលោកបានចាត់ទុកចិន ជាមិត្តតែមួយយ៉ាងជិតស្និទ្ធបំផុតរបស់កម្ពុជាផងដែរ។
លោក ហ៊ុន សែន បញ្ជាក់ជំហររបស់ខ្លួនទៅកាន់ប្រទេសក្នុងតំបន់អាស៊ី និងមហាអំណាចពិភពលោកដទៃទៀត ដូចជា អាមេរិក ជាដើម ថាបើប្រទេសកម្ពុជាមិនបានពឹងមហាអំណាចកុម្មុយនីស្តចិនទេ ប្រទេសកម្ពុជាក៏មិនមានការរីកចម្រើនដូចសព្វថ្ងៃនេះដែរ ហើយបើមិនឱ្យខ្មែរទៅពឹងចិន តើឱ្យកម្ពុជាទៅពឹងបរទេសមួយណា?
យ៉ាងណាមិញ ការប្រកាសក្ដែងៗឲ្យអន្តរជាតិឮថារាជាណាចក្រកម្ពុជា ជាប្រទេសឯករាជ្យ អព្យាក្រឹត មិនចូលបក្សសម្ព័ន្ធនោះ គេធ្លាប់ឮតាំងពីដើមចុងទសវត្ស១៩៥០ មកម្ល៉េះ។
ទ័ពព្រៃយៀកមិញ ថាចេញអស់ក្រោយពីមានកិច្ចព្រមព្រៀងទីក្រុងហ្សឺណែវ នាឆ្នាំ១៩៥៤។ ឆ្នាំ១៩៦០ ចូលមកវិញកាន់តែច្រើនជាងមុន ប៉ុន្តែមានឈ្មោះផ្សេង គឺយៀកកុង។ ឆ្នាំ១៩៧៣ ទ័ពព្រៃយៀកណាមខាងជើង និងយៀកកុង ថាចេញអស់តាមកិច្ចព្រមព្រៀងក្រុងប៉ារីស ប៉ុន្តែកប់អាវុធទុកក្នុងដីខ្មែរ។ ឆ្នាំ១៩៨៩ ថាចេញអស់ទៀត ប៉ុន្តែនៅថែរក្សាដីសម្បទានស្លៀកពាក់ទាហានផង ស៊ីវិលផង។
ឥឡូវនេះ ទាហានយៀកណាម ក៏មាន ទាហានចិន ក៏មាន លាយឡំបញ្ចូលគ្នាក្នុងកងកម្លាំងប្រដាប់អាវុធខ្មែរ ហើយនៅតែបន្តឃោសនាបំពងថា ស្រុកខ្មែរឯករាជ្យ អព្យាក្រឹត មិនចូលបក្សសម្ព័ន្ធ៕
© 2025, ឌឹ ខេមបូឌា ដេលី. All rights reserved.