អគ្គស្នងការនគរបាលជាតិអះអាងថា នគរបាលខេត្តបន្ទាយមានជ័យ ចាប់ខ្លួនជនជាតិថៃ សរុបចំនួន ៦៣នាក់ពាក់ព័ន្ធនឹងករណីលួចលាក់ប្រព្រឹត្តបទល្មើសឆបោកតាមប្រព័ន្ធអនឡាញនៅក្រុងប៉ោយប៉ែត ខេត្តបន្ទាយមានជ័យ ហើយសមត្ថកិច្ចកម្ពុជានឹងបណ្តេញពួកគេចេញដោយបញ្ជូនទៅឲ្យអាជ្ញាធរថៃ។
សេចក្តីប្រកាសរបស់អគ្គស្នងការនគរបាលជាតិ ចេញផ្សាយកាលពីថ្ងៃទី២៥ ខែមីនា បានឲ្យដឹងថា គណៈបញ្ជាការដឹកនាំស្រាវជ្រាវ ស៊ើបអង្កេត និងបង្ក្រាបបទល្មើសគ្រប់ប្រភេទ បានចុះបង្ក្រាបទីតាំងពីរកន្លែងដែលលួចលាក់ប្រព្រឹត្តបទល្មើសតាមប្រព័ន្ធអនឡាញនៅក្រុងប៉ោយប៉ែត។ ករណីនេះ សមត្ថកិច្ចបង្ក្រាបកាលពីថ្ងៃទី២២ ខែមីនា បន្ទាប់ពីបានស៊ើបអង្កេតស្រាវជ្រាវ និងឃ្លាំមើលទីតាំងមួយនេះអស់មួយរយៈកន្លងមក។
ក្នុងប្រតិបត្តិការនេះ សមត្ថកិច្ចបានឃាត់ខ្លួនជនជាតិថៃ ចំនួន ៦៣នាក់ ក្នុងនោះមានកុមារ ២នាក់ ហើយរកឃើញសម្ភារៈជាកុំព្យូទ័រចំនួន ៣៣គ្រឿង និងទូរសព្ទដៃចំនួន ៦៥គ្រឿង ដែលប្រើសម្រាប់ប្រព្រឹត្តបទល្មើសអនឡាញខុសច្បាប់។ ក្រៅពីនេះ មានអត្តសញ្ញាណប័ណ្ណថៃ ចំនួន ៦៥ច្បាប់ និងលិខិតឆ្លងដែនចំនួន ២ច្បាប់ថែមទៀត។
ប្រភពដដែលឲ្យដឹងទៀតថា ជនជាតិថៃ ទាំង ៦៣នាក់ដែលបានឃាត់ខ្លួន សមត្ថកិច្ចកម្ពុជាបានរកឃើញថាមានមនុស្សចំនួន ១០នាក់កំពុងធ្វើសកម្មភាពរៀបចំមធ្យោបាយដើម្បីប្រព្រឹត្តបទល្មើសឆបោកដោយស្ម័គ្រចិត្ត និង ៤៦នាក់ទៀត កំពុងរស់នៅក្នុងស្ថានភាពបិទសិទ្ធិសេរីភាពដើរហើរ។
សមត្ថកិច្ចក៏កំណត់បានមេខ្លោងចំនួន ៧នាក់ដែរក្នុងចំណោម ៦៣នាក់។ ពាក់ព័ន្ធនឹងករណីនេះ សមត្ថកិច្ចកម្ពុជានឹងស្នើសុំកិច្ចសហការជាមួយនគរបាលថៃ ដើម្បីសម្របសម្រួលរៀបចំបណ្ដេញពួកគេចេញពីកម្ពុជាចំនួន ៥៦នាក់។ ចំណែក ៧នាក់ទៀត ដែលជាមេខ្លោងនោះ ប៉ូលិសកម្ពុជានឹងបន្តនីតិវិធីដោះស្រាយ និងស្រាវជ្រាវបន្ថែមនៅខេត្តបន្ទាយមានជ័យ។
កាលពីថ្ងៃទី២២ ខែកុម្ភៈ កន្លងទៅ សមត្ថកិច្ចថៃ រួមជាមួយមន្ត្រីនគរបាលកម្ពុជាបានបើកប្រតិបត្តិការបង្ក្រាបទីតាំងមជ្ឈមណ្ឌលឆបោកអនឡាញមួយកន្លែងក្នុងក្រុងប៉ោយប៉ែត ដោយរំដោះបានជនបរទេសចំនួន ២១៥នាក់ ក្នុងនោះមាន ១១៩នាក់ជាជនជាតិថៃ។ ក្នុងចំណោមជនជាតិថៃ ទាំង ១១៩រូបដែលកម្ពុជាបញ្ជូនឲ្យភាគីថៃ មាន ១៥នាក់ត្រូវបានតុលាការថៃ ចេញដីកាចាប់ខ្លួនដោយចោទប្រកាន់ពីបទរៀបចំសកម្មភាពឆបោកតាមប្រព័ន្ធអនឡាញនៅក្នុងក្រុងប៉ោយប៉ែត ប្រទេសកម្ពុជា។
រហូតមកទល់ពេលនេះ មានជនជាតិថៃ យ៉ាងតិចជាង ២០០នាក់ត្រូវបានសមត្ថកិច្ចកម្ពុជាឃាត់ខ្លួន និងបញ្ជូនឲ្យអាជ្ញាធរថៃ ក្នុងបទល្មើសឆបោកតាមប្រព័ន្ធអនឡាញនៅតំបន់ព្រំដែនកម្ពុជា-ថៃ ជាពិសេសនៅក្រុងប៉ោយប៉ែត។
ការរឹតបន្តឹងវិធានការក្តៅរបស់អាជ្ញាធរខ្មែរ និងថៃ ធ្វើឡើងបន្ទាប់ពីភាគីថៃ បានស្នើសុំកម្ពុជាឲ្យសហការបង្ក្រាបបទល្មើសឆបោកអនឡាញតាមតំបន់ព្រំដែននៃប្រទេសទាំងពីរ។
ក្រុមអ្នកឃ្លាំមើលនិយាយថា បទល្មើសអនឡាញកំពុងរីករាលដាលនៅអាស៊ី ដោយទីក្រុងឆបោកតាមអនឡាញដ៏ធំមួយត្រូវបានគេរកឃើញថាមានទីតាំងនៅប្រទេសភូមា ជាប់ព្រំដែនថៃ។ ចំណែកនៅកម្ពុជា មិនអាចលុបបំបាត់បទល្មើសអនឡាញបានទេ ព្រោះបទល្មើសទាំងនេះមិនមែនត្រឹមតែឧក្រិដ្ឋជនធម្មតាជាអ្នកប្រព្រឹត្តទេ គឺមន្ត្រីជាន់ខ្ពស់ក្នុងជួររដ្ឋាភិបាលជាអ្នកនៅពីក្រោយអំពើខុសច្បាប់នេះតែម្តង៕
© 2025, ឌឹ ខេមបូឌា ដេលី. All rights reserved.