កម្ពុជាអាចនឹងក្លាយជាប្រទេសមានមនុស្សចាស់ច្រើននៅឆ្នាំ២០៥០ មុនពេលក្លាយជាប្រទេសមានប្រាក់ចំណូលខ្ពស់

ឌឹ ខេមបូឌា ដេលី

1 year ago

រដ្ឋមន្ត្រីក្រសួងសុខាភិបាល បញ្ជាក់ថា កម្ពុជាអាចក្លាយជាប្រទេសមានមនុស្សចាស់ច្រើននៅក្នុងឆ្នាំ២០៥០ មុនពេលដែលប្រទេសនេះក្លាយជាប្រទេសមានប្រាក់ចំណូលខ្ពស់នៅឆ្នាំ២០៥០ ដែលទាមទារឲ្យមានគោលនយោបាយច្បាស់លាស់ ដើម្បីឆ្លើយតបទៅនឹងតម្រូវការរបស់ពួកគាត់។

រដ្ឋមន្ត្រីក្រសួងសុខាភិបាល លោក ឈាង រ៉ា បានថ្លែងក្នុងសិក្ខាសាលាថ្នាក់តំបន់ស្ដីពី «បម្រែបម្រួលប្រជាសាស្ត្រ និងជំងឺមិនឆ្លង» នៅវិមានរដ្ឋសភា នាព្រឹកថ្ងៃទី៣១ ខែមីនា ថា អត្រាមនុស្សចាស់នៅកម្ពុជាអាចឈានដល់ ២៧% ក្នុងឆ្នាំ២០៥០ ដែលកម្ពុជានឹងស្ថិតក្នុងប្រភេទ «សង្គមមនុស្សចាស់ជរា»។

លោកបន្តថា ការកើនឡើងនេះ ដោយសារតែវឌ្ឍនភាពសង្គម និងសុខភាព អាយុសង្ឃឹមរស់ពីអាយុ ៧០ ដល់ ៧៥ឆ្នាំបានកើនឡើងគួរឱ្យកត់សម្គាល់ក្នុងរយៈពេល ២០ឆ្នាំកន្លងមកនេះ។

លោករដ្ឋមន្ត្រីសុខាភិបាលរូបនេះបន្តថា ពេលនេះ តុល្យភាពប្រជាសាស្ត្រនៅតែអំណោយផល ពីព្រោះមនុស្សវ័យចំណាស់របស់ប្រជាជនកម្ពុជា គឺមិនវិវឌ្ឍឆាប់ពេកនោះទេ បើធៀបទៅនឹងបណ្តាប្រទេសក្នុងតំបន់អាស៊ីដទៃទៀត ក៏ប៉ុន្តែលោកបានព្រមានថា ស្ថានភាពនឹងលំបាក ពីព្រោះអត្រាកំណើតមានត្រឹមតែកម្រិតនៃអត្រាប្រជាជនផ្លាស់ថ្មីនៅឆ្នាំ២០៥០ ប្រសិនបើអត្រាកំណើតមិនប្រែប្រួលទេនោះ។

លោក ឈាង រ៉ា បន្ថែមថា ក្នុងរយៈពេលប៉ុន្មានឆ្នាំខាងមុខទៀត កម្ពុជានឹងប្រឈមមុខនូវបញ្ហាសុខភាពសង្គមពីរ គឺបញ្ហាទីមួយ ការចំណាយលើការព្យាបាលដែលនឹងកើនឡើង ព្រោះមនុស្សចាស់កាន់តែច្រើន នឹងមានជំងឺចម្រុះច្រើនមុខ ឬជំងឺរ៉ាំរ៉ៃដែលតម្រូវឲ្យមានការថែទាំមានរយៈពេលវែង និងចំណាយច្រើន។ បញ្ហាមួយវិញទៀត គឺមូលដ្ឋានធនធានសម្រាប់ការផ្តល់ហិរញ្ញប្បទានកើនឡើងតិចតួច ដោយសារមានអត្រាយុវជនសកម្មតិចជាងមុនក្នុងការរួមចំណែកលើការផ្តល់ហិរញ្ញប្បទានដល់ការចំណាយលើសុខភាព តាមរយៈការបង់ពន្ធ និងវិភាគទានសន្តិសុខសង្គម។

ក្រុមអ្នកឃ្លាំមើលសង្គមលើកឡើងថា បច្ចុប្បន្ននៅកម្ពុជាមានមនុស្សចាស់ក្នុងចំនួនតិចតួចប៉ុណ្ណោះដែលមានទ្រព្យសម្បត្តិ ហើយកូនៗក៏មានជីវភាពធូរធារ ទើបមិនបានខ្វល់ខ្វាយអំពីភ័ព្វវាសនាចុងក្រោយនៃជីវិតរបស់ខ្លួន ប៉ុន្តែសម្រាប់មនុស្សចាស់ភាគច្រើនដែលគ្មានអ្នកទីពឹង ឬកូនចៅក្រីក្រ គឺកំពុងប្រឈមមុខនឹងបញ្ហាជីវិតជាច្រើន ដោយសារតម្រូវការនៅតែមាន ហើយក្រពះក៏នៅតែស្រេកឃ្លាន។

ដោយសារតែស្ថានភាពបែបនេះ បង្ខំឱ្យមនុស្សចាស់ខ្លះនៅតែស្វែងរកការងារធ្វើ ដើម្បីបានកម្រៃប្រចាំថ្ងៃផ្គត់ផ្គង់តម្រូវការរបស់ខ្លួន ដូចជាទៅស៊ីឈ្នួលគេ (បោកខោអាវ កោសខ្យល់ មើលថែក្មេង) ខ្លះដើរដកព្រលិតរំចង់ ចូលព្រៃរកអនុផលព្រៃឈើលក់ ខ្លះក៏ដើរលក់របស់របរកំប៉ិកកំប៉ុក ខ្លះក៏ទៅរស់នៅពឹងអាស្រ័យនៅតាមវត្តអារាម ហើយខ្លះទៀតក៏ដើរសុំទានគេ។

យោងតាមរបាយការណ៍ជំរឿនកាលពីឆ្នាំ២០១៩ កម្ពុជាមានប្រជាជនវ័យចំណាស់ចំនួន ១,៣៨លាននាក់ ឬស្មើ ៨,៩ភាគរយនៃប្រជាជនសរុប ហើយមានការព្យាករថា ចំនួនមនុស្សវ័យចំណាស់នៅកម្ពុជាដែលមានអាយុចាប់ពី ៦០ឆ្នាំឡើង អាចនឹងកើនឡើងរហូតដល់ ១លាន ៥សែននាក់នៅក្នុងឆ្នាំ២០២៥ ខាងមុខ៕