លោក ហ៊ុន ម៉ាណែត អំពាវនាវឱ្យពលរដ្ឋខ្មែរចូលរួមថែរក្សាសន្តិភាពឱ្យបានគង់វង្ស ដើម្បីកុំឱ្យរបបប្រល័យពូជសាសន៍វិលត្រឡប់មកវិញ។
លោក ហ៊ុន ម៉ាណែត បានចេញលិខិតក្នុងខួបលើទី៨ ទិវាជាតិនៃការចងចាំ ២០ឧសភា កាលពីថ្ងៃទី១៦ ដែលត្រូវបានផ្សព្វផ្សាយនៅថ្ងៃទី១៩ ឧសភា នេះថា បើគ្មានសន្តិភាព គឺមានសង្គ្រាម ហើយបើមានសង្គ្រាម នឹងធ្វើឱ្យប្រទេសជាតិកាន់តែក្រីក្រ អសន្តិសុខ គ្មានស្ថិរភាព និងគ្មានការអភិវឌ្ឍ ជាដើម។
លោកអំពាវនាវឱ្យពលរដ្ឋសិក្សាអំពីការឈឺចាប់របស់កម្ពុជាកាលពីអតីតកាល និងរួមគ្នាទប់ស្កាត់របបប្រល័យពូជសាសន៍ ដែលជាប្រវត្តិដ៏ឈឺចាប់បំផុតលើប្រជាជនកម្ពុជា ដោយការកាប់សម្លាប់ ជិះជាន់ និងការធ្វើទារុណកម្មគ្រប់បែបយ៉ាង។
ប្រភពដដែលបញ្ជាក់ថា ទិវាជាតិនៃការចងចាំ បានរួមចំណែកក្នុងការផ្សះផ្សាជាតិ ជំរុញឱ្យមានសុខដុមនីយកម្មក្នុងសង្គមកម្ពុជា និងបានលើកកម្ពស់ការផ្សព្វផ្សាយអំពើឃោរឃៅដែលបានកើតមាននៅក្នុងរបបកម្ពុជាប្រជាធិបតេយ្យ ក៏ដូចជាទប់ស្កាត់ និងបង្ការកុំឱ្យរបបឃោរឃៅ ព្រៃផ្សៃ និងប្រល័យពូជសាសន៍បែបនេះកើតមានឡើងសាជាថ្មីផងដែរ។
កាលពីថ្ងៃទី១៤ ខែកុម្ភៈ ឆ្នាំ២០១៨ រដ្ឋាភិបាលកម្ពុជាចេញអនុក្រឹត្យកំណត់យកថ្ងៃទី២០ ខែឧសភា ជារៀងរាល់ឆ្នាំ ជា «ទិវាជាតិនៃការចងចាំ» ដែលជាថ្ងៃបុណ្យជាតិផ្លូវការមួយ ដើម្បីគោរពដល់វិញ្ញាណក្ខន្ឋដល់អ្នកដែលបានស្លាប់ក្នុងរបបកម្ពុជាប្រជាធិបតេយ្យ និងការប៉ះប៉ូវនូវការឈឺចាប់ផ្លូវចិត្តដល់ជនរងគ្រោះក្នុងសម័យនោះផងដែរ។
ទាក់ទិននឹងបញ្ហានេះ ក្រុមអ្នកសង្កេតការណ៍លើកឡើងថា ពលរដ្ឋខ្មែរដែលបានស្លាប់ក្នុងរបបខ្មែរក្រហម នៅតែមិនទទួលបានយុត្តិធម៌នៅឡើយក្រោមការដឹកនាំរបស់គណបក្សប្រជាជនកម្ពុជា អស់រយៈពេលជាង ៤ទសវត្សរ៍មកនេះ ខណៈជនរងគ្រោះដែលបានស្លាប់ក្រោមការដឹកនាំរបស់លោក ហ៊ុន សែន ក៏មិនដែលទទួលបានយុត្តិធម៌ដូចគ្នាដែរ ទោះអំពើឃាតកម្មទាំងនោះបានកើតតាំងពីជាង ២០ឆ្នាំមុនក៏ដោយ។
ជាក់ស្តែង ករណីឃាតកម្មលើអ្នកស្រី ពិសិដ្ឋ ពីលីកា ការបាញ់សម្លាប់មេដឹកនាំសហជីព លោក ជា វិជ្ជា ការបាញ់សម្លាប់សកម្មជនការពារព្រៃឈើ លោក ឈុត វុទ្ធី ការបាញ់សម្លាប់ព្រះភិក្ខុ សំ ប៊ុនធឿន និងការបាញ់សម្លាប់អ្នកស្រាវជ្រាវការអភិវឌ្ឍសង្គម បណ្ឌិត កែម ឡី ហើយចុងក្រោយនេះ គឺលោក លិម គិមយ៉ា ជាដើម។
ជាងនេះទៀត ការបាញ់សម្លាប់កងទ័ពរាជានិយមរាប់រយនាក់នៅកណ្តាលទីក្រុងភ្នំពេញពីសំណាក់កងទ័ពក្រោមបញ្ជាលោក ហ៊ុន សែន កាលពីឆ្នាំ១៩៩៧ ក៏រដ្ឋាភិបាលខ្មែរមិនទាន់អាចវែកមុខយកឃាតករពិតយកមកផ្ដន្ទាទោសតាមច្បាប់ដែរ រហូតដល់ពេលនេះ។
អ្នកឃ្លាំមើលខ្លះនិយាយថា របបវាលពិឃាតអាចវិលត្រឡប់មកវិញបាន លុះត្រាតែគណបក្សប្រជាជនកម្ពុជាជាអ្នកប្រព្រឹត្ត ពីព្រោះក្រុមមន្ត្រីជាន់ខ្ពស់របស់គណបក្សប្រជាជនកម្ពុជាភាគច្រើន សុទ្ធសឹងតែជាកម្មាភិបាលខ្មែរក្រហមស្រាប់ ជាពិសេសឪពុករបស់លោក ហ៊ុន ម៉ាណែត គឺលោក ហ៊ុន សែន តែម្តង។ ម្យ៉ាងទៀត មានតែគណបក្សប្រជាជនកម្ពុជាទេដែលកំពុងគ្រប់គ្រងអំណាច ហើយមានទាំងកម្លាំងប្រដាប់អាវុធពេញដៃថែមទៅទៀតនោះ៕
© 2025, ឌឹ ខេមបូឌា ដេលី. All rights reserved.