លោក ហ៊ុន សែន ព្រមានថាដើម្បីកុំឱ្យរបប ប៉ុល ពត វិលមកវិញ ទាល់តែពលរដ្ឋគ្រប់រូបការពារសន្តិភាព

ឌឹ ខេមបូឌា ដេលី

1 year ago

លោក ហ៊ុន សែន ប្រធានព្រឹទ្ធសភា និងជាឪពុកបង្កើតរបស់លោកនាយករដ្ឋមន្ត្រី ហ៊ុន ម៉ាណែត

អតីតទាហានខ្មែរក្រហម លោក ហ៊ុន សែន បំភ័យថា ដើម្បីកុំឱ្យរបបប្រល័យពូជសាសន៍វិលត្រឡប់មកវិញបាន លុះត្រាពលរដ្ឋខ្មែរគ្រប់រូបត្រូវចូលរួមថែរក្សាការពារសន្តិភាពឱ្យបានគង់វង្ស។

លោក ហ៊ុន សែន បានសរសេរលើទំព័រហ្វេសប៊ុករបស់ខ្លួននៅថ្ងៃទី២០ ឧសភា នេះថា ទិវាជាតិនៃការចងចាំ គឺជាថ្ងៃរំលឹកដល់វិញ្ញាណក្ខន្ធជនរងគ្រោះជាង ៣លាននាក់ ដែលបានស្លាប់បាត់បង់ជីវិតនៅក្នុងរបបប្រល័យពូជសាសន៍ ប៉ុល ពត។

លោកបញ្ជាក់ថា ពលរដ្ឋខ្មែរភាគច្រើនលើសលប់បានដឹង និងបានយល់ច្បាស់អំពីរឿងរ៉ាវសោកនាដកម្មដ៏ជូរចត់ ដែលបានឆ្លងកាត់ជិត ៣ទសវត្សរ៍ក្នុងភ្នក់ភ្លើងសង្គ្រាម និងទឹកភ្នែក ការកាប់សម្លាប់ ការបំផ្លិចបំផ្លាញ ការជម្លៀសចេញពីទីលំនៅរបស់ខ្លួនដោយបង្ខំ និងការបង្ខំឱ្យធ្វើការដូចសត្វធាតុ ជាដើម។

អតីតទាហានខ្មែរក្រហមរូបនេះបញ្ជាក់ថា ទិវាជាតិនៃការចងចាំ ២០ឧសភា គឺជាថ្ងៃដែលប្រជាជនកម្ពុជាគ្រប់ៗរូបចងចាំមិនអាចបំភ្លេចបានក្នុងរបបកម្ពុជាប្រជាធិបតេយ្យ ឬហៅថា របបប្រល័យពូជសាសន៍ ប៉ុល ពត ដែលជារបបដ៏ឃោរឃៅ និងខ្មៅងងឹត គ្មានសិទ្ធិសេរីភាព គ្មានលទ្ធិប្រជាធិបតេយ្យ និងសូម្បីតែសិទ្ធិរស់រានមានជីវិតដែលជាសិទ្ធិមូលដ្ឋានមានពីកំណើតរបស់មនុស្ស ក៏គ្មានដែរនោះ។

តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ប្រាប់សារព័ត៌មាន The Cambodia Daily នៅថ្ងៃទី២០ ឧសភា នេះថា លោក ហ៊ុន សែន គឺជាជនក្បត់ជាតិឯងដែលបានចូលរួមសម្លាប់ពលរដ្ឋខ្មែរក្នុងសម័យ ប៉ុល ពត ក្នុងឋានៈជាមេទ័ពខ្មែរក្រហមម្នាក់ក្រោមការរៀបចំរបស់គណបក្សកុម្មុយនីស្តកម្ពុជា ដែលមានដើមកំណើតពីវៀតណាម អស់រយៈពេលជាង ២ឆ្នាំ ក្នុងរបបយង់ឃ្នងនោះ។

លោក អ៊ុំ សំអាន លើកឡើងថា លោក ហ៊ុន សែន បានចូលរួមបម្រើរបបខ្មៅងងឹតនេះក្នុងឋានៈជាមេទ័ពខ្មែរក្រហមម្នាក់នៅភូមិភាគបូព៌ា អស់រយៈពេលជាង ២ឆ្នាំ ចាប់ពីឆ្នាំ១៩៧៥ ដល់ពាក់កណ្តាលឆ្នាំ១៩៧៧ ក្នុងនោះ លោក ហ៊ុន សែន ក៏បានកាប់សម្លាប់ពលរដ្ឋស្លូតត្រង់ជាច្រើននាក់ដែរ ជាពិសេសក្នុងចំណោមសហគមន៍ខ្មែរឥស្លាមនៅស្រុកក្រូចឆ្មារ ខេត្តកំពង់ចាម។

លោកបន្តថា ដោយសារតែខ្លាចថ្នាក់លើរបស់ខ្លួនសម្លាប់ លោក ហ៊ុន សែន ក៏បានរត់ទៅប្រទេសវៀតណាម និងសុំឲ្យកងទ័ពវៀតណាម ជួយការពារ រួមទាំងសុំឲ្យយកគាត់ធ្វើជាអ្នកបម្រើរបស់ពួកគេតាំងពីពេលនោះមកថែមទៀត។

ផ្អែកតាមការសិក្សាស្រាវជ្រាវ បង្ហាញថា លោក ហ៊ុន សែន ធ្លាប់បម្រើមេដឹកនាំខ្មែរក្រហម លោក ប៉ុល ពត យ៉ាងស្មោះស្ម័គ្រជិត ៣ឆ្នាំ គឺចាប់ពីឆ្នាំ១៩៧៥ ដល់ឆ្នាំ១៩៧៧។ ត្រង់ចំណុចនេះ គឺបញ្ជាក់ឱ្យឃើញថា ទាំងលោក ហ៊ុន សែន និង ប៉ុល ពត សុទ្ធតែមានបាតដៃប្រឡាក់ឈាមខ្មែរដូចគ្នា៕