មន្ត្រីបក្សប្រឆាំង អំពាវនាវឱ្យពលរដ្ឋទាំងក្នុង និងក្រៅប្រទេស ធ្វើយុទ្ធនាការមិនគាំទ្រការធ្វើវិសោធនកម្មមាត្រា៣៣ នៃរដ្ឋធម្មនុញ្ញដើម្បីដកសញ្ជាតិខ្មែរពីជនជាតិខ្មែរ និងយុទ្ធនាការមិនគាំទ្រការផ្តល់សញ្ជាតិខ្មែរឱ្យជនជាតិវៀតណាម។
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន សរសេរលើទំព័រហ្វេសប៊ុករបស់ខ្លួន នៅថ្ងៃទី៧ កក្កដា នេះថា ដើម្បីលេបត្របាក់ទឹកដីខ្មែរទាំងមូលដោយជោគជ័យ រដ្ឋាភិបាលវៀតណាម បានបញ្ជាឱ្យមេដឹកនាំខ្មែររំលាយពូជសាសន៍ខ្មែរចោលជាបណ្តើរៗតាមរយៈនៃការធ្វើច្បាប់ដកសញ្ជាតិពលរដ្ឋខ្មែរពីកំណើត ដូចអ្វីដែលលោក ហ៊ុន សែន កំពុងធ្វើនាពេលនេះ។
លោក អ៊ុំ សំអាន លើកឡើងថា ការធ្វើវិសោធនកម្មមាត្រា៣៣ នៃរដ្ឋធម្មនុញ្ញ គឺដើម្បីសម្រេចបំណងរបស់មេដឹកនាំវៀតណាម ហូ ជី មិញ ទៅតាមគោលដៅដែលបានកត់ត្រានៅក្នុងផែនការនៃដំណើរឆ្ពោះមកទិសខាងលិច និងដើម្បីឈានទៅបង្កើតជាសហព័ន្ធឥណ្ឌូចិននាពេលអនាគតផងដែរ។
មន្ត្រីបក្សប្រឆាំងរូបនេះ បញ្ជាក់ថា ការដែលរដ្ឋាភិបាលវៀតណាម បញ្ជាឱ្យមេដឹកនាំខ្មែរធ្វើវិសោធនកម្មដកសញ្ជាតិពលរដ្ឋខ្មែរពីកំណើតចំពោះអ្នកណាហ៊ានប្រឆាំងវៀតណាម បែបនេះ គឺដើម្បីកុំឱ្យមានអ្នកប្រឆាំងនឹងរដ្ឋាភិបាលកម្ពុជាដែលផ្តល់សញ្ជាតិខ្មែរឱ្យពលរដ្ឋវៀតណាម បន្តទៀត។
នៅថ្ងៃទី៧ ខែកក្កដា ឆ្នាំ២០២៥ នេះ រដ្ឋសភាបានបើកកិច្ចប្រជុំគណៈកម្មាធិការរដ្ឋសភា ដើម្បីពិនិត្យសំណើរបស់តំណាងរាស្ត្រទាំង ១២៥រូប ដែលបានស្នើសុំរដ្ឋសភាធ្វើវិសោធនកម្មមាត្រា៣៣ នៃរដ្ឋធម្មនុញ្ញ។
ក្រោយកិច្ចប្រជុំនេះ អគ្គលេខាធិការដ្ឋានរដ្ឋសភា បានចេញសេចក្តីប្រកាសព័ត៌មាននៅថ្ងៃដដែលថា បន្ទាប់ពីបានពិនិត្យ និងពិភាក្សា គណៈកម្មាធិការអចិន្ត្រៃយ៍រដ្ឋសភាបានអនុម័តប្រគល់ជូនគណៈកម្មការជំនាញ គឺគណៈកម្មការនីតិកម្ម និងយុត្តិធម៌ ពិនិត្យសិក្សា ហើយធ្វើរបាយការណ៍ជូនគណៈកម្មាធិការអចិន្ត្រៃយ៍រដ្ឋសភាវិញ ខណៈរដ្ឋសភានឹងបើកកិច្ចប្រជុំពិនិត្យលទ្ធផលនៃការពិនិត្យសិក្សារបស់គណៈកម្មការជំនាញនេះ នៅថ្ងៃទី៨ ខែកក្កដា។
ប្រភពដដែល បញ្ជាក់ថា សំណើសុំធ្វើវិសោធនកម្មមាត្រា៣៣ នៃរដ្ឋធម្មនុញ្ញ នឹងត្រូវដាក់ជូនរដ្ឋសភាអនុម័តនៅថ្ងៃទី១១ ខែកក្កដា ខាងមុខនេះ។
ជុំវិញបញ្ហានេះ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ក៏បានអំពាវនាវឱ្យពលរដ្ឋខ្មែរចូលរួមយុទ្ធនាការមិនគាំទ្រការកែច្បាប់ដកសញ្ជាតិខ្មែរពីកំណើតនេះដែរ ព្រោះពលរដ្ឋវៀតណាម ខុសច្បាប់ដែលកំពុងរស់នៅក្នុងប្រទេសកម្ពុជា បែរជាទទួលបានសញ្ជាតិខ្មែរទៅវិញ។
លោក ម៉ែន ណាត បញ្ជាក់ថា ពេលនេះកម្ពុជាកំពុងត្រូវការសាមគ្គីភាព ឯកភាពជាតិ ដើម្បីទប់ទល់បរទេសជិតខាង ជាពិសេសថៃ ដែលកំពុងឈ្លានពានទឹកដីខ្មែរនាពេលនេះ ដូច្នេះការកែប្រែរដ្ឋធម្មនុញ្ញមាត្រា៣៣ គួរត្រូវបានបញ្ឈប់ នោះទើបជាជម្រើសល្អសម្រាប់ជាតិសាសន៍ខ្មែរមួយនគរ។
ចំណែកគណបក្សកែទម្រង់កម្ពុជា បានចេញសេចក្តីថ្លែងការណ៍នៅថ្ងៃទី០៧ កក្កដា នេះ ដោយប្រកាសមិនគាំទ្រចំពោះការស្នើសុំធ្វើវិសោធនកម្មមាត្រា៣៣ នៃរដ្ឋធម្មនុញ្ញដើម្បីដកសញ្ជាតិខ្មែរពីកំណើតនេះដែរ។
គណបក្សកែទម្រង់កម្ពុជា យល់ឃើញថា ការកែច្បាប់នេះនឹងរឹតតែបន្ថែមនូវការបែកបាក់ជាតិ ការរើសអើង និងបន្តនូវវប្បធម៌ «ទឹកឡើងត្រីស៊ីស្រមោច ទឹកហោចស្រមោចស៊ីត្រី» ដែលខ្មែរត្រូវតែបញ្ចប់ឱ្យខាងតែបាន ដោយប្តូរមកវិញនូវការប្រកាន់យកគោលការណ៍នីតិរដ្ឋ ប្រជាធិបតេយ្យសេរីពហុបក្ស អហិង្សា សន្តិវិធី សាមគ្គីជាតិ និងផ្សះផ្សាជាតិ៕
© 2025, ឌឹ ខេមបូឌា ដេលី. All rights reserved.