កូនស្រីច្បងមេដឹកនាំបក្សជំទាស់ លោក កឹម សុខា គឺកញ្ញា កឹម មនោវិទ្យា អំពាវនាវឲ្យអ្នកនយោបាយខ្មែរគ្រប់និន្នាការ មានស្មារតីអនុវត្តនូវគោលការណ៍រួបរួមជាតិដោយស្មោះត្រង់រវាងខ្មែរនិងខ្មែរ ដើម្បីជាប្រវត្តិសាស្ត្រថ្មីនៃជាតិសាសន៍ខ្លួន ទប់ទល់នឹងបរទេសឈ្លានពាន។
កញ្ញា កឹម មនោវិទ្យា សរសេរលើទំព័រហ្វេសប៊ុករបស់ខ្លួននៅថ្ងៃទី២៤ កក្កដា នេះថា ក្នុងពេលនេះ ប្រទេសកម្ពុជាកំពុងប្រឈមនឹងការយាយីឈ្លានពានពីប្រទេសថៃ ដែលពួកគេជាអ្នកបង្កឡើង ដូច្នេះអ្នកនយោបាយខ្មែរ និងពលរដ្ឋខ្មែរគ្រប់រូប ត្រូវតែប្រកាន់ស្មារតីរួបរួមជាតិឱ្យរឹងមាំបំផុតជាងពេលណាៗទាំងអស់។
កញ្ញា កឹម មនោវិទ្យា លើកឡើងថា ក្នុងស្ថានភាពដ៏តានតឹងនេះ អ្នកនយោបាយខ្មែរគ្រប់និន្នាការ គួរតែជៀសវាងឱ្យបាននូវទង្វើ ឬសម្ដីណាដែលផ្តល់ប្រយោជន៍ដល់ភាគីបរទេសឈ្លានពាន ដែលនាំឱ្យខាតប្រយោជន៍ជាតិ ឬទង្វើណាមួយដែលធ្វើឱ្យសត្រូវមើលស្រាលជាតិសាសន៍ខ្មែរក្នុងជម្លោះនេះ ជាដើម។
កូនស្រីមេដឹកនាំបក្សប្រឆាំងរូបនេះ អំពាវនាវឱ្យអ្នកនយោបាយ និងពលរដ្ឋខ្មែរគ្រប់រូប មានការអត់ឱនរវាងខ្មែរ និងខ្មែរឱ្យបានខ្ពស់បំផុត ទោះជាមានមតិខ្លះដែលមិនស្របគ្នា ឬមិនសមរម្យក៏ដោយ ក៏គួរតែផ្តល់អភ័យដល់គ្នាដែរក្នុងកាលៈទេសៈដ៏ផុយស្រួយនេះ។
ក្រោយប្រទេសកម្ពុជាមានជម្លោះព្រំដែនជាមួយប្រទេសថៃ ទាំងមេដឹកនាំបក្សកាន់អំណាច លោក ហ៊ុន សែន និងលោក ហ៊ុន ម៉ាណែត ដែលជានាយករដ្ឋមន្ត្រី តែងតែអំពាវនាវឱ្យប្រជាពលរដ្ឋខ្មែរមានការរួមចិត្តរួមថ្លើម និងទុកចិត្តលើរាជរដ្ឋាភិបាល ដើម្បីទប់ទល់នឹងសត្រូវឈ្លានពានទឹកដីខ្មែរ។
ឧទាហរណ៍ជាក់ស្តែង ក្នុងពិធីបិទកិច្ចប្រជុំសហភាពសហព័ន្ធយុវជនកម្ពុជា (ស.ស.យ.ក.) កាលពីចុងខែមិថុនា ឆ្នាំ២០២៥ លោក ហ៊ុន ម៉ាណែត លើកឡើងថា ទាល់តែខ្មែរមានស្មារតីសាមគ្គីជាតិ ឯកភាពជាតិ ទើបធ្វើឱ្យប្រទេសកម្ពុជាខ្លាំងក្នុងការប្ដូរផ្ដាច់ការពារទឹកដី និងអធិបតេយ្យជាតិពីការឈ្លានពានរបស់បរទេសជិតខាង។
ជុំវិញបញ្ហានេះ អ្នកឃ្លាំមើលសង្គម លោក វ៉ន ចាន់ឡូត លើកឡើងថា បើជាតិខ្មែរទាំងមូលចង់បានឯកភាពជាតិ សាមគ្គីជាតិ ទាល់តែពលរដ្ឋ និងអ្នកនយោបាយគ្រប់រូបត្រូវហ៊ានឈរជាមួយភាពយុត្តិធម៌ ប៉ុន្តែសង្គមខ្មែរទំនងជាមិនងាយនឹងស្វែងរកការរួបរួមជាតិបានទេ ព្រោះតែខ្វះមនុស្សឱ្យតម្លៃលើការពិត។
លោក វ៉ន ចាន់ឡូត អះអាងថា ម្ខាងអាងជេរ ចោទ លាបពណ៌ ខណៈម្ខាងទៀតអាងចាប់ អាងចង ដូច្នេះ សង្គមខ្មែរក្នុងពេលនេះត្រូវប្រឈមនឹងក្រុមអ្នកនយោបាយគ្មានសីលធម៌ដល់ទៅពីរក្រុម ដែលនឹងធ្វើឱ្យសង្គមជាតិមួយនេះពិបាករកការផ្សះផ្សា និងឯកភាពជាតិខ្លាំងណាស់។
ក្នុងពេលជាមួយគ្នានេះ អ្នកសង្កេតការណ៍ និងអ្នកវិភាគនយោបាយខ្មែរ ក៏សម្លឹងមើលឃើញរបៀបធ្វើនយោបាយកែកុនបង្វែរខ្សែចក្ខុ បញ្ចៀសសាច់រឿងពីរឿងអាស្រូវលើមេដឹកនាំខ្មែរមួយចំនួនធំដែលទាក់ទងនឹងរបរឧក្រិដ្ឋកម្មឆបោកដ៏ល្បីល្បាញក្នុងតំបន់អាស៊ីនោះដែរ។ ឧក្រិដ្ឋកម្មឆបោកតាមបច្ចេកវិទ្យា ជារបររកចំណូលចូលថវិការដ្ឋ និងចូលហោប៉ៅមន្ត្រីពុករលួយក្នុងមួយឆ្នាំៗពី ១២៥០០លាន ទៅ ១៩ពាន់លានដុល្លារ ឬ ៦០% នៃផលទុនសរុបក្នុងស្រុក GDP ជំនួសការនាំសម្លៀកបំពាក់ចេញទៅបរទេស ដែលមានចំណូលត្រឹមតែ ៩៣០០លានដុល្លារ ឬ ៣០% នៃផលទុនសរុបក្នុងស្រុក GDP។
វិធីតែមួយគត់ដើម្បីស្វែងរកសាមគ្គីភាព ឯកភាព និងការគាំទ្រជាតិ ទាំងផ្លូវកាយ ផ្លូវចិត្ត ផ្លូវថវិកា គឺមានតែរឿងជាតិនិយម ស្នេហាជាតិជុំវិញរឿងបូរណភាពទឹកដីខ្មែរតែប៉ុណ្ណោះ។ ខ្មែរត្រូវមានសាមគ្គីភាព ឯកភាពជាតិ ស្មារតី មនសិការជាតិតាំងពីយូរលង់មកហើយ មិនមែនចាំតែពេលមានហេតុការណ៍ស្លាប់រស់កើតឡើងនោះទេ៕
© 2025, ឌឹ ខេមបូឌា ដេលី. All rights reserved.