ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ព្រមានទៅកាន់ប្រទេសថៃ ថា ពេលនេះ អាមេរិកកំពុងធ្វើកិច្ចព្រមព្រៀងពាណិជ្ជកម្មជាមួយថៃ ប៉ុន្តែលោកនឹងមិនធ្វើកិច្ចព្រមព្រៀងនេះទេ បើថៃ នៅតែបន្តសម្លាប់គ្នាជាមួយកម្ពុជា។
លោក ដូណាល់ ត្រាំ ថ្លែងក្នុងកិច្ចសម្ភាសជាមួយប្រព័ន្ធផ្សព្វផ្សាយនៅថ្ងៃទី២៩ កក្កដា នេះថា ពេលនេះ អាមេរិកកំពុងធ្វើកិច្ចព្រមព្រៀងពាណិជ្ជកម្មជាមួយថៃ ប៉ុន្តែលោកនឹងមិនធ្វើកិច្ចព្រមព្រៀងនេះទេ ប្រសិនបើភាគីថៃ នៅតែបន្តសម្លាប់គ្នាជាមួយកម្ពុជា ហើយលោកក៏បានប្រាប់កម្ពុជា ដូចគ្នានេះដែរ។
លោក ដូណាល់ ត្រាំ បញ្ជាក់ថា មិនដល់មួយថ្ងៃទេ កិច្ចព្រមព្រៀងពាណិជ្ជកម្មរវាងអាមេរិក និងថៃ ព្រមទាំងកិច្ចព្រមព្រៀងពាណិជ្ជកម្មរវាងអាមេរិក និងកម្ពុជា គឺពិតជាអាចដោះស្រាយបាន បើភាគីទាំងពីរព្រមចូលតុចរចាបញ្ចប់ជម្លោះ។
ក្រសួងការពារជាតិកម្ពុជា ថ្លែងក្នុងសន្និសីទសារព័ត៌មាននៅថ្ងៃទី២៩ កក្កដា នេះថា ជំនួបពិភាក្សារវាងកម្ពុជា-ថៃ កម្រិតភូមិភាគ បានធ្វើឡើងដោយរលូននៅថ្ងៃអង្គារនេះ បន្ទាប់ពីនាយករដ្ឋមន្ត្រីកម្ពុជា និងនាយករដ្ឋមន្ត្រីស្តីទីថៃ បានឯកភាពលើកិច្ចព្រមព្រៀងឱ្យមានបទឈប់បាញ់តាមសំណើរបស់ប្រធានាធិបតីអាមេរិក កាលពីថ្ងៃចន្ទ។
ប្រភពដដែល លើកឡើងថា មេបញ្ជាការយោធភូមិភាគទី៥ ឧត្ដមសេនីយ៍ឯក ឯក សំអូន បានជួបពិភាក្សាជាមួយមេបញ្ជាការភូមិភាគទី១ របស់ថៃ ហើយក៏បានបន្តជួបពិភាក្សាជាមួយមេបញ្ជាការកងការពារព្រំដែនចាន់បូរី និងត្រាត របស់ថៃ ផងដែរ។
ចំណែកមេបញ្ជាការយោធភូមិភាគទី៤ ឧត្ដមសេនីយ៍ឯក ពៅ ហេង ក៏បានជួបប្រជុំជាមួយមេបញ្ជាការយោធភូមិភាគទី២ ថៃ ឧត្ដមសេនីយ៍ ប៊ុនស៊ីន ផាតក្លាង (Boonsin Padklang) ថែមទៀត ខណៈមេបញ្ជាការភូមិភាគ៣ របស់កម្ពុជា ក៏បានជួបពិភាក្សាជាមួយបញ្ជាការដ្ឋានព្រំដែនចាន់បូរី និងត្រាត ផងដែរ។
ក្រសួងការពារជាតិកម្ពុជា អះអាងថា ជំនួបពិភាក្សាកម្រិតភូមិភាគនាពេលនេះ បានព្រមព្រៀងគ្នាគោរព និងអនុវត្តកិច្ចព្រមព្រៀងបទឈប់បាញ់ និងបញ្ឈប់ការបង្កើនកងទ័ពរវាងប្រទេសទាំងពីរ ព្រមទាំងត្រូវភ្ជាប់ទំនាក់ទំនង និងផ្ដល់ព័ត៌មានឱ្យគ្នាទៅវិញទៅមកផងដែរ។ បន្ថែមពីនេះ ភាគីទាំងពីរត្រូវជូនដំណឹងទៅគណៈកម្មការកិច្ចការព្រំដែនទូទៅ (GBC) ដើម្បីឱ្យត្រួតពិនិត្យ និងសុំយោបល់ដោះស្រាយក្នុងករណីមានបញ្ហាអ្វីមួយលើសសមត្ថកិច្ចនៃមេបញ្ជាការភូមិភាគទាំងពីរ។
លើសពីនេះ មេបញ្ជាការភូមិភាគទី៤ របស់កម្ពុជា ក៏បានស្នើមេបញ្ជាការភូមិភាគទី២ របស់ថៃ កុំឱ្យចូលទៅក្នុងដែនអធិបតេយ្យរបស់កម្ពុជា ជាបន្តទៀតផងដែរ។
កិច្ចប្រជុំកម្រិតភូមិភាគនេះ ធ្វើឡើងទៅតាមស្មារតីនៃកិច្ចព្រមព្រៀងស្ដីពីបទឈប់បាញ់ដែលនាយករដ្ឋមន្ត្រីនៃប្រទេសទាំងពីរ បានឯកភាពគ្នាកាលពីថ្ងៃចន្ទដើមសប្តាហ៍នេះ។
កាលពីថ្ងៃទី២៨ ខែកក្កដា ឆ្នាំ២០២៥ ក្រោយកិច្ចប្រជុំស្ដីពីបទឈប់បាញ់រវាងកម្ពុជា-ថៃ នៅប្រទេសម៉ាឡេស៊ី ភាគីទាំងពីរបានព្រមព្រៀងលើបទឈប់បាញ់៕
© 2025, ឌឹ ខេមបូឌា ដេលី. All rights reserved.