អង្គការក្រៅរដ្ឋាភិបាល រួមជាមួយស្ថាប័នផ្សេងទៀត គ្រោងដាក់ញត្តិទៅកាន់ស្ថានទូតនៃប្រទេសដែលជាម្ចាស់ហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស ឱ្យជួយការពារអធិបតេយ្យភាព បូរណភាពទឹកដី និងសន្តិភាពរបស់កម្ពុជា។
អង្គការសង្គមស៊ីវិល សមាគម សហជីព និងបណ្ដាញយុវជន បានចេញសេចក្តីប្រកាសព័ត៌មានរួមគ្នាមួយនៅថ្ងៃទី១៩ សីហា នេះ ដោយអំពាវនាវឱ្យប្រទេសហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស រក្សាការប្ដេជ្ញាចិត្ត និងមានចំណាត់ការដោយការសម្របសម្រួលជាបន្ទាន់ក្នុងការការពារអធិបតេយ្យភាព បូរណភាពទឹកដី និងសន្តិភាពរបស់កម្ពុជា។
ប្រភពដដែល អះអាងថា ញត្តិនេះជំរុញឱ្យរដ្ឋហត្ថលេខីទាំងអស់កោះប្រជុំ ការពិគ្រោះយោបល់ជាបន្ទាន់តាមមាត្រា៥ នៃកិច្ចព្រមព្រៀងសន្តិភាពទីក្រុងប៉ារីស បង្កើតបេសកកម្មស្វែងរកការពិតជាមួយអន្តរជាតិ ដើម្បីស៊ើបអង្កេតការរំលោភបំពានដែលត្រូវបានចោទប្រកាន់ និងសម្របសម្រួលកិច្ចខិតខំប្រឹងប្រែងមនុស្សធម៌ និងកសាងសន្តិភាពសម្រាប់សហគមន៍ដែលរងផលប៉ះពាល់។
អង្គការសង្គមស៊ីវិលទាំងនេះ បញ្ជាក់ថា ការដាក់ញត្តិនេះ គឺឆ្លើយតបទៅនឹងការប៉ះទង្គិចគ្នានៅតាមព្រំដែនកម្ពុជា-ថៃ ដែលបានបណ្ដាលឱ្យមនុស្សជាច្រើនរងរបួស និងបាត់បង់ជីវិត ជនភៀសសឹករាប់ម៉ឺននាក់ សាលារៀនជាច្រើនត្រូវបានបិទទ្វារ ការខូចខាតទ្រព្យសម្បត្តិ និងតំបន់បេតិកភណ្ឌវប្បធម៌ ជាដើម។
កាលពីថ្ងៃទី២៤ ខែកក្កដា ឆ្នាំ២០២៥ ជម្លោះព្រំដែនកម្ពុជា-ថៃ បានផ្ទុះឡើងបន្ទាប់ពីការប៉ះទង្គិចគ្នាកាលពីថ្ងៃទី២៨ ខែឧសភា ឆ្នាំ២០២៥ នៅតំបន់មុំបី ដែលបណ្តាលឱ្យទាហានខ្មែរម្នាក់បានស្លាប់ ប៉ុន្តែជម្លោះនេះចេះតែបន្តអូសបន្លាយរហូតដល់ពេលនេះ បើទោះបីជាភាគីទាំងពីរបានឯកភាពឱ្យមានបទឈប់បាញ់ កាលពីថ្ងៃទី២៨ ខែកក្កដា ឆ្នាំ២០២៥ ទៅហើយក្តី។
ជុំវិញបញ្ហានេះ ប្រធានអាស៊ានប្តូរវេន និងជានាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានសរសេរលើទំព័រហ្វេសប៊ុករបស់លោកនៅថ្ងៃទី១៩ សីហា នេះថា លោកបានពិភាក្សាជាមួយនាយករដ្ឋមន្ត្រីកម្ពុជា លោក ហ៊ុន ម៉ាណែត នៅថ្ងៃអង្គារនេះ អំពីការវិវត្តថ្មីៗពាក់ព័ន្ធនឹងបទឈប់បាញ់រវាងកម្ពុជា និងថៃ។
លោក អាន់វ៉ា អ៊ីប្រាហ៊ីម បញ្ជាក់ថា កិច្ចពិភាក្សានេះក៏បានលើកឡើងអំពីក្រុមអ្នកសង្កេតការណ៍អន្តរកាល (IOT) ដែលកំពុងធ្វើការត្រួតពិនិត្យយ៉ាងយកចិត្តទុកដាក់ទៅលើតំបន់ព្រំដែននៃប្រទេសទាំងពីរ ហើយក៏បានពិភាក្សាអំពីជំហានផ្សេងទៀត ដើម្បីប្រសិទ្ធភាពជុំវិញប្រតិបត្តិការត្រួតពិនិត្យរបស់ក្រុមអ្នកសង្កេតការណ៍អន្តរកាល (IOT) ផងដែរ។
ជុំវិញបញ្ហានេះ រដ្ឋមន្ត្រីការបរទេសអាម៉េរិក លោក ម៉ាកូ រ៉ូប៊ីអូ (Marco Rubio) បានបញ្ជាក់ក្នុងកិច្ចសម្ភាសជាមួយសារព័ត៌មាន NBC កាលពីថ្ងៃទី១៧ ខែសីហា មុនពេលប្រធានាធិបតីអាមេរិក លោក ដូណាល់ ត្រាំ ជួបជាមួយមេដឹកនាំអ៊ុយក្រែន និងអឺរ៉ុប ជុំវិញការបញ្ចប់សង្គ្រាមនៅអ៊ុយក្រែន ថា អាមេរិកបានតាមដានយ៉ាងហ្មត់ចត់ទៅលើជម្លោះព្រំដែនរវាងកម្ពុជា និងថៃ។
ចំណែកប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត សរសេរលើគណនីហ្វេសប៊ុករបស់លោកនៅថ្ងៃទី១៩ សីហា នេះដែរថា ភាគីកម្ពុជា ទាំងពលរដ្ឋ និងយោធា ត្រូវតែទប់ស្កាត់ភាគីថៃ ឱ្យបានតាមស្ថានភាពជាក់ស្តែង ដើម្បីការពារខ្លួន។ បន្ថែមពីនេះ ក៏ត្រូវប្រឹងប្រែងលើវិស័យការទូតឱ្យកាន់តែខ្លាំងផងដែរ៕
© 2025, ឌឹ ខេមបូឌា ដេលី. All rights reserved.