រដ្ឋមន្ត្រីក្រសួងការពារជាតិស្ដីទីថៃ ព្រមានចាត់វិធានការច្បាប់លើពលរដ្ឋខ្មែរដែលបានរុះរើបន្លាលួសប្រឆាំងនឹងកងទ័ពថៃ នៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ខណៈក្រសួងការពារជាតិកម្ពុជា ចាត់ទុកសកម្មភាពរាយបន្លាលួសពីសំណាក់យោធាថៃ គឺជាការរំលោភលើបទឈប់បាញ់។
កាសែត The Nation របស់ថៃ ស្រង់សម្ដីលោក ណាតថាផុន ណាក់ផានិត (Nattaphon Narkphanit) រដ្ឋមន្ត្រីក្រសួងការពារជាតិស្ដីទីថៃ នៅថ្ងៃទី២៦ សីហា នេះថា យោធាថៃ បានពង្រឹងសន្តិសុខនៅតាមព្រំដែនក្នុងភូមិណងចាន់ (Nong Chan) ក្នុងខេត្តស្រះកែវ បន្ទាប់ពីក្រុមបាតុករកម្ពុជាប៉ុនប៉ងរុះរើលួសបន្លាដែលក្រុមយោធាបានហ៊ុមព័ទ្ធ។
លោក ណាតថាផុន ណាក់ផានិត អះអាងថា កងទ័ពថៃ បានបន្ថែមលួសបន្លាការពារដើម្បីរារាំងជនស៊ីវិលកម្ពុជា មិនឲ្យចូលក្នុងទឹកដីថៃ ចៀសវាងកើតមានឧបទ្ទវហេតុកើតឡើងដដែលៗ ហើយវិធានការផ្លូវច្បាប់នេះ អាចធ្វើឡើងពីសំណាក់កងទ័ព អាជ្ញាធរខេត្ត ឬស្ថាប័នពាក់ព័ន្ធដទៃទៀតផងដែរ។
ថ្លែងក្នុងសន្និសីទសារព័ត៌មាននៅថ្ងៃទី២៦ សីហា នេះ អ្នកនាំពាក្យក្រសួងការពារជាតិកម្ពុជា អ្នកស្រី ម៉ាលី សុជាតា ចាត់ទុកថាសកម្មភាពរាយលួសបន្លាពីសំណាក់យោធាថៃ គឺជាការរំលោភលើបទឈប់បាញ់ និងអនុស្សរណៈយោគយល់ឆ្នាំ២០០០ (MOU២០០០) រួមទាំងរំលោភស្មារតីនៃកិច្ចព្រមព្រៀងដែលបានសម្រេចក្នុងកិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគ (RBC) កាលពីពេលថ្មីៗនេះយ៉ាងធ្ងន់ធ្ងរផងដែរ។
អ្នកនាំពាក្យរូបនេះបញ្ជាក់ថា រាល់ទំនាស់ពាក់ព័ន្ធបញ្ហាព្រំដែន កម្ពុជាប្ដេជ្ញាចិត្តលើកយកទៅដោះស្រាយដោយគណៈកម្មាធិការចម្រុះខណ្ឌសីមាព្រំដែនគោក (JBC) នៃប្រទេសទាំងពីរ ស្របតាមអនុស្សរណៈយោគយល់គ្នាឆ្នាំ២០០០ (MOU២០០០)។
ជុំវិញបញ្ហានេះ ពលរដ្ឋខ្មែររាប់រយនាក់ បានប្រាប់សារព័ត៌មានក្នុងស្រុកនៅថ្ងៃទី២៦ សីហា នេះថា កងទ័ពថៃ បានចូលទៅរាយបន្លាលួសក្នុងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ កាលពីថ្ងៃចន្ទ ប៉ុន្តែត្រូវបរាជ័យដោយសារការប្រឆាំងតវ៉ារបស់ពលរដ្ឋ។
ប្រភពដដែល អះអាងថា នៅថ្ងៃអង្គារនេះ កងទ័ពថៃ បានព្យាយាមរាយលួសបន្លាម្តងទៀត ប៉ុន្តែត្រូវបរាជ័យដដែល ហើយចាប់តាំងពីយប់ថ្ងៃចន្ទ ពួកគេបាននាំគ្នាបោះតង់ដេកយាមកាមនៅទីតាំងដែលកងទ័ពថៃ ប៉ុនប៉ងរាយលួសបន្លានោះផងដែរ ខណៈយប់នេះ ពួកគេក៏នឹងបន្តដេកយាមកាមនៅទីតាំងនេះបន្តទៀត។
កាលពីថ្ងៃទី២៥ ខែសីហា បណ្ឌិត ឥន សុផល អ្នកជំនាញផ្នែកវិទ្យាសាស្ត្រនយោបាយ សរសេរលើគណនីហ្វេសប៊ុករបស់ខ្លួន ដោយភ្ជាប់ជាមួយផែនទីអង្គការសហប្រជាជាតិថា ជំរំណងចាន់ (Nong Chan) គឺស្ថិតនៅលើទឹកដីកម្ពុជា ជាប់នឹងព្រំដែនថៃ ដែលជំរំនេះធ្លាប់ត្រូវបានគ្រប់គ្រងដោយចលនារណសិរ្សរំដោះជាតិខ្មែររបស់លោកតា សឺន សាន ដែលមានលោក ឌៀង ឌែល ជាមេបញ្ជាការនាពេលនោះ។
បណ្ឌិត ឥន សុផល អះអាងថា នៅឆ្នាំ១៩៧៩ មានជនភៀសខ្លួនខ្មែរ ១ម៉ឺន ៣ពាន់នាក់ (១៣០០០នាក់) រហូតដល់ឆ្នាំ១៩៨៤ ជនភៀសខ្លួនខ្មែរបានកើនឡើងរហូតដល់ ១ម៉ឺន ៦ពាន់នាក់ (១៦០០០នាក់) ដែលរស់នៅក្នុងជំរំណងចាន់ នេះ។
លោកបញ្ជាក់ថា ជំរំជនភៀសខ្លួនខ្មែរដែលនៅក្នុងទឹកដីថៃ គឺមានតែជំរំខាវអ៊ីដាង (Khao I Dang) មួយប៉ុណ្ណោះ ហើយបើថៃ ចង់បានសាក្សី គឺអង្គការសហប្រជាជាតិ (UNHCR) តែម្តងដែលមានទាំងភស្តុតាងពិតប្រាកដ ប៉ុន្តែថៃ ប្រាកដជាមិនចង់បានភស្តុតាង ឬសាក្សីនោះទេ ដោយសារពួកគេប៉ុនប៉ងប្លន់យកទឹកដីខ្មែរទៅហើយនោះ៕
© 2025, ឌឹ ខេមបូឌា ដេលី. All rights reserved.