នាយកដ្ឋានពាណិជ្ជកម្មថៃ ត្អូញត្អែរថា ក្រោយបិទច្រកព្រំដែនថៃ-កម្ពុជា បណ្តាលឱ្យពាណិជ្ជកម្មរវាងប្រទេសទាំងពីរធ្លាក់ចុះជិត ១០០% (៩៧,៥%) ដែលធ្លាក់មកនៅត្រឹមតែជាង ៣០០លានបាត (៣៧៦លានបាត) ប៉ុណ្ណោះ ក្នុងខែកក្កដា កន្លងទៅនេះ។
សារព័ត៌មានថៃ The Nation បានស្រង់សម្ដីអគ្គនាយកនៃនាយកដ្ឋានពាណិជ្ជកម្មថៃ អ្នកស្រី Arada Fuangtong កាលពីថ្ងៃទី២៦ ខែសីហា ថា ការបិទច្រកព្រំដែនរវាងថៃ និងកម្ពុជា បានទាញទម្លាក់ពាណិជ្ជកម្មទ្វេភាគីឱ្យធ្លាក់ចុះដល់កម្រិតអវិជ្ជមានធ្ងន់ធ្ងរ។
ប្រភពដដែលលើកឡើងថា ទំហំពាណិជ្ជកម្មទ្វេភាគីរវាងថៃ និងកម្ពុជា បានធ្លាក់ចុះមកនៅត្រឹមតែ ១១,៥លានដុល្លារអាមេរិកប៉ុណ្ណោះ ដែលស្មើនឹង ៩៧,៥% ក្នុងនោះការនាំចេញពីថៃ ទៅកម្ពុជា បានធ្លាក់ចុះមកនៅត្រឹម ១១,៤លានដុល្លារអាមេរិក ដែលស្មើនឹង ៩៧%។
អគ្គនាយកនៃនាយកដ្ឋានពាណិជ្ជកម្មថៃ រូបនេះ បញ្ជាក់ថា កាន់តែធ្ងន់ធ្ងរទៀតនោះ គឺការនាំចូលរបស់កម្ពុជាទៅកាន់ប្រទេសថៃ បានធ្លាក់ចុះយ៉ាងគំហុកមកនៅត្រឹមតែ ១៨ម៉ឺនដុល្លារអាមេរិកប៉ុណ្ណោះ ដែលស្មើនឹង ៩៩,៨%។
កាលពីថ្ងៃទី១៦ ខែកក្កដា ឆ្នាំ២០២៥ អគ្គនាយកដ្ឋានគយ និងរដ្ឋាករកម្ពុជា បានចេញសេចក្តីប្រកាសហាមឃាត់មុខទំនិញមានប្រភពដើមពីប្រទេសថៃ ដូចជា បន្លែ និងផ្លែឈើ ប្រេងឥន្ធនៈ និងឧស្ម័នឥន្ធនៈ រួមមានប្រេងសាំង ប្រេងម៉ាស៊ូត ឧស្ម័នរាវសម្រាប់ដុត ប្រេងខ្មៅ និងប្រេងសាំងយន្តហោះផងដែរ។
ការចេញសេចក្តីប្រកាសនេះ ធ្វើឡើងបន្ទាប់ពីប្រធានព្រឹទ្ធសភាកម្ពុជា លោក ហ៊ុន សែន និងនាយករដ្ឋមន្ត្រី លោក ហ៊ុន ម៉ាណែត បានប្រកាសហាមឃាត់ការនាំទំនិញថៃ ឆ្លងកាត់ ឬនាំចូលប្រទេសកម្ពុជា ក្រោយយោធាថៃ សម្រេចបិទច្រកព្រំដែនជាមួយកម្ពុជា ដោយឯកតោភាគីកាលពីថ្ងៃទី៧ ខែមិថុនា កន្លងទៅ។
គិតត្រឹមខែសីហា ឆ្នាំ២០២៥ កម្ពុជាបានហាមឃាត់មុខទំនិញពីប្រទេសថៃ ចំនួន ១១មុខហើយ រួមមាន បន្លែ ផ្លែឈើ ប្រេងសាំង ប្រេងម៉ាស៊ូត ឧស្ម័នរាវសម្រាប់ដុត ប្រេងខ្មៅ ប្រេងសាំងយន្តហោះ អគ្គិសនី អ៊ីនធឺណិត ភាពយន្ត និងកីឡាករប្រដាល់ថៃ ផងដែរ។
ជុំវិញបញ្ហានេះ សារព័ត៌មានថៃ The Nation បានចុះផ្សាយកាលពីថ្ងៃទី១២ ខែសីហា ថា បន្ទាប់ពីការហាមឃាត់របស់កម្ពុជា ការនាំចូលប្រេងម៉ាស៊ូតរបស់ថៃ ទៅកម្ពុជា បានធ្លាក់ចុះ ៧,៤% ខណៈផលិតផលប្រេងចម្រាញ់ផ្សេងទៀតក៏បានធ្លាក់ចុះរហូតដល់ ៣៣,៣% ផងដែរ។ ចំណែកប្រភេទផលិតផលសំខាន់ៗ ដូចជា ទឹកដោះគោ ទឹកសណ្តែក ភេសជ្ជៈប៉ូវកម្លាំង រួមទាំងកាហ្វេ ជាដើម ក៏បានធ្លាក់ចុះធ្ងន់ធ្ងរជាបន្តបន្ទាប់៕
© 2025, ឌឹ ខេមបូឌា ដេលី. All rights reserved.