លោក ហ៊ុន ម៉ាណែត ថាក្នុងកាលៈទេសៈណាក៏ដោយ រាជរដ្ឋាភិបាលមិនដែលភ្លេចយោធិនទាំង ១៨នាក់ទេ

ឌឹ ខេមបូឌា ដេលី

9 months ago

ទាហានកម្ពុជា ដែលត្រូវយោធាថៃ ប្រើកលល្បិចចាប់ខ្លួនបន្ទាប់ពីមានកិច្ចព្រមព្រៀងឈប់បាញ់គ្នាកាលពីព្រឹកថ្ងៃទី២៩ ខែកក្កដា ឆ្នាំ២០២៥។

នាយករដ្ឋមន្ត្រីកម្ពុជា លោក ហ៊ុន ម៉ាណែត លើកឡើងថា ទោះក្នុងកាលៈទេសៈណាក៏ដោយ កម្ពុជាបន្តប្រើគ្រប់យន្តការដើម្បីជំរុញឱ្យមានការដោះលែងយោធិនទាំង ១៨នាក់ដែលស្ថិតក្រោមការគ្រប់គ្រងរបស់ថៃ ឱ្យបានវិលត្រឡប់មកជួបជុំគ្រួសារវិញឱ្យបានឆាប់។

យោងតាមសេចក្តីប្រកាសព័ត៌មានស្ដីពីលទ្ធផលនៃកិច្ចប្រជុំពេញអង្គគណៈរដ្ឋមន្ត្រី នៅព្រឹកថ្ងៃទី២៦ ខែកញ្ញា នេះ បានឲ្យដឹងថា គិតត្រឹមថ្ងៃនេះមានរយៈពេលជិត ២ខែហើយ ដែលកងទ័ពកម្ពុជាចំនួន ១៨រូប ត្រូវបានចាប់ខ្លួន និងស្ថិតក្រោមការឃុំគ្រងរបស់យោធាថៃ។ រាជរដ្ឋាភិបាលមិនដែលភ្លេចយោធិនទាំង ១៨រូបដែលកំពុងស្ថិតនៅក្នុងការឃុំឃាំងដោយភូមិភាគ២ របស់ថៃ ឡើយ។

លោក ហ៊ុន ម៉ាណែត បានថ្លែងនៅក្នុងកិច្ចប្រជុំពេញអង្គគណៈរដ្ឋមន្ត្រីថា រាជរដ្ឋាភិបាលកម្ពុជា បន្តប្រើគ្រប់យន្តការដើម្បីជំរុញឱ្យមានការដោះលែងពួកគាត់ឱ្យបានវិលត្រឡប់មកជួបជុំគ្រួសារវិញឱ្យបានឆាប់។

កាលពីថ្ងៃទី១៩ ខែកញ្ញា ប្រមុខរដ្ឋាភិបាលកម្ពុជា លោក ហ៊ុន ម៉ាណែត បានជួបជុំជាមួយក្រុមគ្រួសារទាហានខ្មែរទាំង ១៨រូបដែលត្រូវបានចាប់ខ្លួនដោយយោធាថៃ ដោយលោកធានាថា រដ្ឋាភិបាលកម្ពុជាមិននៅស្ងៀម ឬមិនអើពើ ហើយទុកវីរកងទ័ពខ្មែរឱ្យនៅឯកោនោះឡើយ ពោលគឺកំពុងបន្តធ្វើការសម្របសម្រួលជាមួយគ្រប់ភាគីទាំងអស់ មិនថាភាគីថៃ ឬអង្គការអន្តរជាតិផ្សេងៗទៀត។

លោក ហ៊ុន ម៉ាណែត អះអាងថា រដ្ឋាភិបាលបន្តរកការគាំទ្រពីសំណាក់មេដឹកនាំពិភពលោក និងអង្គការអន្តរជាតិនានា ដូចជា អង្គការកាកបាទក្រហមអន្តរជាតិ អង្គការសហប្រជាជាតិ អង្គការសិទ្ធិមនុស្សអន្តរជាតិ ដើម្បីធ្វើយ៉ាងណាជួយជំរុញឱ្យថៃ ដោះលែងទាហានខ្មែរស្ថិតក្រោមច្បាប់មនុស្សធម៌អន្តរជាតិ។

ជុំវិញបញ្ហានេះ ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បណ្ឌិត គិន ភា បានប្រាប់អ្នកសារព័ត៌មានថា ការបញ្ជាក់ជំហររបស់រដ្ឋាភិបាលកម្ពុជានាពេលនេះ មិនអាចផ្តល់ភាពកក់ក្តៅពេញលេញដល់ក្រុមគ្រួសារទាហានខ្មែរទាំង ១៨នាក់នោះទេ តែលោកថាការខិតខំប្រឹងប្រែងយ៉ាងសស្រាក់សស្រាំរបស់រដ្ឋាភិបាលកម្ពុជា បានបង្ហាញឱ្យឃើញថា សុខទុក្ខរបស់កងទ័ពទាំង ១៨រូបនោះ មិនត្រូវបានបំភ្លេច ឬបោះបង់ចោលម្តងណាឡើយ។

ចំណែកក្រសួងការពារជាតិកម្ពុជា បានបន្តទាមទារឱ្យភាគីថៃ ដោះលែងទាហានខ្មែរទាំងនោះត្រឡប់មកជួបជុំគ្រួសារវិញប្រកបដោយសុខសុវត្ថិភាពស្របតាមច្បាប់មនុស្សធម៌អន្តរជាតិ។

យោធិនទាំង ១៨រូប ត្រូវបានទាហានថៃ ចូលមកចាប់ខ្លួនដល់លេណដ្ឋាននៅព្រឹកថ្ងៃទី២៩ ខែកក្កដា ឆ្នាំ២០២៥ នៅក្រោយបទឈប់បាញ់ចូលជាធរមាន។ គិតត្រឹមថ្ងៃទី២៦ ខែកញ្ញា នេះ គឺមានរយៈពេល ៥៩ថ្ងៃហើយ៕