អ្នកសង្កេតការណ៍៖ ការចុះផ្សាយរបស់កាសែត The New York Times មានចេតនាបំភាន់ការពិតជុំវិញជម្លោះព្រំដែនកម្ពុជា-ថៃ

ឌឹ ខេមបូឌា ដេលី

8 months ago

ប្រតិភូអនុព័ន្ធយោធា និងអ្នកការទូតមកពីប្រទេសចំនួន ១៣ រួមទាំងសហរដ្ឋអាមេរិក និងចិន ទៅពិនិត្យមើលវត្តដែលរងការខូចខាតនៅច្រកព្រំដែនអានសេះ ក្នុងខេត្តព្រះវិហារ ប្រទេសកម្ពុជា នៅថ្ងៃពុធ ទី៣០ ខែកក្កដា ឆ្នាំ២០២៥។

អ្នកតាមដានភូមិសាស្ត្រនយោបាយ ចាត់ទុកការចុះផ្សាយរបស់កាសែត The New York Times ដែលថាកម្ពុជា ឈ្លានពានប្រទេសថៃ ជុំវិញសង្គ្រាម ៥ថ្ងៃកាលពីចុងខែកក្កដា ឆ្នាំ២០២៥ គឺជាចេតនាបំភាន់សាធារណមតិ និងត្រូវបានថៃ ប្រើប្រាស់។

លោក សេង វណ្ណលី អ្នកតាមដានភូមិសាស្ត្រនយោបាយនៅតំបន់អាស៊ី-ប៉ាស៊ីហ្វិក បានសរសេរលើគណនីហ្វេសប៊ុករបស់ខ្លួននៅថ្ងៃទី២ តុលា នេះថា អ្នកសរសេរអត្ថបទនេះទំនងជាត្រូវបានថៃ ប្រើប្រាស់ ឫទិញតែម្តង ដើម្បីឲ្យរាយការណ៍ចោទកម្ពុជា ដោយលាក់បាំងនូវមហិច្ឆតាឈ្លានពានរបស់ថៃ លើដែនអធិបតេយ្យជាតិខ្មែរ ព្រោះការប៉ះទង្គិចគ្នា ៥ថ្ងៃ ថៃបានប្រើយន្តហោះ F-16 របស់អាមេរិក និងយន្តហោះចម្បាំង Gripen របស់ស៊ុយអែត យ៉ាងព្រៃផ្សៃមកលើកម្ពុជា។

លោកបន្តថា សេចក្តីរាយការណ៍របស់កាសែត The New York Times ដោយផ្អែកលើរបាយការណ៍របស់ចារកិច្ចរបស់ថៃ បានចោទកម្ពុជាយ៉ាងធ្ងន់ធ្ងរថាបានប្រើប្រាស់អាវុធធ្ងន់ៗតម្រង់ទីតាំងស៊ីវិល ដូចជា មន្ទីរពេទ្យ ផ្ទះសម្បែង សាលារៀន និងស្ថានីយប្រេងឥន្ធនៈ ជាដើម។

លោក សេង វណ្ណលី លើកឡើងថា បើថៃ ប្រាកដថាកម្ពុជា គឺជាអ្នកឈ្លានពាន ហេតុអ្វីថៃ មិនប្រើយន្តការអន្តរជាតិដែលមានស្រាប់ ដូចជា តុលាការយុត្តិធម៌អន្តរជាតិ (ICJ) ឲ្យជួយដោះស្រាយ? ហេតុអ្វីថៃ មិនព្រមឲ្យភាគីទីបីជួយសម្របសម្រួល? ហេតុអ្វីថៃ ព្យាយាមពន្យារការបង្កើតក្រុមសង្កេតការណ៍ពិតរបស់អាស៊ានរហូតដល់ពេលនេះ?

អ្នកជំនាញនយោបាយការទូតអន្តរជាតិរូបនេះ បញ្ជាក់ថា តាមការពិត ការឯកភាពរបស់ថៃ ជាមួយកម្ពុជា ដែលអនុញ្ញាតឲ្យអាស៊ានជួយសម្របសម្រួល និងបង្កើតឲ្យមានបទឈប់បាញ់ ដោយសារតែថៃ ចង់ដោះទាល់ចំពោះសម្ពាធពាណិជ្ជកម្មរបស់អាមេរិកតែប៉ុណ្ណោះ។

លោក សេង វណ្ណលី អះអាងថា បំណងពិតរបស់ថៃ មិនចង់បានកិច្ចសន្ទនាប្រកបដោយតុល្យភាព ឬភាគីទីបីចូលមកពាក់ព័ន្ធក្នុងជម្លោះព្រំដែនជាមួយកម្ពុជា ឡើយ ហើយនេះក៏ជាមូលហេតុចម្បងដែលសន្តិភាពពិបាកសម្រេចបានក្នុងជម្លោះព្រំដែនកម្ពុជា-ថៃ នាពេលនេះដែរ។

កាសែត The New York Times កាលពីថ្ងៃទី២៩ ខែកញ្ញា បានរាយការណ៍ដោយផ្អែកលើរបាយការណ៍របស់ចារកិច្ចថៃ ស្ដីពីការដឹកជញ្ជូនសព្វាវុធរបស់ចិន មុនផ្ទុះសង្គ្រាម ៥ថ្ងៃកាលពីចុងខែកក្កដា រវាងកម្ពុជា-ថៃ ថា កម្ពុជាប្រើប្រាស់អាវុធធ្ងន់ៗតម្រង់ទីតាំងជនស៊ីវិល ដូចជា មន្ទីរពេទ្យ ផ្ទះសម្បែង សាលារៀន និងស្ថានីយប្រេង ជាដើម។

ជុំវិញបញ្ហានេះ អតីតអ្នករាយការណ៍របស់វិទ្យុផ្សាយសំឡេងសហរដ្ឋអាមេរិក (VOA) លោក ម៉ែន គឹមសេង លើកឡើងថា ការចុះផ្សាយរបស់កាសែត The New York Times គឺជាការលួចបញ្ចេញពីខាងចារកម្មរបស់ប្រទេសថៃ ឱ្យទៅស្ថាប័នកាសែតដ៏ធំនេះជួយចុះផ្សាយ ដើម្បីធ្វើសង្គ្រាមព័ត៌មានជុំវិញជម្លោះព្រំដែនជាមួយកម្ពុជា។

អតីតអ្នកសារព័ត៌មានរូបនេះបញ្ជាក់ថា សូម្បីអ្នកវិភាគដែលត្រូវបានកាសែត The New York Times ស្រង់សម្ដីយកមកចុះផ្សាយជុំវិញជម្លោះព្រំដែនកម្ពុជា-ថៃ ដោយផ្អែកលើរបាយការណ៍របស់ចារកម្មថៃ នេះ ក៏មានទំនោរទៅរកប្រទេសថៃ ដែរ ដែលអះអាងថា ថៃការពារខ្លួនក្នុងពេលដែលកម្ពុជា ប្រើអាវុធធុនធ្ងន់ជាបន្តបន្ទាប់ទៅលើប្រទេសថៃ នោះ៕