នៅរដ្ឋធានី Rabat នៃប្រទេសម៉ារ៉ុក បាតុកម្មទ្រង់ទ្រាយធំកំពុងផ្ទុះឡើង។ ក្រុមបាតុករភាគច្រើនជាយុវជន កំពុងដាក់សម្ពាធឱ្យរំលាយរដ្ឋាភិបាលរបស់នាយករដ្ឋមន្ត្រី Aziz Akhannouch បន្ទាប់ពីផ្ទុះបាតុកម្មជាច្រើនថ្ងៃ បានបណ្ដាលឱ្យមនុស្ស ៣នាក់ស្លាប់។
គេហៅថាជាបាតុកម្ម Morocco នៃក្រុមចលនា GenZ ២១២។ ក្រុមបាតុករ GenZ ២១២ បានចេញសេចក្តីថ្លែងការណ៍ជាមួយនឹងការសរសេរលើផ្ទាំងបដាថា៖ «យើងទាមទារឱ្យមានការរំលាយរដ្ឋាភិបាល ព្រោះតែមិនត្រឹមមិនជួយការពារសិទ្ធិមនុស្ស តែបានកំពុងបង្កអយុត្តិធម៌សង្គមកាន់តែធ្ងន់ធ្ងរ។»
ក្រុមបាតុករដែលដឹកនាំការតវ៉ាទ្រង់ទ្រាយដ៏ធំនៅរដ្ឋធានី Rabat ផ្ទុះឡើងបន្ទាប់ពីផ្ទុះចលាចលជាច្រើនថ្ងៃ ដែលបានឃើញការស្លាប់របស់មនុស្សបីនាក់នៅតាមដងផ្លូវនៅទីក្រុង Agadir។ បាតុកម្មដែលមានទ្រង់ទ្រាយធំ មានមនុស្សចូលច្រើនម៉ឺននាក់ កាលពីថ្ងៃសុក្រ ទី៣ ខែតុលា បានកើតឡើងបន្ទាប់ពីបាតុកម្មជាច្រើនថ្ងៃមកហើយ ដោយទាមទារឱ្យមានកំណែទម្រង់លើវិស័យសុខាភិបាល និងអប់រំ។ តែនេះជាបាតុកម្មចូលដល់ថ្ងៃទីប្រាំមួយជាប់ៗគ្នា ហើយក៏ចាប់ផ្ដើមផ្ទុះហិង្សា។ នេះបើតាមទីភ្នាក់ងារសារព័ត៌មាន AFP។
សេចក្ដីថ្លែងការណ៍របស់ក្រុមបាតុកម្ម GenZ ២១២ និយាយថា «យើងទាមទារឱ្យមានការរំលាយរដ្ឋាភិបាលបច្ចុប្បន្ន ព្រោះតែបរាជ័យក្នុងការការពារសិទ្ធិពលរដ្ឋដែលត្រូវបានចែងក្នុងរដ្ឋធម្មនុញ្ញរបស់ប្រទេសម៉ារ៉ុក និងមិនបានឆ្លើយតបទៅនឹងត្រូវការរបស់យុវជន គឺសង្គមមួយគ្មានតម្លាភាពនៃការទ្រទ្រង់អនាគតយុវជន។»
ក្រុមបាតុកម្ម GenZ ២១២ នៃយុវជនប្រទេសម៉ារ៉ុក ក៏បានទាមទារឲ្យដោះលែងអ្នកជាប់ឃុំទាំងអស់ដែលត្រូវបានឃុំខ្លួនពាក់ព័ន្ធនឹងការតវ៉ា ៦ថ្ងៃមកនេះ។
តាមទីភ្នាក់ងារសារព័ត៌មាន AFP ការប្រមូលផ្ដុំគ្នាទូទាំងប្រទេសម៉ារ៉ុក កំពុងចាប់ផ្ដើមប្រឆាំងនឹងវិសមភាពសង្គម ជាពិសេសបន្ទាប់ពីរបាយការណ៍កាលពីខែមុននៃការស្លាប់របស់ស្ត្រីមានផ្ទៃពោះប្រាំបីនាក់នៅឯមន្ទីរពេទ្យរដ្ឋ ក្នុងទីក្រុង Agadir ដែលបាតុករចោទថាជាការខ្វះការយកចិត្តទុកដាក់ពីគ្រូពេទ្យ ខណៈវិស័យសុខាភិបាលរបស់ប្រទេសក្រីក្រមួយនេះ កំពុងជួបវិបត្តិក្នុងការបម្រើសុខភាពសាធារណៈ។
ប្រជាជនម៉ារ៉ុក ជាច្រើន ទាមទារថា វិស័យសុខភាពសាធារណៈ និងការអប់រំ គួរតែត្រូវបានកែលំអជាបន្ទាន់ នៅពេលដែលរាជាណាចក្រមួយនៅអាហ្វ្រិកខាងជើង ត្រូវបានជំរុញទៅមុខជាមួយនឹងគម្រោងហេដ្ឋារចនាសម្ព័ន្ធសំខាន់ៗ ដើម្បីធ្វើជាម្ចាស់ផ្ទះនៃព្រឹត្តិការណ៍អន្តរជាតិ Africa Cup នៅខែធ្នូ ឆ្នាំ២០២៥ នេះ និងជាផ្នែកមួយនៃការប្រកួតបាល់ទាត់ពិភពលោកឆ្នាំ២០៣០។
ក្រុមបាតុករ GenZ ២១២ បានទាមទារថា យោងតាមរដ្ឋធម្មនុញ្ញដែលចែងពីការផ្តល់អំណាចដល់ព្រះមហាក្សត្រក្នុងការតែងតាំង និងបណ្តេញនាយករដ្ឋមន្ត្រី នៅពេលនេះ ព្រះអង្គគួរតែអន្តរាគមន៍ជួយស្រោចស្រង់ប្រព័ន្ធដឹកនាំរដ្ឋនៃរាជាណាចក្រម៉ារ៉ុក ឡើងវិញ។
ប្រទេសម៉ារ៉ុក ត្រូវគេស្គាល់ថា រាជាណាចក្រម៉ារ៉ុក ដែលជារបបរាជានិយមអាស្រ័យរដ្ឋធម្មនុញ្ញ។ មហាក្សត្រជាប្រមុខរដ្ឋដែលមានអំណាចជានិមិត្តរូប ចំណែកនាយករដ្ឋមន្ត្រីជាប្រមុខរដ្ឋាភិបាល កាន់អំណាច ជាអង្គនីតិប្រតិបត្តិបំពេញការងារជាប្រចាំថ្ងៃ។
ដូចនៅប្រទេសនេប៉ាល់ ក្រុមបាតុករ GenZ ២១២ បានប្រើប្រាស់វេទិកា Discord ផ្ញើសារតាមអ៊ីនធឺណិតយ៉ាងទូលំទូលាយ ដើម្បីផ្សព្វផ្សាយការអំពាវនាវរបស់ពួកគេឱ្យងើបឡើងតវ៉ាទូទាំងប្រទេស។
នៅក្នុងរដ្ឋធានី Rabat កាលពីថ្ងៃព្រហស្បតិ៍ ទី២ តុលា ក្រុមបាតុករដែលកាន់ទង់ជាតិម៉ារ៉ុក បានទាមទារថា «សុខភាពរបស់ប្រជាជនត្រូវតែយកចិត្តទុកដាក់ជាមួយនឹងការធ្វើកំណែទម្រង់ប្រព័ន្ធសុខាភិបាលសាធារណៈសម្រាប់អ្នកក្រីក្រ។»
ការប្រមូលផ្ដុំផ្សេងទៀតត្រូវបានគេរាយការណ៍ថាមាននៅក្នុងទីក្រុង Casablanca, Marrakech និង Agadir។
នាយករដ្ឋមន្ត្រី Aziz Akhannouch បាននិយាយនៅក្នុងសុន្ទរកថាជាសាធារណៈលើកដំបូងរបស់លោកចាប់តាំងពីផ្ទុះបាតុកម្ម។ លោកថ្លែងថា រដ្ឋាភិបាលរបស់លោកមានឆន្ទៈចូលរួមក្នុងការសន្ទនា និងឆ្លើយតបទៅនឹងការទាមទាររបស់បាតុករ។
លោកនាយករដ្ឋមន្ត្រីសម្ដែងការសោកស្ដាយចំពោះមនុស្សបីនាក់ត្រូវបានសម្លាប់ក្នុងអំឡុងការតវ៉ា កាលពីយប់ថ្ងៃពុធ ទី១ តុលា។ លោកនាយករដ្ឋមន្ត្រីបានទទូចឱ្យបាតុករចូលមកសន្ទនាជាមួយរដ្ឋាភិបាល។ លោកសន្យាថា នឹងរកយុត្តិធម៌ជូនមនុស្ស ៣នាក់ដែលបានស្លាប់។
អ្នកនាំពាក្យក្រសួងមហាផ្ទៃ បាននិយាយថា បាតុករទាំងបីនាក់ត្រូវបានសម្លាប់ បន្ទាប់ពីពួកគេប៉ុនប៉ងវាយលុកចូលប៉ុស្តិ៍ប៉ូលិសក្នុងស្រុកមួយកាលពីយប់ថ្ងៃពុធ។ ភ្លាមៗ អាជ្ញាធរបាននិយាយថា បាតុករពីរនាក់ត្រូវបានសម្លាប់នៅពេលដែលមន្ត្រីបានបើកការបាញ់ប្រហារទៅលើក្រុមបាតុករ ដែលបាតុករវាយប្រហារលើប៉ូលិស។ អាជ្ញាធរបានចោទបាតុករថាមានអាវុធក្នុងដៃ ត្រៀមបាញ់រះលើប៉ូលិសនៅទីក្រុង Agadir។
ចាប់តាំងពីបាតុកម្មចាប់ផ្តើមមក យុវជនរាប់រយនាក់ភាគច្រើនត្រូវបានចាប់ខ្លួន។
ក្រុម GenZ ២១២ បានជំរុញឱ្យក្រុមបាតុករប្រឆាំងនឹងអំពើហិង្សា ហើយបានអំពាវនាវឱ្យមានការតវ៉ានៅពាសពេញប្រទេសនៅថ្ងៃចុងសប្ដាហ៍នេះ ដែលក្រុម GenZ ២១២ នៅប្រទេសម៉ារ៉ុក បានហៅការតវ៉ារបស់ខ្លួនថាជាការបញ្ចេញមតិប្រកបដោយភាពស៊ីវិល័យ ដោយចាត់ទុកក្រុម GenZ ២១២ របស់ខ្លួនជាសសរស្ដម្ភមួយនៃកោសិកាសង្គម។
គិតត្រឹមថ្ងៃសុកនេះ មនុស្សជាង ៤០០នាក់ត្រូវបានចាប់ខ្លួនក្នុងអំឡុងពេលនៃការប្រមូលផ្ដុំគ្នាប៉ះទង្គិចជាមួយនឹងប៉ូលិស។ បើយោងតាមការប្រកាសព័ត៌មានរបស់ក្រសួងមហាផ្ទៃ មនុស្ស ៣០០នាក់រងរបួស ក្នុងនោះក៏មានប៉ូលិសផងដែរ។ មនុស្ស ៦នាក់ នឹងត្រូវនាំខ្លួនទៅកាត់ទោស។
តាមក្រសួងមហាផ្ទៃ គ្រឹះស្ថានសាធារណៈ និងឯកជន ៨០ទីតាំង ត្រូវបានបំផ្លិចបំផ្លាញ។ បាតុករក៏បានបំផ្លាញរថយន្តជាង ២០០គ្រឿង។ ការប៉ះទង្គិចគ្នាបានផ្ទុះឡើងនៅក្នុងទីក្រុងមួយចំនួន រួមទាំងនៅទីក្រុង Sidi Bibi ក្បែរទីក្រុង Agadir ជាកន្លែងដែលក្រុមបាតុករបានដុតបំផ្លាញការិយាល័យសាលាឃុំក្នុងស្រុកនេះ។ នេះបើយោងតាមរបាយការណ៍ និងវីដេអូនៅលើប្រព័ន្ធផ្សព្វផ្សាយសង្គម។
នៅក្នុងទីក្រុង Sale ភាគខាងជើងនៃរដ្ឋធានី Rabat អ្នកកាសែតនៃទីភ្នាក់ងារ AFP ម្នាក់បានឃើញបាតុករពាក់អាវកាក់ បានដុតរថយន្តប៉ូលិសពីរគ្រឿង និងសាខាធនាគារមួយកន្លែង។
សេចក្តីថ្លៃថ្នូរ យុត្តិធម៌សង្គមស្ថិតក្នុងវិសមភាព
ក្រុមបាតុករបានអំពាវនាវឲ្យមានការផ្ដួលរំលំប្រព័ន្ធអំពើពុករលួយក្នុងជួររដ្ឋាភិបាល និងរដ្ឋអំណាចមូលដ្ឋាន ដោយត្រូវលើកតម្កើងសេរីភាព សេចក្តីថ្លៃថ្នូរ និងយុត្តិធម៌សង្គមឡើងវិញ។ ក្រុមបាតុករ GenZ ២១២ ដែលគេថាចម្លងរូបភាពពីក្រុម GenZ នៃប្រទេសនេប៉ាល់ ក៏បានថ្លែងពីការ “សេចក្តីស្រឡាញ់ចំពោះមាតុភូមិ និងព្រះមហាក្សត្រ” ដោយសំដៅទៅលើមហាក្សត្រ Mohammed VI នៃរាជាណាចក្រប្រទេសម៉ារ៉ុក។ ក្រុមបាតុករ GenZ ២១២ លើកឡើងថា ពួកគេប្រឆាំងរដ្ឋាភិបាល តែចំពោះមហាក្សត្រ និងរាជបល្ល័ង្គ នៅតែស្ថិតក្នុងសេចក្ដីស្រឡាញ់ និងគោរពជានិច្ច។
ចលនា GenZ នៅនេប៉ាល់ ផ្ដួលរដ្ឋាភិបាលបានជោគជ័យ
នៅប្រទេសនេប៉ាល់ ក្រុម GenZ បានដឹកនាំការតវ៉ារយៈពេល ៣ថ្ងៃ ពីថ្ងៃទី៨ ដល់ថ្ងៃទី១០ កញ្ញា។ បាតុកម្មមានទ្រង់ទ្រាយធំបំផុតមានមនុស្សចូលរួមជាង ២០ម៉ឺននាក់ នៅរដ្ឋធានីកាតម៉ានឌូ។ បាតុកម្មដែលប្រែក្លាយជាកុបកម្ម បានឈានដល់ការដុតអគាររដ្ឋសភា អគារស្ថាប័នរបស់រដ្ឋ ភូមិគ្រឹះនាយករដ្ឋមន្ត្រី និងពួកមន្ត្រីជាន់ខ្ពស់ រហូតចូលចាប់ខ្លួនរដ្ឋមន្ត្រីម្នាក់ទាញអូសតាមដងផ្លូវ។
គោលបំណងដំបូង គឺប្រឆាំងនឹងបម្រាមរបស់រដ្ឋាភិបាលដែលបិទបណ្ដាញសង្គម Facebook, Youtube និង Instagram ដែលជាប្រព័ន្ធផ្សព្វផ្សាយសង្គមដ៏ពេញនិយមរបស់យុវជន។ តែចុងក្រោយ ចលនា GenZ នៅនេប៉ាល់ ឈានដល់ការគាបសង្កត់ឱ្យរំលាយរដ្ឋាភិបាលរបស់នាយករដ្ឋមន្ត្រី Khadga Prasad Sharma Oli។ ក្រុមចលនា GenZ នៅនេប៉ាល់ ឆក់ឱកាសនេះបញ្ចប់រដ្ឋាភិបាលរបស់លោក Prasad Sharma Oli ព្រោះតែរដ្ឋាភិបាលមិនត្រឹមតែមិនបានជួយរកអនាគតឱ្យយុវជន បែរជាបំផ្លាញអនាគតយុវជន ដោយបង្កើតវណ្ណៈសង្គមនូវពណ៌សម្បុរអ្នកមាន និងអ្នកក្រ បណ្ដោយឱ្យប្រទេសធ្លាក់ក្នុងអំពើពុករលួយ និងអយុត្តិធម៌សង្គមយ៉ាងអាក្រក់ ប៉ះពាល់អ្នកក្រីក្រ ជាពិសេសប៉ះពាល់ខ្លាំងចំពោះអនាគតយុវជន។
ទីបំផុត លោក Prasad Sharma Oli ត្រូវបានទាញទម្លាក់ពីអំណាចពីឋានៈជានាយករដ្ឋមន្ត្រី ហើយគណៈរដ្ឋមន្ត្រីរបស់លោកក៏ត្រូវបានរំលាយ។ រដ្ឋាភិបាលបណ្ដោះអាសន្នមួយដែលជឿថាស្អាតស្អំ បានរះឡើង។ យុវជន GenZ នៅនេប៉ាល់ អះអាងថាខ្លួនគេក៏ជាផ្នែកមួយនៃការកំណត់ជោគវាសនារបស់ប្រទេសនេប៉ាល់ ផងដែរ៕
© 2025, ឌឹ ខេមបូឌា ដេលី. All rights reserved.