អតីតនាយករដ្ឋមន្ត្រីនិងអតីតរដ្ឋមន្ត្រីមហាផ្ទៃនេប៉ាល់ ប្រឈមមុខនឹងការចាប់ខ្លួនពីបទបញ្ជាឱ្យបាញ់សម្លាប់បាតុករ

ឌឹ ខេមបូឌា ដេលី

8 months ago

ប៉ូលិសព្រហ្មទណ្ឌនៃស្នងការប៉ូលិសក្រុង Kathmandu នៃប្រទេសនេប៉ាល់ ប្រកាសពីការទទួលយកពាក្យបណ្ដឹងរបស់គ្រួសារជនរងគ្រោះ ដែលប្ដឹងអតីតនាយករដ្ឋមន្ត្រី KP Sharma Oli និងអតីតរដ្ឋមន្ត្រីក្រសួងមហាផ្ទៃ Ramesh Lekhak ពីបទបញ្ជាឱ្យបាញ់សម្លាប់បាតុករនៅក្នុងការបាញ់បង្ក្រាបអំឡុងផ្ទុះបាតុកម្មដ៏ហិង្សាកាលពីថ្ងៃទី៨ ខែកញ្ញា ឆ្នាំ២០២៥ កន្លងទៅនេះ។

អតីតនាយករដ្ឋមន្ត្រី លោក KP Sharma Oli និងអតីតរដ្ឋមន្ត្រីក្រសួងមហាផ្ទៃ លោក Ramesh Lekhak

សារព័ត៌មាន Kathmandu Post នៅថ្ងៃទី៨ ខែកញ្ញា ឆ្នាំ២០២៥ នេះ បានចុះផ្សាយថា ដើមឡើយ ប៉ូលិសព្រហ្មទណ្ឌនៃស្នងការប៉ូលិសក្រុង Kathmandu បដិសេធមិនព្រមទទួលយកពាក្យបណ្ដឹងនេះទេ តែក្រោយពីការប្រជុំគ្នាក្នុងចំណោមឧត្ដមសេនីយ៍ប៉ូលិសនៃក្រសួងមហាផ្ទៃ និងនាយករដ្ឋមន្ត្រីបណ្ដោះអាសន្ន អ្នកស្រី Sushila Karki ទើបស្នងការប៉ូលិសក្រុង Kathmandu បានប្រកាសជាសាធារណៈពីការទទួលបណ្ដឹងរបស់គ្រួសារជនរងគ្រោះ។

បើតាមសារព័ត៌មាន Kathmandu Post ការទទួលបណ្ដឹងរបស់គ្រួសារជនរងគ្រោះដែលសាច់ញាតិពួកគេបានស្លាប់ក្នុងការបង្ក្រាបរបស់ប៉ូលិសបង្ក្រាបកុបកម្ម ដោយសារតែក្រុមចលនា GenZ គំរាមថា នឹងប្រមូលផ្ដុំយុវជនតវ៉ាតាមដងផ្លូវ ប្រសិនបើអាជ្ញាធរប៉ូលិសនេប៉ាល់ មិនទទួលពាក្យបណ្ដឹងរបស់គ្រួសារជនរងគ្រោះ។

ជាមួយគ្នានេះ ប្រធានស្នងការប៉ូលិសក្រុង Kathmandu លោក Prem Kumar Rai កំពុងត្រូវបានក្រុមចលនា GenZ ទាមទារឱ្យចុះចេញពីតំណែង។ ក្រុមចលនា GenZ ក៏បានទាមទារឱ្យកាត់ទោសឧត្ដមសេនីយ៍ប៉ូលិសដែលពាក់ព័ន្ធនឹងការបញ្ជាឱ្យបាញ់សម្លាប់បាតុករ។

នៅក្នុងការបាញ់បង្ក្រាបបាតុករ នៅថ្ងៃទី៨ ខែកញ្ញា ជាថ្ងៃដំបូងនៃការផ្ទុះបាតុកម្មប្រឆាំងរដ្ឋាភិបាលរបស់អតីតនាយករដ្ឋមន្ត្រី KP Sharma Oli ដែលបាតុករប្រឆាំងនឹងការចេញសារាចរបិទបណ្ដាញសង្គមរបស់ពួកបស្ចិមប្រទេស ដូចជា Facebook, Youtube និង Instagram បណ្តាលឲ្យមនុស្ស ២១នាក់ស្លាប់ ហើយ ២ថ្ងៃក្រោយទៀត ការបាញ់សម្លាប់បាតុករដោយសមត្ថកិច្ចប៉ូលិស បានកើនឡើងដល់ ៧៥នាក់។

នៅថ្ងៃទី៩ ខែកញ្ញា លោក KP Sharma Oli បានសម្រេចចុះចាញ់បាតុករ និងកម្លាំងប្រជាជនដោយប្រកាសចុះចេញពីតំណែងនាយករដ្ឋមន្ត្រី តែពេលនោះ អគាររដ្ឋសភាកំពុងត្រូវបានកុបករឡោមព័ទ្ធ និងដុតកម្លោចយ៉ាងខ្លាំង។

សារព័ត៌មាន Kathmandu Post បានចុះផ្សាយទៀតថា នៅថ្ងៃពុធ ទី៨ ខែតុលា នេះ ក្រុមចលនា GenZ បានបន្ថែមពាក្យបណ្ដឹងមួយទៀត ដោយប្ដឹងអតីតនាយករដ្ឋមន្ត្រី KP Sharma Oli ពីបទបំពានអំណាចរដ្ឋ បំផ្លាញនីតិរដ្ឋ និងលទ្ធិប្រជាធិបតេយ្យនេប៉ាល់ ដែលមានផែនការបង្កើតប្រព័ន្ធរដ្ឋអំណាចផ្ដាច់ការ។

តាមប្រភពដដែលនេះ គណៈកម្មាធិការយុត្តិធម៌ឯករាជ្យមួយរបស់នេប៉ាល់ បានទទួលពាក្យបណ្ដឹងរបស់ក្រុមចលនា GenZ ហើយ។ គណៈកម្មាធិការនេះក៏បានប្រកាសពីដំណើរការស៊ើបអង្កេតផងដែរ។

បើតាមពួកមន្ត្រីប៉ូលិសស្នងការក្រុង Kathmandu ការចេញដីកាចាប់ខ្លួនអតីតនាយករដ្ឋមន្ត្រី KP Sharma Oli និងអតីតរដ្ឋមន្ត្រីមហាផ្ទៃ Ramesh Lekhak អាចនឹងធ្វើឡើងនៅក្នុងសប្ដាហ៍នេះ ខណៈលិខិតឆ្លងដែនរបស់បុគ្គលទាំងពីររូបនេះ និងមន្ត្រីជាន់ខ្ពស់ជាច្រើននាក់ទៀតនៃរដ្ឋាភិបាលដែលត្រូវបានរំលាយ ក៏ត្រូវបានរឹបអូសដែរ។

ក្នុងអន្តរកាលរបស់រដ្ឋាភិបាលនៃនាយករដ្ឋមន្ត្រីស្ដីទី អ្នកស្រី Sushila Karki ស្ថានភាពនយោបាយក៏ស្ថិតក្នុងភាពផុយស្រួយខ្លាំង គឺការធ្វើដំណើរលើវិថីប្រជាធិបតេយ្យថ្មីនេប៉ាល់ ក៏ស្ថិតក្រោមឥទ្ធិពលរបស់ក្រុមចលនា GenZ។

រដ្ឋមន្ត្រីថ្មីនៃក្រសួងទូរគមនាគមន៍ និងបច្ចេកវិទ្យាព័ត៌មាន លោក Jagadish Kharel បានចេញសេចក្ដីថ្លែងការណ៍អំពាវនាវដល់បក្សនយោបាយ និងកម្លាំងនយោបាយទាំងអស់ ត្រៀមធ្វើសកម្មភាពនយោបាយជារៀងរាល់ថ្ងៃ ដើម្បីឆ្ពោះទៅរកការបោះឆ្នោតសភា នៅថ្ងៃទី៥ ខែមីនា ឆ្នាំ២០២៦។

បើតាមលោករដ្ឋមន្ត្រី Jagadish Kharel នាយករដ្ឋមន្ត្រីស្តីទី អ្នកស្រី Sushila Karki បានប្ដេជ្ញាចិត្តយ៉ាងម៉ត់ចត់ថាការបោះឆ្នោតខាងមុខនេះ ត្រូវតែប្រព្រឹត្តទៅដោយរលូត ទាំងសេរីភាពនយោបាយបើកចំហ និងតម្លាភាព ជាមួយនឹងសេរីភាពពេញលេញសម្រាប់ប្រព័ន្ធផ្សព្វផ្សាយ។

កាលពីសប្ដាហ៍មុន អ្នកស្រី Sushila Karki បានសន្យាបោសសម្អាតអំពើពុករលួយក្នុងប្រទេស និងធ្វើឲ្យមានសមភាពសេដ្ឋកិច្ច ដើម្បីឆ្លើយតបទៅនឹងការទាមទាររបស់ក្រុមចលនា GenZ។

អ្នកស្រីក៏បានសន្យាថា ទោះបីជាស្ថានការណ៍នយោបាយក្នុងប្រទេសនេប៉ាល់ ប្រែក្លាយទៅជាយ៉ាងណាក្ដី ក៏រដ្ឋាភិបាលបណ្ដោះអាសន្នរបស់អ្នកស្រី នឹងមិនដឹកនាំប្រទេសលើសពី ៦ខែឡើយ។ អ្នកស្រីសន្យាទៀតថា សម្រេចកាន់អំណាចរហូតដល់ត្រឹមថ្ងៃបោះឆ្នោតនៅខែមីនា ឆ្នាំក្រោយ ដែលអ្នកស្រីនឹងផ្ទេរអំណាចទៅនាយករដ្ឋមន្ត្រីឈ្នះឆ្នោតភ្លាមៗ។

ខណៈស្ថានភាពប្រទេសចាប់ផ្តើមវិលទៅរកភាពប្រក្រតីឡើងវិញជាមួយនឹងប្រព័ន្ធរដ្ឋាភិបាលថ្មីទទួលបានទំនុកចិត្តពីប្រជាជននេប៉ាល់ ទាំងប្រុស ទាំងស្រី និងគ្រប់វណ្ណៈសង្គមនេប៉ាល់ នាយករដ្ឋមន្ត្រីស្តីទី អ្នកស្រី Sushila Karki សន្យាបើកចំហសង្គមនេប៉ាល់ ជាមួយនឹងការលើកទឹកចិត្តយុវជននេប៉ាល់ ឱ្យចូលរួមធ្វើសកម្មភាពសង្គម ដោយរួមគ្នាបោសសម្អាតដង្កូវសង្គមដែលបង្កការរាំងស្ទះដល់ការរីកចម្រើនរបស់ប្រទេសជាតិនេប៉ាល់ ដែលអ្នកស្រីសច្ចាថាមិនទុកឱ្យអំពើពុករលួយក្លាយជាដំបៅមហារីកសង្គមនេប៉ាល់ ទៀតឡើយ។

ដោយឃើញដូចនេះ ប្រជាជននេប៉ាល់ ភាគច្រើនបានសាទរចំពោះអ្នកស្រី Sushila Karki ដែលកំពុងដឹកនាំរដ្ឋាភិបាលបណ្ដោះអាសន្ន ជាមួយនឹងក្ដីសង្ឃឹមថាអ្នកស្រីនឹងអាចដឹកនាំប្រទេសឲ្យល្អប្រសើរឡើងវិញ ដោយផ្ដល់យុត្តិធម៌សម្រាប់ប្រជាជននេប៉ាល់ ដែលក្រីក្រ៕