ប្រធានព្រឹទ្ធសភាកម្ពុជា លោក ហ៊ុន សែន អះអាងសាជាថ្មីថា ដើម្បីកុំឱ្យទាំងពលរដ្ឋខ្មែរ និងពលរដ្ឋថៃ យល់ច្រឡំ លោកបញ្ជាក់ថា កម្ពុជាមិនដែលទៅសុំថៃ ឲ្យបើកច្រកឡើងវិញនោះទេចាប់តាំងពីថៃ បិទច្រកទ្វារព្រំដែនជាឯកតោភាគីមក ហើយថ្នាក់ដឹកនាំថៃ មួយចំនួន នឹងយកប្រធានបទនេះសម្រាប់ឃោសនាការបោះឆ្នោតនាពេលខាងមុខ។
នៅយប់ថ្ងៃទី៤ ខែវិច្ឆិកា លោក ហ៊ុន សែន បានបង្ហោះសារនៅលើទំព័រហ្វេសប៊ុករបស់លោកថា៖ «ដោយសារមួយរយៈចុងក្រោយនេះ ថ្នាក់ដឹកនាំថៃ មួយចំនួន បានយករឿងបើកច្រកព្រំដែនឡើងវិញ មកនិយាយយ៉ាងច្រើន ដែលប្រហែលក្លាយជាប្រធានបទសម្រាប់ឃោសនាបោះឆ្នោតនាពេលខាងមុខក្នុងប្រទេសថៃ»។
លោក ហ៊ុន សែន អះអាងថា ការដែលថ្នាក់ដឹកនាំថៃ រាប់ទាំងនាយករដ្ឋមន្ត្រីថៃ ផង និយាយរឿងបើកច្រកព្រំដែនច្រើនបែបនេះ បង្កឲ្យមានការយល់ច្រឡំក្នុងចំណោមប្រជាជនកម្ពុជា ឬប្រជាជនថៃ ថាភាគីកម្ពុជា ជាអ្នកទៅសុំឲ្យភាគីថៃ បើកច្រកព្រំដែនឡើងវិញ។
លោកអះអាងបន្តថា ថៃអាចបន្តបិទ ១០០ឆ្នាំ ឬ ៥០០ឆ្នាំទៀតក៏ជារឿងរបស់ថៃ ព្រោះកូនសោស្ថិតក្នុងដៃរបស់ថៃ។ លោកថា ការបិទកន្លងមកនេះមិនធ្វើឲ្យកម្ពុជាស្លាប់នោះទេ តែផ្ទុយទៅវិញ ធ្វើឲ្យទំនិញក្នុងស្រុកចូលមកជំនួសទំនិញថៃ ដែលនោះគឺជាឱកាសជំរុញផលិតកម្មក្នុងស្រុកឲ្យមានការកើនឡើង។
លោក ហ៊ុន សែន លើកឡើងថា លោកសាទរនូវដំណើរឆ្ពោះទៅរកការបញ្ចប់ ឬបន្ថយអរិយភាពរវាងប្រទេសកម្ពុជា និងថៃ ដែរ បន្ទាប់ពីនាយករដ្ឋមន្ត្រីកម្ពុជា និងនាយករដ្ឋមន្ត្រីថៃ បានចុះហត្ថលេខាលើសេចក្តីថ្លែងការណ៍រួម ស្ដីពីកិច្ចព្រមព្រៀងសន្តិភាពកាលពីថ្ងៃទី២៦ ខែតុលា និងការចុះហត្ថលេខាជាសាក្សីរបស់លោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី ដែលជាប្រធានអាស៊ាន និងប្រធានាធិបតីអាម៉េរិក លោក ដូណាល់ ត្រាំ។
ប្រធានអង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា លើកឡើងថា តាំងពីដើមមក កម្ពុជាបានបញ្ជាក់ជំហរច្រើនដងអំពីការបន្តប្រើប្រាស់យន្តការគោរពបទឈប់បាញ់ ប៉ុន្តែភាគីថៃ ពុំបានធ្វើតាមនោះទេ ក្រៅតែពីបំពានយកទឹកដីខ្មែរនៅកន្លែងផ្សេងៗគ្នា។
លោកបន្តថា នៅក្នុងកាលៈទេសៈនេះ អ្វីដែលកម្ពុជាគួរធ្វើ និងបន្តធ្វើ គឺងាករកសហគមន៍អន្តរជាតិឲ្យជួយដោះស្រាយ ពិសេសពន្លឿនការយកសំណុំរឿងព្រំដែនដ៏រសើបទាំងអស់ប្ដឹងទៅតុលាការយុត្តិធម៌អន្តរជាតិឱ្យបានឆាប់។
កាលពីថ្ងៃទី២៤ ខែមិថុនា ឆ្នាំ២០២៥ ភាគីថៃ បានបិទច្រកព្រំដែនគោកទាំង ៧ខេត្ត រវាងប្រទេសទាំងពីរទាំងស្រុងដោយឯកតោភាគី៕
© 2025, ឌឹ ខេមបូឌា ដេលី. All rights reserved.