ក្រសួងព័ត៌មាន៖ ទីភ្នាក់ងារព័ត៌មានអន្តរជាតិធំៗកំពុងផ្សាយពីសង្គ្រាមឈ្លានពានរបស់ថៃ មកលើកម្ពុជា

ឌឹ ខេមបូឌា ដេលី

6 months ago

លោក នេត្រ ភក្ត្រា រដ្ឋមន្ត្រីក្រសួងព័ត៌មាន

ក្រសួងព័ត៌មាន ចាត់ទុកវត្តមានទីភ្នាក់ងារព័ត៌មានអន្តរជាតិធំៗ ដូចជា Reuters និង Xinhua ជាដើម នៅព្រំដែន កំពុងរាយការណ៍ពីសង្គ្រាមឈ្លានពានរបស់ថៃ លើកម្ពុជា ទៅកាន់ពិភពលោកឱ្យបានដឹងការពិត ដើម្បីប្រឆាំងនឹងការភូតកុហក និងព័ត៌មានក្លែងក្លាយរបស់ភាគីថៃ។

រដ្ឋាភិបាល និងយោធាថៃ ប្រាប់ពិភពលោកថា គេបន្តវាយប្រហារលើប្រទេសកម្ពុជា ដើម្បីរក្សាការពារអធិបតេយ្យ បូរណភាពទឹកដី និងពលរដ្ឋថៃ ពីការគំរាមកំហែងពីកងទ័ពខ្មែរ។

រដ្ឋមន្ត្រីក្រសួងព័ត៌មាន លោក នេត្រ ភក្ដ្រា សរសេរលើទំព័រហ្វេសប៊ុករបស់ខ្លួននៅថ្ងៃទី១៥ ធ្នូ នេះថា ពេលនេះ ទីភ្នាក់ងារសារព័ត៌មានអន្តរជាតិនានាកំពុងបង្ហាញវត្តមាននៅកម្ពុជា ក្នុងអំឡុងពេលយោធាថៃ ធ្វើសកម្មភាពឈ្លានពានដោយប្រដាប់អាវុធមកលើកម្ពុជា ដូចជាទីភ្នាក់ងារព័ត៌មាន AFP, AP (Associated Press), Reuters, EPA, ទីភ្នាក់ងារព័ត៌មានរដ្ឋ ស៊ិនហួរ (Xinhua), ទូរទស្សន៍ CNA ពីសិង្ហបុរី, ទូរទស្សន៍ Aljazeera ពីមជ្ឈិមបូព៌ា និងអ្នកឆ្លើយឆ្លងទូរទស្សន៍ភាសាចិន Phoenix នៅហុងកុង ជាដើម។

បន្ថែមពីនេះ ក៏មានបណ្ដាញសារព័ត៌មានអន្តរជាតិផ្សេងទៀតដែលបានផ្សព្វផ្សាយអត្ថបទពីទីភ្នាក់ងារសារព័ត៌មានធំៗដែរ ដូចជា CNN, France 24, Le Monde, BBC, Bloomberg, Wall Street Journal, The Guardian, The Times, The Independent និង The Straits Times ជាដើម ក្នុងនោះ អ្នកសារព័ត៌មានជាតិកម្ពុជានានា ក៏បានចុះយកព័ត៌មានយ៉ាងសស្រាក់សស្រាំនៅតាមបណ្តាខេត្តដែលជាសមរភូមិប្រយុទ្ធផងដែរ។

លោក នេត្រ ភក្ដ្រា អះអាងថា ជុំវិញសង្គ្រាមឈ្លានពានរបស់ថៃ នាពេលនេះ វិទ្យុ និងទូរទស្សន៍ជាតិកម្ពុជា និងទីភ្នាក់ងារព័ត៌មានកម្ពុជា (AKP) បានដើរតួជាមជ្ឈមណ្ឌលសម្រាប់ផ្តល់ព័ត៌មានពីសមរភូមិមុខ។ ចំណែកស្ថានីយវិទ្យុ និងទូរទស្សន៍ឯកជន ប្រព័ន្ធផ្សព្វផ្សាយបែបថ្មីផ្សេងទៀត រួមទាំងអ្នកសារព័ត៌មានគ្មានអង្គភាព អ្នកមានឥទ្ធិពលក្នុងសង្គម និងអ្នកលេងបណ្ដាញសង្គម ក៏បានចូលរួមយ៉ាងសកម្មក្នុងការផ្តល់ព័ត៌មានជុំវិញសង្គ្រាមឈ្លានពានរបស់ថៃ ដែរ។

រដ្ឋមន្ត្រីក្រសួងព័ត៌មាន រូបនេះ បញ្ជាក់ថា កម្ពុជាបានត្រៀមទទួលស្វាគមន៍អ្នកសារព័ត៌មានអន្តរជាតិផ្សេងៗទៀតរួចជាស្រេច ក្នុងការមកយកព័ត៌មាននៅកម្ពុជា ក្នុងនោះ ក្រសួងបានយកចិត្តទុកដាក់បំផុតចំពោះសុវត្ថិភាពនៃអ្នកសារព័ត៌មានអំឡុងពេលមានសង្គ្រាមដែលកំពុងរងការឈ្លានពានពីភាគីថៃ ពេលនេះ ដើម្បីឱ្យពួកគេនាំយកសំឡេងពិតដើម្បីប្រឆាំងនឹងការភូតកុហករបស់ថៃ រហូតមកនោះ។

ការអះអាងនេះ ធ្វើឡើងក្នុងបំណងជំរុញការផ្សព្វផ្សាយពីការពិតជុំវិញសង្គ្រាមរវាងកម្ពុជា-ថៃ ដែលកំពុងផ្ទុះឡើងតាមបណ្តោយតំបន់ព្រំដែនជាលើកទី២ នាពេលនេះ។

ទីភ្នាក់ងារព័ត៌មាន Associated Press ផ្សាយថ្ងៃទី១៥ ខែធ្នូ ដោយស្រង់សម្ដីអ្នកនាំពាក្យក្រសួងការពារជាតិ ថា យន្តហោះចម្បាំងថៃ ទម្លាក់គ្រាប់បែកទៅលើស្រុកចុងកាល់ ខេត្តឧត្ដរមានជ័យ និងស្រុកស្រីស្នំ ខេត្តសៀមរាប។

ជុំវិញជម្លោះព្រំដែនកម្ពុជា-ថៃ នាពេលនេះ គេសង្កេតឃើញថាភាគីទាំងសងខាងបានចោទប្រកាន់គ្នាទៅវិញទៅមក ដោយចាត់ទុកភាគីម្ខាងទៀតព្យាយាមផ្សព្វផ្សាយព័ត៌មានក្លែងក្លាយ។ ឧទាហរណ៍ជាក់ស្តែង កាសែតថៃ ខៅស៊ុត បានរាយការណ៍ថា កងទ័ពភូមិភាគទី២ ថៃ បានព្រមានថា កម្ពុជានឹងប្រើគ្រាប់រ៉ុក្កែត BM-21 តម្រង់ទៅតំបន់ជនស៊ីវិលក្នុងប្រទេសថៃ ក្នុងបំណងបង្កឲ្យមានមនុស្សរបួស ស្លាប់បាត់បង់ជីវិត ភ័យខ្លាច និងភិតភ័យនៅតាមព្រំដែន។

កាលពីថ្ងៃទី១២ ខែធ្នូ យន្តហោះថៃ ទម្លាក់គ្រាប់ផ្តាច់ស្ពានជ័យជម្នះភ្ជាប់ខេត្តពោធិ៍សាត់ និងខេត្តកោះកុង កម្ទេចកាស៊ីណូឧកញ៉ា ទ្រី ភាព Eternal Diamond Casino និងកាស៊ីណូថៅកែ ហេង ហឺ ក្នុងតំបន់សេដ្ឋកិច្ចពិសេស។ ក្នុងពេលជាមួយគ្នានេះ យោធាថៃ បានប្រកាសថានឹងបិទច្រកនាំចូលទំនិញជាប្រេងឥន្ធនៈឆ្លងកាត់ឈូងសមុទ្រថៃ ចូលទៅកំពង់ផែប្រទេសកម្ពុជា ប៉ុន្តែមិនប៉ះពាល់ដល់នាវាចរណ៍អន្តរជាតិឡើយ។

ទោះជាយ៉ាងណាក៏ដោយ ក្រសួងការពារជាតិកម្ពុជា បានចេញសេចក្តីប្រកាសព័ត៌មាន ដោយច្រានចោលនូវការចោទប្រកាន់របស់ភាគីថៃ ទាំងស្រុង ដែលបានចោទកម្ពុជាថាបានដាក់គោលដៅទៅលើតំបន់ប្រជាជនស៊ីវិល។ ប្រភពដដែលអះអាងថា ភាគីថៃទៅវិញទេដែលបានវាយប្រហារលើទីតាំងជនស៊ីវិលរបស់កម្ពុជា ដូចជា ផ្ទះសម្បែងជនស៊ីវិល ស្ពាន ថ្នល់ សាលារៀន និងមន្ទីរពេទ្យ ជាដើម ចំណែកកម្ពុជាគ្មានយន្តហោះចម្បាំង គ្មានយន្តហោះបាញ់ផ្សែងពុល គ្មានយន្តហោះទម្លាក់គ្រាប់បែកចង្កោម គ្មានដ្រូនទម្លាក់គ្រាប់បែកដូចដែលថៃ បានប្រើ ដើម្បីវាយប្រហារមកលើកម្ពុជា នោះទេ។

ក្រសួងការពារជាតិ បញ្ជាក់ថា កម្ពុជាកំណត់គោលដៅផ្ដោតលើតែយោធាថៃ ដែលបានឈ្លានពានរំលោភលើអធិបតេយ្យ និងបូរណភាពទឹកដីកម្ពុជា ប៉ុណ្ណោះ។

ជុំវិញបញ្ហានេះ ប្រជាពលរដ្ឋខ្មែរដែលរស់នៅប្រទេសអូស្ត្រាលី (Australia) សហរដ្ឋអាមេរិក (USA) កូរ៉េខាងត្បូង (South Korea) និងប្រទេសជប៉ុន (Japan) ជាដើម បាននាំគ្នាចេញបាតុកម្មប្រឆាំងការឈ្លានពានរបស់ថៃ លើកម្ពុជា ដើម្បីឱ្យពិភពលោកបានដឹងកាលពីថ្ងៃទី១៣ និងថ្ងៃទី១៤ ខែធ្នូ ឆ្នាំ២០២៥ នេះ។

ដោយឡែកពលរដ្ឋខ្មែរក្នុងទឹកដីសហរដ្ឋអាមេរិក ប្រមាណជា ៣០០នាក់ កាលពីថ្ងៃទី១៤ ខែធ្នូ ឆ្នាំ២០២៥ ក៏បាននាំគ្នាធ្វើការប្រមូលផ្ដុំគ្នានៅខាងមុខសេតវិមានប្រធានាធិបតីសហរដ្ឋអាមេរិក ក្នុងរដ្ឋធានីវ៉ាស៊ីនតុន ផងដែរ ដើម្បីទាមទារឱ្យលោក ដូណាល់ ត្រាំ បញ្ឈប់ថៃ ទម្លាក់គ្រាប់បែកលើប្រទេសកម្ពុជា និងបើកឱ្យមានអ្នកសង្កេតការណ៍ឯករាជ្យដោយផ្ទៀងផ្ទាត់តាមផ្កាយរណបសហរដ្ឋអាមេរិក ជុំវិញការបាញ់ប្រហារពីប្រទេសថៃ លើប្រទេសកម្ពុជា និងទាមទារឱ្យថៃ ទទួលខុសត្រូវចំពោះមុខច្បាប់អន្តរជាតិ បើរកឃើញថាឈ្លានពានមែន៕