ប្រធានាធិបតីអាមេរិក លោក ដូណាល់ ត្រាំ បានចោទប្រកាន់ថៃ ថាមិនអាចគ្រប់គ្រងស្ថានការណ៍តានតឹងជាមួយកម្ពុជាបាន ហើយក៏ផ្ដើមសង្គ្រាមវាយប្រហារលើកម្ពុជា។ លោក ត្រាំ លើកឡើងថា ការប្រយុទ្ធគ្នារវាងថៃ និងកម្ពុជា បានផ្ទុះឡើងជាថ្មី ទោះបីជាមានកិច្ចព្រមព្រៀងសន្តិភាពកើតឡើងក្រោមការសម្របសម្រួលរបស់លោកក៏ដោយ។
ក្នុងសន្និសីទសារព័ត៌មានមួយ លោក ត្រាំ បានថ្លែងអំពីកិច្ចព្រមព្រៀងសន្តិភាពទីក្រុងកូឡាឡាំពួរ ដែលត្រូវបានចុះហត្ថលេខានៅថ្ងៃទី២៦ ខែតុលា ឆ្នាំ២០២៥ ហើយរូបលោកបានចូលរួមជាអធិបតីផ្ទាល់ ដោយមានគោលបំណងធ្វើឱ្យទំនាក់ទំនងរវាងប្រទេសជិតខាងអាស៊ីអាគ្នេយ៍ទាំងពីរមានស្ថិរភាពឡើងវិញ។
លោក ត្រាំ បានបញ្ជាក់ថា កិច្ចព្រមព្រៀងនេះត្រូវបានមើលឃើញថាជាជោគជ័យការទូតដ៏សំខាន់មួយ បន្ទាប់ពីមានការកើនឡើងនៃភាពតានតឹងយ៉ាងខ្លាំងតាមបណ្តោយព្រំដែនរួមនៃប្រទេសទាំងពីរនេះ។
ក្នុងព្រឹត្តិការណ៍នៃពិធីចុះហត្ថលេខានោះ ត្រូវបានផ្ដោតសំខាន់លើតួនាទី និងសកម្មភាពរបស់លោក ត្រាំ ផ្ទាល់ ហើយកើតឡើងស្របពេលជាមួយនឹងការបង្ហោះលើបណ្ដាញសង្គមរបស់លោកអំពីការពិពណ៌នារូបភាពខ្លួនឯងជាប្រធានាធិបតីនៃសន្តិភាព ពេលនោះលោក ដូណាល់ ត្រាំ បានលើកឡើងពីស្នាដៃរបស់លោកក្នុងការបញ្ចប់សង្គ្រាមមួយចំនួននៅលើពិភពលោក ជាមួយនឹងការពន្យល់ទូលំទូលាយអំពីកំណត់ត្រាគោលនយោបាយការបរទេសរបស់លោក។
ថ្លែងទៅកាន់អ្នកសារព័ត៌មាន លោកបាននិយាយដូចនេះថា៖ «អ្នកដឹងទេ ខ្ញុំបានដោះស្រាយសង្គ្រាមចំនួន៨។ តែឥឡូវនេះ ប្រទេសថៃ កំពុងចាប់ផ្តើមសង្គ្រាមនេះឡើងវិញ។ អ្នកដឹងទេ ថៃបានចាប់ផ្តើមប្រហារកម្ពុជា ហើយបានបង្កសង្គ្រាមឡើងវិញ។»
ការកត់សម្គាល់របស់លោក ត្រាំ ហាក់ដូចជាការចោទប្រកាន់លើទីក្រុងបាងកក ដែលបានបង្កការប្រយុទ្ធជាថ្មី ទោះបីជាលោកមិនបានផ្តល់ព័ត៌មានលម្អិតជាក់លាក់អំពីឧប្បត្តិហេតុដែលត្រូវបានចោទប្រកាន់ក៏ដោយ។
រហូតមកដល់ពេលនេះ រដ្ឋាភិបាលថៃ និងកម្ពុជា មិនទាន់បានឆ្លើយតបជាផ្លូវការចំពោះការលើកឡើងចុងក្រោយនេះនៅឡើយទេ។
ទោះជាយ៉ាងណា ប្រទេសទាំងពីរធ្លាប់បានអះអាងថា ពួកគេនៅតែប្ដេជ្ញាចិត្តគោរព និងអនុវត្តកិច្ចព្រមព្រៀងទីក្រុងកូឡាឡាំពួរ ដែលបានកំណត់វិធានការកសាងទំនុកចិត្ត និងយន្តការសម្រាប់ការសន្ទនាបន្តបន្ទាប់ពីការប៉ះទង្គិចកន្លងមក។
ចំណែកប្រទេសចិន វិញ ក៏កំពុងជំរុញឱ្យកម្ពុជា និងថៃ ឆាប់បញ្ឈប់ការវាយប្រហារគ្នាដែរ។
នៅថ្ងៃទី២៣ ធ្នូ នេះ ក្រសួងការបរទេសចិន បានបង្ហាញលទ្ធផលទស្សនកិច្ចរបស់ប្រេសិតពិសេសរបស់ខ្លួនដែលបានទៅកាន់កម្ពុជា និងថៃ។ ប្រេសិតពិសេសចិន គឺលោក Deng Xijun។ លោកទទូចថា អាទិភាពបន្ទាន់បំផុត គឺបទឈប់បាញ់ឲ្យបានលឿនបំផុត ហើយចិន សង្ឃឹមភាគីទាំងពីរនឹងស្ដារទំនុកចិត្ត និងឈានដល់កសាងព្រំដែនសន្តិភាពឡើងវិញ។
ប្រេសិតពិសេសសម្រាប់កិច្ចការអាស៊ីនៃក្រសួងការបរទេសចិន Deng Xijun បានធ្វើដំណើរមកកម្ពុជា និងថៃ កាលពីថ្ងៃទី១៨ ដល់ថ្ងៃទី២៣ ខែធ្នូ ដើម្បីជួយដោះស្រាយជម្លោះប្រដាប់អាវុធនៃប្រទេសទាំងពីរ។
ក្នុងទស្សនកិច្ចនេះ លោក Deng បានជួបជាមួយនាយករដ្ឋមន្ត្រីនៃប្រទេសទាំងពីរ និងមន្ត្រីការទូតជាន់ខ្ពស់។ នេះបើតាមការប្រកាសរបស់ក្រសួងការបរទេសចិន នៅថ្ងៃទី២៣ ខែធ្នូ ឆ្នាំ២០២៥ នេះ។
តាមក្រសួងការបរទេសចិន ប្រេសិតចិនរូបនេះបានបង្ហាញក្ដីបារម្ភជាខ្លាំងពីស្ថានភាពជម្លោះព្រំដែនកម្ពុជា និងថៃ ដែលចិន មានការសោកស្ដាយចំពោះការស្លាប់ និងការភៀសខ្លួនរបស់ប្រជាជន។ អាទិភាពបន្ទាន់បំផុត គឺការសម្រេចឲ្យបានបទឈប់បាញ់ភ្លាមៗ បញ្ឈប់ការប្រយុទ្ធ និងការបន្តការសន្ទនាដើម្បីដោះស្រាយជម្លោះព្រំដែនតាមរយៈមធ្យោបាយសន្តិភាព។ ចិនគាំទ្រការប្រឹងប្រែងរបស់អាស៊ាន និងគាំទ្រតួនាទីសំខាន់របស់ក្រុមសង្កេតការណ៍អាស៊ានក្នុងការតាមដានបទឈប់បាញ់។ នេះជាការបញ្ជាក់របស់លោក Deng ប្រេសិតចិន។
បើតាមក្រសួងការបរទេសចិន ទីក្រុងប៉េកាំង ក៏ត្រៀមខ្លួនជួយបង្កើតលក្ខខណ្ឌ និងផ្ដល់វេទិកាសម្រាប់ការសន្ទនា និងការចរចារវាងភាគីទាំងពីរ។
យ៉ាងណា ទាំងមេដឹកនាំកម្ពុជា និងថៃ បានសាទរការប្រឹងប្រែងរបស់ចិន ក្នុងការជំរុញសន្តិភាព និងការចរចាដែលអាចទទួលយកបានសម្រាប់ភាគីទាំងអស់។
ចំពោះមុខជម្លោះប្រដាប់អាវុធជាមួយថៃ ដែលកំពុងបន្តអូសបន្លាយពេលនេះ គឺជំហររបស់កម្ពុជា ចង់ឱ្យមានការបញ្ឈប់ជាបន្ទាន់នូវការប្រយុទ្ធគ្នា។ លោករដ្ឋមន្ត្រីការបរទេស ប្រាក់ សុខុន ថ្លែងដូចនេះក្នុងសន្និសីទកាសែតនៅឯអាកាសយានដ្ឋានអន្តរជាតិតេជោ ក្រោយវិលត្រឡប់ពីចូលរួមកិច្ចប្រជុំពិសេសរដ្ឋមន្ត្រីការបរទេសអាស៊ានស្ដីពីបញ្ហាជម្លោះកម្ពុជា និងថៃ នៅទីក្រុងកូឡាឡាំពួរ កាលពីថ្ងៃទី២២ ខែធ្នូ។
បើតាមលោក ប្រាក់ សុខុន អ្វីដែលយើងចង់បាន គឺបញ្ឈប់ការប្រយុទ្ធគ្នា បញ្ចប់នូវទុក្ខវេទនារបស់ប្រជាជន ការស្លាប់ទាំងសងខាង មិនថាយោធា មិនថាប្រជាជន រងរបួស ការខូចខាត បាត់បង់ទ្រព្យសម្បត្តិរបស់ប្រជាជន។
លោកប្រមុខការទូតកម្ពុជា ក៏បានបញ្ជាក់ពីបំណងរបស់កម្ពុជា ដែលចង់ឱ្យភាគីជម្លោះវិលត្រឡប់ទៅរកការចរចាគ្នាវិញ ធ្វើយ៉ាងណាកសាងទំនុកចិត្តរវាងគ្នាទៅវិញទៅមក សំដៅការធានាឱ្យប្រជាជនដែលភៀសខ្លួនទាំងពីរប្រទេស បានវិលទៅផ្ទះសម្បែងរបស់ពួកគាត់វិញដែលជាការបញ្ចប់ទុក្ខលំបាករបស់ពួកគាត់។
លោករដ្ឋមន្ត្រីបានបញ្ជាក់ប្រាប់អ្នកសារព័ត៌មានទៀតថា ដើម្បីបញ្ចៀសការច្បាំងគ្នា កម្ពុជានៅតែជ្រើសរើសយកផ្លូវដើរ គឺដំណោះស្រាយការទូត ទាំងទ្វេភាគី និងពហុភាគី ដែលលោក ប្រាក់ សុខុន ថាជាវិធីដ៏ល្អបំផុតសម្រាប់ការដោះស្រាយបញ្ហាជម្លោះដោយសន្តិវិធីរវាងកម្ពុជា និងថៃ ហើយចំពោះកម្ពុជា ពិតជាអត់ចង់ប្រើកម្លាំងយោធានោះឡើយ។
បើតាមលោក ប្រាក់ សុខុន កម្ពុជាបានត្រៀមលក្ខណៈដើម្បីបន្តកិច្ចខិតខំប្រឹងប្រែងរបស់ខ្លួនតាមផ្លូវការទូត ដោយប្រើប្រាស់គ្រប់មធ្យោបាយទាំងអស់ផ្នែកការទូត មិនថាទ្វេភាគី មិនថាពហុភាគី ឬមួយក៏ទទួលបានពីការជួយសម្របសម្រួលពីខាងក្រៅ គឺកម្ពុជាទទួលយកទាំងអស់ សំដៅឈានទៅដល់ការបញ្ឈប់ជម្លោះនឹងគ្នា។
នៅក្នុងសន្និសីទសារព័ត៌មាននោះ លោក ប្រាក់ សុខុន បានឱ្យដឹងថា ចាប់តាំងពីការផ្ទុះអាវុធនៅថ្ងៃទី៧ ខែធ្នូ ឆ្នាំ២០២៥ មក ប្រទេសម៉ាឡេស៊ី ក្នុងនាមជាប្រធានអាស៊ាន បានស្នើចំនួន ៣ដង ហើយប្រធានាធិបតីសហរដ្ឋអាមេរិក លោក ដូណាល់ ត្រាំ ស្នើម្ដងឱ្យកម្ពុជា-ថៃ ងាកទៅគោរពបទឈប់បាញ់។
លោកបញ្ជាក់ថា កម្ពុជាទទួលយកភ្លាមទៅតាមការស្នើរបស់លោកនាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម និងលោកប្រធានាធិបតីអាមេរិក ដូណាល់ ត្រាំ តែលោកថាភាគីថៃ បានច្រានចោល។
ប្រមុខការទូតកម្ពុជា ក៏រំលឹកពីការចាប់ខ្លួនដោយខុសច្បាប់ទាហានកម្ពុជា ១៨រូបពីសំណាក់ក្រុមយោធាថៃ ដោយលោកស្នើឱ្យអង្គប្រជុំពិសេសរដ្ឋមន្ត្រីការបរទេសអាស៊ាន អំពាវនាវរួមគ្នាឱ្យមានការដោះលែងពួកគាត់ត្រឡប់ទៅកម្ពុជាវិញ។
លោក ប្រាក់ សុខុន បានអះអាងថា បណ្តារដ្ឋមន្ត្រីការបរទេសនៃប្រទេសអាស៊ានផ្សេងទៀត សុទ្ធតែមានកង្វល់ដូចគ្នាទាក់ទងនឹងអំពើហិង្សាដែលបានកើតឡើង បង្កទុក្ខលំបាកជនភៀសខ្លួន ហើយអ្វីៗទាំងអស់មាននិន្នាការដូចទៅនឹងជំហររបស់កម្ពុជា៕
© 2025, ឌឹ ខេមបូឌា ដេលី. All rights reserved.