ប្រទេសចិន បានជួយផ្សះផ្សាជម្លោះព្រំដែនរវាងប្រទេសកម្ពុជា និងប្រទេសថៃឡង់ដ៍ កាលពីចុងសប្តាហ៍មុន បន្ទាប់ពីមានកិច្ចប្រជុំពីរលើកនៅប្រទេសម៉ាឡេស៊ី ដែលប្រធានាធិបតីសហរដ្ឋអាមេរិក ធ្វើសាក្សី មិនបានរក្សាបទឈប់គ្នាបាញ់គ្នាបានជាប់លាប់។ ភាគីមួយចោទភាគីមួយជាអ្នកបំពានបទឈប់បាញ់គ្នា ហើយភាគីមួយទៀតបដិសេធ។
អ្នកវិភាគកិច្ចការយោធានៅតំបន់អាស៊ី និយាយប្រាប់កាសែត Thai Enquirer ក្នុងជម្លោះរវាងខ្មែរ និងថៃ ថា ចិនជាអ្នកចំណេញ ពីព្រោះបានលក់អាវុធឱ្យទាំងសងខាង។
សារព័ត៌មានយោធានៅរដ្ឋធានីវ៉ាស៊ីនតុន Defense News ផ្សាយថា ប្រទេសថៃឡង់ដ៍ បានទិញរថក្រោះចិន VT-4 (MBT-3000) ពីឆ្នាំ២០១៦ ដល់ឆ្នាំ២០១៩ ចំនួនជិត ៤០គ្រឿង និងរថពាសដែកចំនួន ៣៤គ្រឿងពីក្រុមហ៊ុនផលិតយុទ្ធភណ្ឌ ណូរិនកូ (China North Industry Corporation, NORINCO)។ ចុងឆ្នាំ២០២៥ ចិនលក់រ៉ុក្កែតទំនើបបាញ់រថក្រោះឲ្យកងយោធពលខេមរភូមិន្ទ ដែលបាញ់បានចម្ងាយ ១០គីឡូម៉ែត្រ ទាញតម្រង់ចំចំណុចគោលដៅ ប្រភេទ GAM-102LR ដែលទាហានខ្មែរបោះបង់នៅសមរភូមិអានសេះ ឬទំនួល៥០០ ខេត្តព្រះវិហារ។
ប្រភពយោធានៅប្រទេសថៃឡង់ដ៍ អធិប្បាយថា លោក ហ៊ុន សែន បានត្រៀមលក្ខណៈបើកសមរភូមិច្បាំងនៅប៉ែកខាងលិចប្រទេសតាំងពីឆ្នាំ២០១១ ព្រោះគេបានតាមដានឃើញមានការរៀបចំបោះទីតាំងរថក្រោះ កាំជ្រួចផ្លោង ដែលជាយុទ្ធវិធីត្រៀមធ្វើចម្បាំង។
អ្នកវិភាគនិយាយថា លោក ហ៊ុន សែន គណនាវិភាគខុស ដោយមិននឹកស្មានថាប្រទេសថៃ អាចនឹងឆ្លើយតបវិញយ៉ាងចាស់ដៃដូច្នោះឡើយ។ មន្ត្រីថៃ មើលឃើញលោក ហ៊ុន សែន នៅតែប្រកាន់ជំហរច្រឡើសបើសដើម្បីស្វែងរកការកោតស្ញប់ស្ញែងផ្ទៃក្នុង ស្វែងរកកិច្ចគាំទ្រអន្តរជាតិ ហើយយល់ថាថៃ នឹងមិនវាតទីចូលទឹកដីខ្មែរតទៅទៀតឡើយ។
ជាមួយគ្នានេះ មន្ត្រីថៃ អះអាងថា គេគ្មានចេតនាដណ្តើមយកទឹកដីមានវិវាទទៅកាន់កាប់ឡើយ។
ទោះជាមានអន្តរាគមន៍ពីមហាអំណាចឲ្យមានកិច្ចសន្យាឈប់បាញ់គ្នា ការដោះលែងទាហានខ្មែរ ចិនសន្យាផ្តល់ជំនួយជិត ៣លានដុល្លារជួយដល់ការខូចខាត និងឧបត្ថម្ភជនភៀសសឹកក៏ដោយ យោធាថៃ នៅតែបន្តប្រុងប្រយ័ត្នត្រៀមខ្លួនការពារសន្តិសុខជានិច្ច ពីព្រោះគេគិតថាភាគីខ្មែរអាចនឹងផ្តើមធ្វើប្រតិបត្តិការវាយប្រហារពេលណាមួយជាថ្មីទៀត ក្រោយពីបង្ហោះយានគ្មានមនុស្សបើក ២៥០គ្រឿងចូលដែនដីថៃឡង់ដ៍៕
© 2026, ឌឹ ខេមបូឌា ដេលី. All rights reserved.