ប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី បដិសេធនូវការឃោសនាដែលថាការសាងសង់ជម្រកបណ្ដោះអាសន្នឱ្យពលរដ្ឋភៀសសឹក ជាការទទួលស្គាល់នូវការបាត់បង់ទឹកដីខ្មែរទៅប្រទេសថៃ។
លោក កែវ រ៉េមី សរសេរលើគណនីហ្វេសប៊ុករបស់ខ្លួនថា ទឹកដីផ្ទះសម្បែងរបស់ពលរដ្ឋខ្មែរដែលត្រូវបានទាហានថៃ កាន់កាប់ដោយខុសច្បាប់ រដ្ឋាភិបាលមានកាតព្វកិច្ចក្នុងការតវ៉ាយកមកវិញ ប៉ុន្តែទន្ទឹមនឹងនេះ ការរស់នៅរបស់ពលរដ្ឋភៀសសឹក ក៏ត្រូវតែគិតគូរឱ្យបានមុនរដូវវស្សាមកដល់នាពេលខាងមុខនេះដែរ។
លោក កែវ រ៉េមី អះអាងថា រាជរដ្ឋាភិបាលបានចេញលិខិតបដិសេធមិនទទួលស្គាល់ចំពោះការឈ្លានពានទឹកដីដោយប្រើកម្លាំងពីយោធាថៃ ជាបន្តបន្ទាប់។ ជាមួយគ្នានេះ រដ្ឋាភិបាលក៏ប្រើគ្រប់យន្តការទាំងអស់ផងដែរ ទាំងការទូត និងផ្លូវច្បាប់ ដើម្បីទាមទារទឹកដី និងផ្ទះសម្បែងទាំងនោះត្រឡប់មកវិញ។
មន្ត្រីជាន់ខ្ពស់រូបនេះលើកឡើងថា ការទាមទារទឹកដីពីការឈ្លានពានរបស់ថៃ មិនមែនជារឿងលេងសើចទេ ហើយក៏មិនមែនប្រើរយៈពេលខ្លីដែរ ដូច្នេះបើត្រូវប្រើរយៈពេលវែង រដ្ឋាភិបាលក៏មិនអាចទុកឱ្យពលរដ្ឋភៀសសឹកទាំងអស់រស់នៅក្រោមតង់កៅស៊ូរាប់សិបឆ្នាំ ឬរាប់ទសវត្សរ៍ទៅថ្ងៃមុខទៀតឡើយ ខណៈក្មេងៗក៏ត្រូវការទីតាំងសម្រាប់អប់រំដែរនោះ។
លោក កែវ រ៉េមី បញ្ជាក់ថា ពលរដ្ឋខ្មែរគ្រប់រូបសុទ្ធតែមានការឈឺចាប់ចំពោះការឈ្លានពានរបស់ថៃ តែពិបាកនិយាយ ខណៈថ្នាក់ដឹកនាំគ្រប់លំដាប់ថ្នាក់ក៏មិនបានសម្រាកដែរ ទោះថ្ងៃបុណ្យ ឬថ្ងៃឈប់សម្រាកក៏ដោយ ក៏ប្រឹងរួមគ្នាដោះស្រាយបញ្ហានេះដើម្បីការពារទឹកដី និងសេចក្តីសុខរបស់ពលរដ្ឋ។
កាលពីចុងខែមករា ឆ្នាំ២០២៦ ក្រសួងរៀបចំដែនដី នគរូបនីយកម្ម និងសំណង់ បានបើកកិច្ចប្រជុំជ្រើសរើសទីតាំងរៀបចំលំនៅឋានបណ្ដោះអាសន្នសម្រាប់ពលរដ្ឋភៀសសឹកដែលបាត់បង់ផ្ទះសម្បែងនៅតាមបណ្តោយព្រំដែន បន្ទាប់ពីទាហានថៃ បានឈ្លានពានយកទៅកាន់កាប់ដោយខុសច្បាប់។
រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក សាយ សំអាល់ បញ្ជាក់ថា ទីតាំងទាំងនេះធ្វើឡើងសម្រាប់ពលរដ្ឋដែលបាត់បង់លំនៅឋានមិនអាចត្រឡប់ទៅវិញបាន និងសម្រាប់ពលរដ្ឋភៀសសឹកដែលរង់ចាំពេលវេលាណាមួយសមស្របអាចវិលត្រឡប់ទៅរកលំនៅឋានរបស់ខ្លួនវិញ រួមទាំងសម្រាប់ពលរដ្ឋភៀសសឹកដែលកំពុងស្នាក់នៅមណ្ឌលសុវត្ថិភាពបណ្ដោះអាសន្នក្នុងរយៈពេលខ្លីផងដែរ។
បន្ទាប់ពីក្រសួងរៀបចំដែនដី បញ្ចេញគម្រោងសាងសង់នេះ ក៏ត្រូវរងការរិះគន់ជាបន្តបន្ទាប់ពីអ្នកលេងបណ្ដាញទំនាក់ទំនងសង្គម ដោយអះអាងថា ការដាក់ចេញផែនការនេះ គឺស្មើនឹងរដ្ឋាភិបាលទទួលស្គាល់ពីការបាត់បង់ទឹកដីខ្មែរទៅប្រទេសថៃ។
ជុំវិញបញ្ហានេះ ក្រសួងការបរទេស និងសហប្រតិបត្តិការអន្តរជាតិ បានចេញសេចក្តីថ្លែងការណ៍កាលពីដើមខែមករា ឆ្នាំ២០២៦ នេះថា យោធាថៃ បានឈ្លានពានកាន់កាប់ទឹកដីកម្ពុជាដោយខុសច្បាប់ចំនួន ១៤តំបន់ ក្នុងខេត្តចំនួន៤ រួមមាន ខេត្តបន្ទាយមានជ័យ ៣តំបន់ ខេត្តពោធិ៍សាត់ ២តំបន់ ខេត្តព្រះវិហារ ៣តំបន់ និងខេត្តឧត្ដរមានជ័យ ៦តំបន់។
យ៉ាងណាក៏ដោយ គណបក្សប្រឆាំងបានអះអាងថា រយៈពេលសង្គ្រាម ២១ថ្ងៃជាមួយថៃ កម្ពុជាបានបាត់បង់រហូតដល់ជាង ៤០ទីតាំង (៤១ទីតាំង) ឯណោះ ដែលបណ្តាលឱ្យប្រជាជនខ្មែរជាង ១១ម៉ឺននាក់បាត់បង់ដីធ្លី ទ្រព្យសម្បត្តិ និងផ្ទះសម្បែងជាច្រើន ទៅក្នុងអំពើឈ្លានពានរបស់ថៃ៕
© 2026, ឌឹ ខេមបូឌា ដេលី. All rights reserved.