អង្គការអន្តរជាតិមិនទាន់ជឿប្រសិទ្ធភាពនៃការបង្ក្រាបការឆបោកអនឡាញនៅកម្ពុជានៅឡើយ

ឌឹ ខេមបូឌា ដេលី

2 months ago

ក្រុមប្រតិបត្តិការចម្រុះចុះត្រួតពិនិត្យឆែកឆេរទីតាំងក្រុមហ៊ុនកាស៊ីណូ សៀងហៃ រីហ្សត ស្ថិតក្នុងភូមិចេក ឃុំសំរោង ស្រុកចន្ទ្រា ខេត្តស្វាយរៀង កាលពីថ្ងៃទី១ ខែមេសា ឆ្នាំ២០២៦។

សហគមន៍អន្តរជាតិមើលទៅប្រទេសកម្ពុជា ដូចជាមិនទាន់មានជំនឿកក់ក្តៅថារាជរដ្ឋាភិបាលខ្មែរនឹងអាចបោសសម្អាតសកម្មភាពឆបោក ការរត់ពន្ធមនុស្ស រំលោភសិទ្ធិ បង្ខំបង្ខាំងមនុស្សធ្វើទារុណកម្មឲ្យធ្វើការងារដូចទាសករ ប្រកបដោយប្រសិទ្ធភាពឡើយ ខណៈអាជ្ញាធរមានសមត្ថកិច្ចកំពុងបង្ក្រាប បន្ទាប់ពីអ្នកដឹកនាំរាជរដ្ឋាភិបាលប្រកាសថានឹងបំបាត់ឲ្យអស់ក្នុងខែមេសា ឆ្នាំ២០២៦ នេះ។

កាលពីថ្ងៃទី៣ ខែមេសា រដ្ឋសភាបានអនុម័តច្បាប់ប្រឆាំងឧក្រិដ្ឋកម្មឆបោកតាមបច្ចេកវិទ្យា ហើយអ្នកសង្កេតការណ៍ថា មកពីសហរដ្ឋអាមេរិក និងចក្រភពអង់គ្លេស ដាក់សម្ពាធ។

សារព័ត៌មានបរទេសបានចុះផ្សាយសេចក្តីរាយការណ៍ស៊ើបអង្កេតពីអង្គការសិទ្ធិមនុស្សអន្តរជាតិ Amnesty International ផ្សាយកាលពីថ្ងៃព្រហស្បតិ៍ ទី២ ខែមេសា សប្តាហ៍មុន ដែលគេស្រាវជ្រាវឃើញថា រាជរដ្ឋាភិបាលបានបន្តផ្តល់អាជ្ញាបណ្ណដល់បនល្បែងកាស៊ីណូដែលមានឈ្មោះជាប់ទាក់ទិននឹងមុខរបរឧក្រិដ្ឋឆបោក ឬហៅថា online scam ដែលខ្លួនប្ដេជ្ញាថានឹងបោសសម្អាតឲ្យអស់នោះតាំងពីខែធ្នូ ឆ្នាំ២០២៥ ដល់ខែមករា ឆ្នាំ២០២៦។

រយៈពេលប្រកាសបង្ក្រាបបនល្បែង និងមណ្ឌលឆបោកតាមបច្ចេកវិទ្យា Amnesty International បានរកឃើញថា គណៈកម្មការចាត់ចែងបនល្បែងនៃក្រសួងពាណិជ្ជកម្ម បានទទួលស្គាល់បនល្បែង ១២ទីតាំងដែលមានអ្នកគ្រប់គ្រងជាម្ចាស់អគារ និងជាម្ចាស់បនល្បែងជាមួយគ្នា ដែលមានឈ្មោះជាឧក្រិដ្ឋជន។

អង្គការ Amnesty International រកឃើញថា ម្ចាស់អគារ និងម្ចាស់កាស៊ីណូមួយចំនួន គឺឧកញ៉ា ភូ កុក អាន និងបងប្អូន ក្រុមគ្រួសារនៃក្រុមហ៊ុន Anco Brothers, Ltd. ដដែល ដូចជា កាស៊ីណូ ក្រោន (Crown) ប៉ោយប៉ែត បាវិត, Crown ជ្រៃធំ, Majestic Two, Majestic Hotel & Casino Sihanoukville និង New Venetian Casino នៅបាវិត ជាដើម។ គេដឹងថា ឧកញ៉ា ភូ អានកូ និង លី យ៉ុងផាត់ ជាប់សាច់ញាតិគ្នា ជាអ្នករកចំណូលឲ្យលោក ហ៊ុន សែន នៃបក្សប្រជាជនកម្ពុជា។

បនល្បែងកាស៊ីណូ និងមណ្ឌលឆបោកឯទៀត អ្នកគ្រប់គ្រងចាត់ចែងជាជនជាតិចិន ចូលហ៊ុននឹងពាណិជ្ជករសញ្ជាតិខ្មែរ មានដូចជា៖

កាស៊ីណូខ្ញុំ (My Casino) ពីមុនគ្រប់គ្រងដោយឈ្មោះ លី គឿង (Ly Kuong) ដែលអាជ្ញាធរចាប់ខ្លួននៅថ្ងៃទី១៥ ខែមករា ឥឡូវគ្រប់គ្រងដោយឈ្មោះ ជូវ ឆេង ខេភី ហូតែល;
ម៉ារីណាន់ Marinan International;
Peak Casino;
Majestic Hotel & Casino and Majestic Two គ្រប់គ្រងដោយក្រុមហ៊ុនចុះបញ្ជីជាខ្មែរឈ្មោះ Big House Commercial Corporation;
ក្រុមហ៊ុនចិន Long Feng Xuan Casino;
ក្រុមហ៊ុនចិន Huang (or Wang) Chao International;
កាស៊ីណូ Golden Sea គ្រប់គ្រងដោយក្រុមហ៊ុនខ្មែរឈ្មោះ King Golden Sea Corp Ltd.។

នាយិកាអង្គការ Amnesty International ប្រចាំតំបន់ អ្នកស្រីមេធាវី Montse Ferrer ថ្លែងថា៖ «រាជរដ្ឋាភិបាលត្រូវតែពន្យល់ ថាហេតុអ្វីកាស៊ីណូដែលជាប់ឈ្មោះពាក់ចំពិននឹងឧក្រិដ្ឋកម្មឆបោក និងរំលោភសិទ្ធិមនុស្សទាំងនោះ នៅតែបន្តទទួលបានការអនុញ្ញាតឲ្យបើករកស៊ីដដែល?»

អ្នកស្រីនិយាយថា រៀងរាល់ថ្ងៃ កាស៊ីណូទាំងនេះបើក ដែលនឹងមានការធ្វើទារុណកម្មមនុស្សមិនខានឡើយ។ ពាក្យខ្មែរសាមញ្ញនិយាយប្រៀបធៀបថា៖ ដូចចកត្រពាំង ពោលគឺទៅហើយមកវិញ ដោយសារតែបោកបានដុល្លារ៕