លោក រ៉ុង ឈុន ទីប្រឹក្សាគណបក្សកម្លាំងជាតិ បាននិយាយថា លោកសង្ឃឹមថា តុលាការកំពូលនឹងស្ដារសិទ្ធិនយោបាយរបស់លោកឡើងវិញ ខណៈតុលាការបានបើកសវនាការលើបណ្ដឹងសារទុក្ខរបស់លោក នៅថ្ងៃទី១៥ ខែមិថុនា ហើយគ្រោងប្រកាសសាលដីកានៅថ្ងៃទី១៩ ខែមិថុនា។
លោក រ៉ុង ឈុន កំពុងប្ដឹងជំទាស់នឹងសាលក្រមរបស់សាលាដំបូងរាជធានីភ្នំពេញ ដែលបានផ្ដន្ទាទោសលោកឱ្យជាប់ពន្ធនាគាររយៈពេល ៤ឆ្នាំ ពិន័យជាប្រាក់ ៤លានរៀល និងដកហូតសិទ្ធិនយោបាយរបស់លោកជាស្ថាពរ។
ថ្លែងនៅមុខតុលាការកំពូល បន្ទាប់ពីសវនាការបានបញ្ចប់ លោកបានប្រាប់អ្នកសារព័ត៌មាន និងអ្នកគាំទ្រថា លោករំពឹងថា តុលាការនឹងផ្ដល់យុត្តិធម៌ដល់រូបលោក។
«ខ្ញុំសង្ឃឹមថា តុលាការនឹងផ្ដល់យុត្តិធម៌ និងសេរីភាពពេញលេញដល់ខ្ញុំ ដើម្បីអាចចូលរួមសកម្មភាពនយោបាយឡើងវិញបាន» លោកបាននិយាយ។
លោកក៏បានអំពាវនាវឱ្យចៅក្រមអនុវត្តការងារដោយឯករាជ្យ និងគោរពតាមសម្បថដែលខ្លួនបានធ្វើនៅពេលចូលកាន់តំណែង។
សវនាការនៅថ្ងៃអាទិត្យនេះ មានការចូលរួមតាមដានពីថ្នាក់ដឹកនាំ និងសកម្មជនគណបក្សកម្លាំងជាតិ តំណាងអង្គការសង្គមស៊ីវិល និងអ្នកគាំទ្ររាប់រយនាក់ ដែលបានមកអមដំណើរលោក រ៉ុង ឈុន ទៅកាន់តុលាការកំពូល។
កាលពីថ្ងៃទី៥ ខែឧសភា ឆ្នាំ២០២៥ សាលាដំបូងរាជធានីភ្នំពេញ បានរកឃើញថា លោក រ៉ុង ឈុន មានទោសពីបទ «មិនរាងចាល» និងសម្រេចផ្ដន្ទាទោសលោកឱ្យជាប់ពន្ធនាគាររយៈពេល ៤ឆ្នាំ ព្រមទាំងពិន័យជាប្រាក់ ៤លានរៀល។
តុលាការបានភ្ជាប់សំណុំរឿងនេះទៅនឹងសកម្មភាពនយោបាយរបស់លោក ក្រោយពេលលោកត្រូវបានដោះលែងពីពន្ធនាគារក្នុងសំណុំរឿងពាក់ព័ន្ធនឹងការលើកឡើងអំពីបញ្ហាព្រំដែនកម្ពុជា-វៀតណាម កាលពីឆ្នាំ២០២១។
ក្រៅពីទោសពន្ធនាគារ តុលាការក៏បានសម្រេចដកហូតសិទ្ធិនយោបាយរបស់លោកជាស្ថាពរ ដែលមានន័យថា លោកមិនអាចបោះឆ្នោត ឬឈរឈ្មោះជាបេក្ខជនក្នុងការបោះឆ្នោតបានទៀតទេ។
សាលដីការបស់តុលាការកំពូលនាពេលខាងមុខ នឹងកំណត់ថាតើការផ្ដន្ទាទោស និងការដកហូតសិទ្ធិនយោបាយរបស់លោក រ៉ុង ឈុន នឹងត្រូវរក្សាទុក ឬកែប្រែតាមការស្នើសុំក្នុងបណ្ដឹងសារទុក្ខរបស់លោក៕
© 2026, ឌឹ ខេមបូឌា ដេលី. All rights reserved.