បុគ្គលិក និងអតីតបុគ្គលិកសមាគមការពារសិទ្ធិមនុស្ស និងអភិវឌ្ឍន៍នៅកម្ពុជា អាដហុក ចំនួន ៥នាក់ នឹងចូលរួមសវនាការសាលាឧទ្ធរណ៍រាជធានីភ្នំពេញលើបណ្តឹងសារទុក្ខរបស់ពួកគេ នៅថ្ងៃទី២៥ ខែមីនា ឆ្នាំ២០២២ ក្នុងសំណុំរឿងសូកប៉ាន់សាក្សីទៅតាមដីកាកោះរបស់តុលាការ។
សេចក្ដីប្រកាសព័ត៌មានរបស់សមាគមការពារសិទ្ធិមនុស្សអាដហុក នៅថ្ងៃអង្គារ ទី១៥ មីនា នេះ បានឱ្យដឹងថា បុគ្គលិកសមាគមអាដហុកចំនួន ៣រូបរួមមាន លោក នី សុខា លោក យី សុខសាន្ត និងអ្នកស្រី លឹម មុន្នី និងអតីតបុគ្គលិកអាដហុក ២រូបទៀត គឺលោក ណៃ វ៉ង់ដា និងលោក នី ចរិយា នឹងចូលរួមសវនាការសាលាឧទ្ធរណ៍រាជធានីភ្នំពេញ នៅថ្ងៃទី២៥ ខែមីនា ឆ្នាំ២០២២ តាមការកោះហៅរបស់មហាអយ្យការអមសាលាឧទ្ធរណ៍រាជធានីភ្នំពេញ ដើម្បីជំនុំជម្រះពីបទ “អំពើសូកប៉ាន់សាក្សី”។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានឲ្យដឹងថា លោកក៏មិនយល់ពីភាពយឺតយ៉ាវក្នុងការបើកសវនាការនេះដែរ។ លោកថា អ្នកទាំង ៥នាក់បានដាក់ប្តឹងឧទ្ធរណ៍យូរណាស់មកហើយ ទើបតែឃើញដីកាកោះហៅបើកសវនាការ។
អ្នកនាំពាក្យរូបនេះសង្ឃឹមថា សាលាឧទ្ធរណ៍នឹងសម្រេចសេចក្តីផ្តល់យុត្តិធម៌ដល់អ្នកទាំង ៥នាក់ដោយទម្លាក់ការចោទប្រកាន់ ហើយផ្តល់នូវតម្លៃ និងកិត្តិយសជូនដល់ពួកគាត់ឡើងវិញ ពីព្រោះពួកគេត្រូវបានសាលាដំបូងកាត់ទោសដោយអយុត្តិធម៌បំផុត។ លោកបន្ថែមថា សាលាឧទ្ធរណ៍នឹងរកយុត្តិធម៌ផ្តល់ជូនពួកគាត់ទាំង ៥នាក់ ពីព្រោះតាំងពីដើមមក ពួកគាត់ពុំបានធ្វើអ្វីដូចការចោទប្រកាន់របស់សាលាដំបូងរាជធានីភ្នំពេញនោះទេ។
អ្នកនាំពាក្យរូបនេះបន្ថែមទៀតថា ពួកគាត់ទាំង ៥នាក់ពុំទទួលយកការសម្រេចផ្ដន្ទាទោសរបស់សាលាដំបូងរាជធានីភ្នំពេញ ដែលបានសម្រេចឲ្យពួកគាត់ជាប់ពន្ធនាគារម្នាក់ៗកំណត់ ៥ឆ្នាំ ដោយត្រូវអនុវត្តក្នុងពន្ធនាគាររយៈពេល ១៤ខែ ហើយនៅសល់ប៉ុន្មានត្រូវព្យួរនោះទេ។ លោកថា ពួកគាត់គឺជាមនុស្សស្អាតស្អំ ធ្វើការដើម្បីបម្រើតែសង្គមប៉ុណ្ណោះ។
កាលពីថ្ងៃទី២៣ ខែតុលា ឆ្នាំ២០១៨ អ្នកទាំង ៥រូបបានដាក់ពាក្យបណ្ដឹងឧទ្ធរណ៍ដោយមិនសុខចិត្តទៅនឹងសាលក្រមព្រហ្មទណ្ឌ ចុះថ្ងៃទី២៦ ខែកញ្ញា ឆ្នាំ២០១៨ របស់សាលាដំបូងរាជធានីភ្នំពេញ ដែលបានសម្រេចផ្ដន្ទាទោសពួកគេដាក់ពន្ធនាគារម្នាក់ៗកំណត់ ៥ឆ្នាំ ដោយត្រូវអនុវត្តក្នុងពន្ធនាគាររយៈពេល ១៤ខែ និងសល់ប៉ុន្មានព្យួរ ពីបទ “សូកប៉ាន់សាក្សី” ក្នុងសំណុំរឿង «នាង ខុម ចាន់តារាទី» ហៅ «ស្រីមុំ»។
អ្នកទាំង ៥រូប ត្រូវបានចាប់ខ្លួនដោយអង្គភាពប្រឆាំងអំពើពុករលួយ កាលពីថ្ងៃទី២៧ ខែមេសា ឆ្នាំ២០១៦ ពីបទ “សូកប៉ាន់សាក្សី” តាមមាត្រា៥៤៨ នៃក្រមព្រហ្មទណ្ឌនៃព្រះរាជាណាចក្រកម្ពុជា ហើយត្រូវបានបញ្ជូនទៅឃុំខ្លួននៅពន្ធនាគារព្រៃស (ម១) នៅថ្ងៃទី០១ ខែឧសភា ឆ្នាំ២០១៦ រហូតដល់ថ្ងៃទី២៩ ខែមិថុនា ឆ្នាំ២០១៧៕