មន្ត្រីជាន់ខ្ពស់បក្សប្រឆាំង ជំរុញឱ្យរដ្ឋាភិបាលកម្ពុជាវះកាត់សាច់ស្អុយលុបបំបាត់អំពើពុករលួយ ដើម្បីបោសសម្អាតអំពើឧក្រិដ្ឋកម្មឱ្យអស់ពីកម្ពុជា ព្រោះអំពើទាំងនោះបានកើតជាប្រព័ន្ធក្នុងចង្កោមមន្ត្រីរដ្ឋាភិបាល។
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ប្រាប់សារព័ត៌មាន The Cambodia Daily នៅថ្ងៃទី២៨ តុលា នេះថា ការដោះសារបស់រដ្ឋាភិបាលនៅពេលដែលប្រទេសជិតខាងចេញវិធានការទប់ស្កាត់ពលរដ្ឋរបស់គេមិនឱ្យទៅលេងប្រទេសកម្ពុជា ព្រោះតែអំពើឆបោក មិនមែនជាដំណោះស្រាយទេ ផ្ទុយទៅវិញការដោះសានេះគ្រាន់តែបង្ហាញពីការលាក់បាំងនូវរាល់អំពើឧក្រិដ្ឋនៅកម្ពុជាទៅវិញប៉ុណ្ណោះ។
លោក អ៊ុំ សំអាន ព្រមានថា ការដោះសារបស់រដ្ឋាភិបាលកម្ពុជារឹតតែធ្វើឱ្យរដ្ឋាភិបាល និងប្រជាពលរដ្ឋនៃប្រទេសជិតខាងខ្លាចរអាមិនហ៊ានទៅប្រទេសកម្ពុជាកាន់តែខ្លាំងថែមទៀត។
មន្ត្រីបក្សប្រឆាំងរូបនេះបញ្ជាក់ថា ប្រព័ន្ធដឹកនាំដែលកំពុងរៀបចំដោយក្រុមគ្រួសារលោក ហ៊ុន សែន សព្វថ្ងៃនេះ មិនមែនជាប្រព័ន្ធលាងជម្រះឧក្រិដ្ឋកម្មនានាដែលកំពុងសម្ងំលាក់ខ្លួននៅកម្ពុជាទេ ផ្ទុយទៅវិញគឺមានតែជួយការពារក្រុមឧក្រិដ្ឋជនដែលប្រព្រឹត្តល្មើសទៅវិញ ព្រោះក្រុមឧក្រិដ្ឋជនទាំងនោះត្រូវបានប្រព័ន្ធដឹកនាំក្នុងគ្រួសារនិយមមួយនេះតែងតាំងឱ្យទៅដឹកនាំប្រទេសទៅហើយនោះ ដូចជាលោក លី យ៉ុងផាត់ និងលោក ទ្រី ភាព ជាដើម។
កាលពីថ្ងៃទី២៧ ខែតុលា អ្នកនាំពាក្យរដ្ឋាភិបាលកម្ពុជា លោក ប៉ែន បូណា ត្រូវវិទ្យុបារាំងអន្តរជាតិស្រង់សម្ដីថា ឥណ្ឌាមានចេតនាចង់បង្ខូចកេរ្តិ៍ឈ្មោះកម្ពុជាតាមរយៈការបង្ហាញឈ្មោះប្រទេសកម្ពុជាយ៉ាងច្បាស់ៗនៅលើផ្ទាំងផ្សព្វផ្សាយក្នុងព្រលានយន្តហោះរបស់ខ្លួន ជុំវិញករណីឆបោកតាមប្រព័ន្ធអនឡាញ។
លោក ប៉ែន បូណា ទទួលស្គាល់ថា កម្ពុជាធ្លាប់មានករណីតាមប្រព័ន្ធអនឡាញនេះមែន តែយ៉ាងណា រដ្ឋាភិបាលកម្ពុជានឹងធ្វើការជាមួយប្រទេសឥណ្ឌា ដើម្បីដឹងពីកម្មវត្ថុនៃការផ្សព្វផ្សាយបែបនេះ។
ការអះអាងនេះ ធ្វើឡើងបន្ទាប់ពីសារព័ត៌មានឥណ្ឌា The Hindu បានចុះផ្សាយពីការផ្សព្វផ្សាយរបស់រដ្ឋាភិបាលឥណ្ឌា ដោយប្រើផ្ទាំងផ្សព្វផ្សាយនៅព្រលានយន្តហោះឥណ្ឌា កាលពីពេលថ្មីៗនេះ ដែលបានព្រមានពលរដ្ឋឥណ្ឌា ថា ការទទួលបានការងារនៅប្រទេសកម្ពុជា ភូមា និងឡាវ គឺជារឿងបោកប្រាស់ ហើយចុងក្រោយនឹងក្លាយជាអ្នកធ្វើការឱ្យការប្រព្រឹត្តអំពើបោកប្រាស់តាមប្រព័ន្ធអនឡាញ។
នៅក្នុងផ្ទាំងផ្សព្វផ្សាយនោះ ក៏បានបញ្ជាក់ទៅកាន់ពលរដ្ឋឥណ្ឌា ផងដែរ ជុំវិញការទទួលបានការងារនៅប្រទេសទាំង៣ នេះ គឺត្រូវត្រួតពិនិត្យក្រោមលក្ខខណ្ឌមួយចំនួន ដូចជា ពិនិត្យទៅលើអង្គភាព ឬស្ថាប័នផ្តល់ការងារដោយប្រុងប្រយ័ត្ន ពិនិត្យឱ្យបានល្អិតល្អន់ពីវីសារការងារ ស្រាវជ្រាវឱ្យបានជាក់លាក់ពីអង្គភាព ឬស្ថាប័នដែលផ្តល់ការងារឱ្យ និងត្រូវតែជាស្ថាប័នដែលមានការទទួលស្គាល់ពីភ្នាក់ងាររដ្ឋាភិបាល ជាដើម។
ក្នុងពិធីសម្ពោធដាក់ឱ្យប្រើប្រាស់ «ទំនប់អូរតេធិបតី» ក្នុងខេត្តមណ្ឌលគិរី កាលពីថ្ងៃទី២៤ ខែតុលា នេះ នាយករដ្ឋមន្ត្រីកម្ពុជា លោក ហ៊ុន ម៉ាណែត បានក្រើនរំលឹកឲ្យប្រជាពលរដ្ឋខ្មែរប្រុងប្រយ័ត្នខ្ពស់កុំឲ្យចាញ់បោកតាមប្រព័ន្ធបច្ចេកវិទ្យា ឬអនឡាញ និងប្រាប់ឲ្យសមត្ថកិច្ចទប់ស្កាត់បទល្មើសនេះឱ្យបានហ្មត់ចត់ផងដែរ ខណៈដែលជនល្មើសព្យាយាមបោកប្រាស់គ្រប់គោលដៅ រួមទាំងលោកនាយករដ្ឋមន្ត្រីផង។
រដ្ឋាភិបាលកម្ពុជា ធ្លាប់បានបញ្ចេញរបាយការណ៍របស់ខ្លួនកាលពីពេលថ្មីៗនេះថា ពលរដ្ឋឥណ្ឌា ជាង ៦០០នាក់ (៦៥០នាក់) ត្រូវបានអាជ្ញាធរខ្មែរជួយសង្គ្រោះពីការបោកប្រាស់តាមប្រព័ន្ធអនឡាញ និងបញ្ជូនត្រឡប់ទៅប្រទេសកំណើតវិញ ក្នុងចំណោមពលរដ្ឋឥណ្ឌា ប្រមាណជា ៥ពាន់នាក់ដែលកំពុងចាញ់បោកឱ្យធ្វើការបោកប្រាស់តាមអនឡាញនៅកម្ពុជាក្នុងពេលបច្ចុប្បន្ននេះ៕
© 2024, ឌឹ ខេមបូឌា ដេលី. All rights reserved.