អតីតមេដឹកនាំបក្សប្រឆាំង លោក សម រង្ស៊ី ប្រកាសថាលោកបានត្រៀមខ្លួនរួចជាស្រេចក្នុងការក្រោកឈរជាមួយប្រជាពលរដ្ឋខ្មែរគ្រប់និន្នាការ ដើម្បីស្វែងរកពេលវេលាដ៏ត្រឹមត្រូវមួយជាមួយ “ចលនាជាតិតស៊ូ” ដើម្បីសង្គ្រោះប្រទេសកម្ពុជាពីរបបដឹកនាំផ្ដាច់ការ។
អតីតប្រធានគណបក្សសង្គ្រោះជាតិ លោក សម រង្ស៊ី សរសេរលើទំព័រហ្វេសប៊ុករបស់ខ្លួននៅថ្ងៃទី៥ ធ្នូ នេះថា ការតវ៉ានៅប្រទេសកូរ៉េខាងត្បូង រវាងស្ត្រីជនជាតិកូរ៉េម្នាក់ប្រឆាំងតវ៉ាទល់នឹងកងទ័ពកូរ៉េ គឺជាមេរៀនមួយសម្រាប់ប្រជាពលរដ្ឋខ្មែរដែលត្រូវក្រោកឈរឡើងទាំងអស់គ្នារួបរួមជាកម្លាំង បង្ខំឱ្យមេដឹកនាំផ្ដាច់ការចុះចេញពីតំណែង ដើម្បីស្វែងរកដំណោះស្រាយរួមមួយសម្រាប់ប្រទេសជាតិរបស់ខ្លួន។
លោក សម រង្ស៊ី លើកឡើងថា ព្រឹត្តិការណ៍ដែលបានកើតឡើងនៅក្នុងប្រទេសកូរ៉េខាងត្បូង ក្នុងរយៈពេលប៉ុន្មានថ្ងៃនេះ បន្ទាប់ពីមេដឹកនាំរបស់ពួកគេបានប្រកាសច្បាប់អាជ្ញាសឹក ប្រជាពលរដ្ឋកូរ៉េភាគច្រើនដែលមិនយល់ស្របនឹងការសម្រេចចិត្តនេះ បាននាំគ្នាក្រោកឈរឡើងរហូតមេដឹកនាំរបស់ពួកគេសម្រេចដកច្បាប់អាជ្ញាសឹកនេះវិញ។
លោកថាជាគំរូដ៏ល្អមួយដែលស្ត្រីកូរ៉េម្នាក់បានរុញច្រានចុងកាំភ្លើងរបស់កងទ័ពដែលភ្ជង់មកខ្លួន ដោយនិយាយថា ពលរដ្ឋកូរ៉េត្រូវតែបញ្ឈប់រឿងនេះ។
លោកបន្តថា ទង្វើនេះអាចជាមេរៀនសម្រាប់ពលរដ្ឋខ្មែរទាំងអស់គ្នាឱ្យដឹងយ៉ាងច្បាស់ថា ប្រទេសកម្ពុជាទាំងមូលជារបស់ប្រជាជនទាំងអស់គ្នា មិនមែនជាកម្មសិទ្ធិផ្ដាច់មុខរបស់មេដឹកនាំ ឬគ្រួសារណាមួយឡើយ។
អតីតមេដឹកនាំបក្សប្រឆាំងរូបនេះបញ្ជាក់ថា ពលរដ្ឋខ្មែរគ្រប់រូបមិនត្រូវប្រគល់វាសនាប្រទេសជាតិទាំងមូលដែលជាកម្មសិទ្ធិរបស់ខ្លួន ឲ្យគ្រួសារណាមួយមកសម្រេចវាសនាជំនួសខ្លួនបានឡើយ។
កាលពីយប់ថ្ងៃទី៣ ខែធ្នូ ឆ្នាំ២០២៤ ប្រធានាធិបតីកូរ៉េខាងត្បូង លោក Yoon Suk Yeol បានប្រកាសដាក់ច្បាប់អាជ្ញាសឹកជាបន្ទាន់នៅទូទាំងប្រទេស។ ក្រោយការប្រកាសដាក់ប្រទេសក្នុងគ្រាអាសន្ន កងទ័ពប្រទេសកូរ៉េខាងត្បូង ក៏ត្រូវបានដាក់ពង្រាយភ្លាមៗផងដែរ។ ក្រោយកម្លាំងកងទ័ពត្រូវបានដាក់ពង្រាយ ប្រជាពលរដ្ឋកូរ៉េខាងត្បូងបាននាំគ្នាងើបឡើងតវ៉ានឹងការប្រកាសប្រើច្បាប់អាជ្ញាសឹកនេះ ស៊ូទាំងយប់ត្រជាក់ខ្លាំងដើម្បីគាំទ្រសមាជិកសភាដែលកំពុងតែពិភាក្សាបោះឆ្នោតប្រឆាំងនឹងច្បាប់អាជ្ញាសឹកក្នុងវិមានសភាជាតិ ក្នុងនោះមានវីដេអូមួយដែលត្រូវគេផ្ដិតបានអំឡុងពេលនៃការប៉ះទង្គិចរវាងស្ត្រីជនជាតិកូរ៉េម្នាក់ដែលប្រឆាំងតវ៉ាទល់នឹងទ័ពប្រទេសកូរ៉េ ក្នុងពេលចលាចលនោះ ត្រូវបានគេផ្សព្វផ្សាយលើបណ្ដាញសង្គមព្រោងព្រាតនៅពេលនេះ។
យ៉ាងណាមិញ ច្បាប់អាជ្ញាសឹកនេះត្រូវបានដកចេញវិញ បន្ទាប់ពីប្រកាសដាក់ចេញបានប្រមាណជា ៣ម៉ោងប៉ុណ្ណោះ ក្រោយការបាតុកម្មប្រឆាំងពីសំណាក់ពលរដ្ឋកូរ៉េខាងត្បូង។ ប្រធានាធិបតី Yoon Suk Yeol អាចប្រឈមនឹងការបោះឆ្នោតដកសេចក្តីទុកចិត្តពីសភាធ្លាក់ពីតំណែង៕
© 2024, ឌឹ ខេមបូឌា ដេលី. All rights reserved.