កងកម្លាំងនៃកងយោធពលខេមរភូមិន្ទ អះអាងថា បទល្មើសព្រៃឈើក្នុងដែនជម្រកសត្វព្រៃព្រៃឡង់ នៅតែបន្តកើតមាន ក្រោយកម្លាំងចុះប្រតិបត្តិការទប់ស្កាត់ និងបង្ក្រាបបទល្មើស ការកាប់ឈើខុសច្បាប់ក្នុងភូមិសាស្ត្រស្រុកសៀមបូក ខេត្តស្ទឹងត្រែង អស់រយៈពេល ៤ថ្ងៃ។
កងទ័ពជើងគោកនៃកងយោធពលខេមរភូមិន្ទ (Royal Cambodian Armed Forces) សរសេរលើទំព័រហ្វេសប៊ុករបស់ខ្លួននៅថ្ងៃទី៣ មករា នេះថា បន្ទាប់ពីចុះល្បាតអស់រយៈពេល ៤ថ្ងៃ កម្លាំងបង្ក្រាបបានរកឃើញប្រភេទឈើដួងចែម ត្រូវបានកាត់គល់ផ្ដួលរំលំចំនួន ៣៥គល់ និងឈើដែលត្រូវបានអារច្រៀកជាក្តាររួចចំនួន ២៨៥សន្លឹក ដែលស្មើនឹង ០៩ម៉ែត្រគូប។
ប្រភពដដែលអះអាងថា ក្រៅពីរកឃើញឈើដែលត្រូវបានកាប់ដោយខុសច្បាប់ កម្លាំងល្បាតក៏បានដកហូតគោយន្តកន្ត្រៃសណ្ដោងរ៉ឺម៉កចំនួន ៣គ្រឿង និងរណាយន្តចំនួន ១គ្រឿងផងដែរ ដែលត្រូវបានយកមករក្សាទុកក្នុងទីបញ្ជាការតំបន់ប្រតិបត្តិការសឹករងខេត្តស្ទឹងត្រែង ដើម្បីបញ្ជូនទៅស្ថាប័នមានសមត្ថកិច្ចចាត់ការបន្តតាមផ្លូវច្បាប់។
កងកម្លាំងប្រតិបត្តិការដដែលនេះ បញ្ជាក់ថា ការចុះល្បាតបទល្មើសព្រៃឈើនេះ គឺអនុវត្តតាមបទបញ្ជាមេបញ្ជាការកងទ័ពជើងគោក លោក ម៉ៅ សុផាន់ ដើម្បីទប់ស្កាត់ និងបង្ក្រាបបទល្មើសកាប់ឈើខុសច្បាប់ក្នុងភូមិសាស្ត្រខេត្តស្ទឹងត្រែង ដែលកំពុងកើតមានសព្វថ្ងៃនេះ។
ប្រធានគណៈកម្មការជាតិទប់ស្កាត់ និងបង្ក្រាបបទល្មើសធនធានធម្មជាតិ លោក សៅ សុខា ធ្លាប់បានលើកឡើងកាលពីពេលកន្លងទៅថា បទល្មើសព្រៃឈើដែលតែងតែកើតមាននៅកម្ពុជាទប់ស្កាត់មិនបាន គឺដោយសារតែមន្ត្រីមូលដ្ឋានជាអ្នកបើកដៃឱ្យឈ្មួញពីខាងក្រៅតែប៉ុណ្ណោះ។
លោក សៅ សុខា អះអាងថា មន្ត្រីជំនាញតែងតែផ្ដេកផ្ដួលចំពោះបញ្ហានេះ ព្រោះថាឈើដឹកតែលើផ្លូវ មិនដែលដឹកខុសពីលើផ្លូវទេ ហើយទីស្នាក់ការបរិស្ថានក៏នៅលើផ្លូវដែរ ដូច្នេះបើមន្ត្រីទាំងនោះមិនផ្សំគំនិតគ្នាទេ បទល្មើសព្រៃឈើក៏មិនកើតឡើងដែរ។ លោកសង្កត់ធ្ងន់ថា បើនៅតែបែបនេះទៀត ប្រទេសកម្ពុជានឹងរលាយហិនហោចជាមិនខាន។
កាលពីអំឡុងឆ្នាំ២០២៤ សារព័ត៌មានអន្តរជាតិ ម៉ុងហ្កាបេ (Mongabay) បានចុះផ្សាយថា រយៈពេល ១ឆ្នាំពេញ ប្រទេសកម្ពុជាបានបាត់បង់ព្រៃឈើជាង ១សែនហិកតា (១២១០០០ហិកតា) ដោយសារតែអំពើពុករលួយ ក្នុងនោះដែនជម្រកសត្វព្រៃព្រៃឡង់ រងការកាប់បំផ្លាញជាប់លំដាប់ថ្នាក់លេខ១។
ប្រភពដដែលរៀបរាប់ថា ការបាត់បង់ព្រៃឈើទាំងនេះ គឺជាប់ពាក់ព័ន្ធនឹងមន្ត្រីជាន់ខ្ពស់រដ្ឋាភិបាលកម្ពុជា រួមទាំងឧកញ៉ាគ្រាក់ៗមួយចំនួនដែលជាសែស្រឡាយរបស់លោក ហ៊ុន សែន ផងដែរ ដូចជាឧកញ៉ា លី យ៉ុងផាត់ ឧកញ៉ា ទ្រី ភាព និងឧកញ៉ា មិក សុផាន់ណារ៉េត ជាដើម ខណៈក្រុមហ៊ុន Angkor Plywood និងក្រុមហ៊ុន Think Biotech ក៏ជាប់ពាក់ព័ន្ធនឹងការកាប់បំផ្លាញញព្រៃឈើខុសច្បាប់ធ្ងន់ធ្ងរនៅកម្ពុជាដែរ។
ទាក់ទិននឹងបញ្ហានេះ កាលពីដើមខែវិច្ឆិកា ឆ្នាំ២០២៤ នាយករដ្ឋមន្ត្រីកម្ពុជា លោក ហ៊ុន ម៉ាណែត ត្រូវបានព្រះមហាក្សត្រខ្មែរត្រាស់បង្គាប់តែងតាំងជាប្រធានគណៈកម្មាធិការជាតិដឹកនាំអនុវត្តកម្មវិធីផ្តល់ដី ការពារព្រៃ ដើម្បីអភិវឌ្ឍដោយចីរភាព ប៉ុន្តែគេបានរកឃើញថា លោក ហ៊ុន ម៉ាណែត ជាឧក្រិដ្ឋជនព្រៃឈើកំពូលម្នាក់បន្ទាប់ពីលោក ហ៊ុន សែន ដែលជាអ្នកគ្រប់គ្រងផុតលេខក្នុងរចនាសម្ព័ន្ធនៃឧក្រិដ្ឋជនព្រៃឈើនៅប្រទេសកម្ពុជាសព្វថ្ងៃនេះ៕
© 2025, ឌឹ ខេមបូឌា ដេលី. All rights reserved.