ប្រធានព្រឹទ្ធសភា និងជាប្រធានគណបក្សប្រជាជនកម្ពុជា (CPP) លោក ហ៊ុន សែន ចង់ឱ្យរដ្ឋាភិបាលបង្កើតច្បាប់ដែលចាត់ទុកជន ឬក្រុមណាដែលមានចេតនាបង្កើតចលនាប្រឆាំងជ្រុលនិយម បង្កភាពវឹកវរ អសន្តិសុខក្នុងសង្គម និងប៉ុនប៉ងផ្តួលរំលំរដ្ឋាភិបាលស្របច្បាប់ គឺជាភេរវករ។
ថ្លែងនៅចំពោះមុខសមាជិកសមាជិកាគណបក្សដែលចូលរួមពិធីប្រមាណ ២ម៉ឺននាក់ នៅក្នុងខួបលើកទី៤៦ នៃទិវាជ័យជម្នះ ៧មករា ដែលប្រារព្ធធ្វើឡើងនៅកោះពេជ្រ កាលពីថ្ងៃទី៧ ខែមករា នេះ លោក ហ៊ុន សែន យល់ថាវាដល់ពេលហើយដែលត្រូវកសាងច្បាប់ ឬកំណត់ចំពោះជនណា ឬក្រុមណាដែលមានគម្រោងការ ឬអំពើឃុបឃិតបង្កើតចលនាប្រឆាំងជ្រុលនិយម បង្កភាពវឹកវរ អសន្តិសុខក្នុងសង្គម បង្កឱ្យមានជម្លោះជាមួយរដ្ឋដទៃ និងប៉ុនប៉ងផ្តួលរំលំរដ្ឋាភិបាលស្របច្បាប់គឺជាភេរវករដែលត្រូវនាំខ្លួនមកវិនិច្ឆ័យទោស។
លោក ហ៊ុន សែន បញ្ជាក់ថា គេមិនអាចនិយាយដល់សិទ្ធិមនុស្ស លទ្ធិប្រជាធិបតេយ្យ ឬការអភិវឌ្ឍបានឡើយ ប្រសិនបើគ្មានសន្តិភាព។ មិនតែប៉ុណ្ណោះ សន្តិភាពក៏មិនគង់វង្សយូរដែរ ល្គឹកណាគ្មានការផ្សះផ្សាជាតិ យុត្តិធម៌ និងការអភិវឌ្ឍជាតិប្រកបដោយបរិយាប័ន្ន។
ទាក់ទងទៅនឹងការបង្កើតច្បាប់នេះ ក្រុមអ្នកឃ្លាំមើលសង្គមលើកឡើងថា ការបង្កើតច្បាប់ណាមួយឡើង លុះត្រាតែច្បាប់នោះបម្រើជាប្រយោជន៍ដល់មនុស្សទូទៅ និងមិនមែនគ្របដណ្តប់សម្រាប់តែបុគ្គលមួយរូប ឬគណបក្សនយោបាយមួយទេ។ ច្បាប់នោះក៏ត្រូវឆ្លើយតបនឹងការគោរពសិទ្ធិមនុស្ស សេរីភាពនៃការបញ្ចេញមតិ និងស្របតាមរដ្ឋធម្មនុញ្ញកម្ពុជា រួមទាំងលិខិតុបករណ៍នានាដែលកម្ពុជាបានផ្តល់សច្ចាប័នកន្លងមកដែរ។
អ្នកឃ្លាំមើលនិយាយថា ការធ្វើច្បាប់កំណត់ឲ្យអ្នកជំទាស់នៅក្រៅប្រទេសទៅជាក្រុមភេរវកម្ម ជាការគំរាមកំហែងដល់អ្នកមាននិន្នាការផ្ទុយពីរដ្ឋាភិបាល។ ការធ្វើច្បាប់នេះ គឺមិនចាំបាច់ ខណៈកម្ពុជាមានច្បាប់រួចទៅហើយដើម្បីឆ្លើយតបនឹងអំពើភេរវកម្ម។
កាលពីខែឧសភា កន្លងទៅ លោក ហ៊ុន សែន ធ្លាប់បានស្នើឲ្យក្រសួងយុត្តិធម៌ បង្កើតច្បាប់ដាក់ទោសអ្នកដែលមិនទទួលស្គាល់វត្តមានអំពើប្រល័យពូជសាសន៍នៅកម្ពុជា តែនៅមិនទាន់ដឹងថាតើក្រសួងយុត្តិធម៌ នឹងត្រូវបង្កើតច្បាប់ថ្មី ឬមួយក៏ធ្វើវិសោធនកម្មលើច្បាប់ចាស់ប្រឆាំងនឹងការមិនទទួលស្គាល់ឧក្រិដ្ឋកម្មក្នុងរបបខ្មែរក្រហម ដែលរដ្ឋសភាបានអនុម័តកាលពីឆ្នាំ២០១៣៕
© 2025, ឌឹ ខេមបូឌា ដេលី. All rights reserved.