គណបក្សប្រជាជនកម្ពុជាឱ្យសមាជិកខ្លួនប្រើប្រាស់បណ្ដាញទំនាក់ទំនង Cool App ដើម្បីសុវត្ថិភាព

ឌឹ ខេមបូឌា ដេលី

1 year ago

គណបក្សប្រជាជនកម្ពុជា ចេញសេចក្តីជូនដំណឹងណែនាំឱ្យសមាជិករបស់ខ្លួនបង្កើតក្រុមការងារទំនាក់ទំនងតាមរយៈកម្មវិធីបណ្ដាញសង្គមឆ្លើយឆ្លង Cool App បង្កើតក្នុងស្រុកជំនួសបណ្ដាញទំនាក់ទំនង Telegram បង្កើតនៅប្រទេសរុស្ស៊ី វិញ ឱ្យបានមុនថ្ងៃទី៦ ខែកុម្ភៈ ដើម្បីមានសុវត្ថិភាពខ្ពស់សម្រាប់អ្នកប្រើប្រាស់។

ប្រព័ន្ធ ឬបណ្ដាញទាក់ទងឆ្លងឆ្លើយបញ្ជូនសារ Cool App បង្កើតដោយក្រុមអ្នកជំនាញបច្ចេកទេសជាង ១០នាក់ ប្រើពេល ៣ឆ្នាំ ចាប់ពីឆ្នាំ២០២១ ដល់ឆ្នាំ២០២៤ ក្រោមការទទួលខុសត្រូវពីលោក លឹម ជាវុត្ថា ដែលជាប្រធានអគ្គនាយកសារព័ត៌មាននាំពាក្យផ្សាយអំពីរាជរដ្ឋាភិបាល ដឹកនាំដោយគណបក្សប្រជាជនកម្ពុជា Fresh News។

ខុទ្ទកាល័យគណៈកម្មាធិការមជ្ឈិមបក្ស បានជូនដំណឹងដល់ប្រធានគណៈប្រចាំការគណបក្សរាជធានី ខេត្ត និងប្រធាន ឬអនុប្រធានមន្ទីរគណបក្ស ដែលមានប្រើ Cool App ត្រូវផ្ញើឈ្មោះ និងលេខទូរសព្ទទៅខុទ្ទកាល័យឱ្យបានមុនថ្ងៃទី៦ ខែកុម្ភៈ។

នៅក្នុងមហាសន្និបាតគណៈកម្មាធិការមជ្ឈិមបក្សប្រជាជនកម្ពុជា លើកទី៤៥ អាណត្តិទី៥ កន្លងទៅ លោក ហ៊ុន សែន ប្រធានគណបក្ស បានកោតសរសើរចំពោះការប្រើប្រាស់ Cool App និងថែមទាំងបានណែនាំដល់ស្ថាប័នចំណុះគណបក្ស សមាជិកគណបក្សទាំងអស់ សូមងាកមកប្រើប្រាស់កម្មវិធីទំនាក់ទំនង Cool App នេះវិញ ដែលជាស្នាដៃបង្កើតដោយកូនខ្មែរ។

អ្នកនាំពាក្យគណបក្សប្រជាជនកម្ពុជា លោក សុខ ឥសាន បានប្រាប់អ្នកសារព័ត៌មានថា ដោយមើលឃើញភាពងាយស្រួលនៃកម្មវិធី Cool App ទើបគណបក្សសម្រេចជាផ្លូវការក្នុងការបង្កើតក្រុមទំនាក់ទំនងដោយប្រើកម្មវិធី Cool App ជំនួសតេឡេក្រាមបង្កើតដោយជនជាតិរុស្ស៊ី តែម្តង។

យោងតាមចំណារលើទំព័រហ្វេសប៊ុកផ្លូវការកាលពីថ្ងៃទី២៨ ខែកញ្ញា ឆ្នាំ២០២៤ លោក ហ៊ុន សែន ក៏បានស្នើឱ្យសមាជិកព្រឹទ្ធសភា រដ្ឋសភា រដ្ឋាភិបាល តុលាការ មន្ត្រីកងកម្លាំងប្រដាប់អាវុធគ្រប់ប្រភេទ និងពលរដ្ឋ ងាកទៅបើកកម្មវិធី Cool App ដើម្បីសន្តិសុខជាតិ និងសុវត្ថិភាពផ្ទាល់ខ្លួន។

ប្រធានអង្គការប្រជាធិបតេយ្យខ្មែរក្នុងប្រទេសអូស្ត្រាលី លោក ស៊ឹង សែនករុណា លើកឡើងថា ការបង្កើតកម្មវិធី Cool App ជាការផ្តល់ភាពងាយស្រួលដល់គណបក្សកាន់អំណាចក្នុងការចូលលួចស្តាប់ពលរដ្ឋខ្មែរដែលហ៊ាននិយាយការពិតតែប៉ុណ្ណោះ។ លោកថា ពលរដ្ឋខ្មែរកុំជឿការភូតភរ និងបោកបញ្ឆោតពីលោក ហ៊ុន សែន ទាក់ទងនឹងកម្មវិធី Cool App នេះ។

ប្រភពដដែលអះអាងថា កន្លងមកតែងតែមានការបែកធ្លាយការសន្ទនា និងទំនាក់ទំនងឯកជនមួយចំនួន ជាពិសេសសម្រាប់អ្នកដែលត្រូវគេចាត់ទុកថាមិនស្របនឹងរដ្ឋាភិបាល។ លោកថា លោកក៏មិនទាន់ដឹងថា តើរដ្ឋាភិបាលអាចអនុវត្តច្បាប់ក្នុងការគ្រប់គ្រងលើកម្មវិធីថ្មីនេះដោយស្មើភាពកម្រិតណានោះដែរ ប្រសិនបើមានការបែកធ្លាយនូវទំនាក់ទំនងពីកម្មវិធីនេះ។

កម្មវិធី Cool App ដែលបានផ្តើមចេញប្រើប្រាស់កាលពីថ្ងៃទី២១ ខែមិថុនា ឆ្នាំ២០២៤ មានចំនួនអ្នកប្រើប្រាស់ជាង ៤០ម៉ឺននាក់ហើយគិតត្រឹមថ្ងៃទី៣ ខែកុម្ភៈ ឆ្នាំ២០២៥ នេះ។

ដើម្បីចែករំលែកចំណេះដឹងខ្លះៗខាងផ្នែកបច្ចេកវិទ្យាទំនើបដល់ពលរដ្ឋខ្មែរទាក់ទងនឹងការបញ្ជូនសារសំឡេង និងអក្សរតាមប្រព័ន្ធអេឡិចត្រូនិក សារព័ត៌មាន The Cambodia Daily សូមស្រង់អ្វីដែលអ្នកឯកទេសពន្យល់អំពីរបៀបបច្ចេកទេសរវាង Cool App និង Telegram។

Cool App អះអាងថាប្រព័ន្ធទាក់ទងថ្មីនេះធានាសន្តិសុខ និងសុវត្ថិភាពផ្ទាល់ខ្លួននៃបុគ្គលម្នាក់ៗក្នុងការបញ្ជូនសារជាសំឡេង និងអក្សរ ខ្លាំងជាងប្រព័ន្ធទាក់ទង Telegram ព្រោះថា Cool App ផ្តល់ដល់អ្នកប្រើប្រាស់នូវបច្ចេកទេសរារាំងភ្ជិតការជ្រៀតជ្រែកពីក្រៅដល់ភាគីទាក់ទងគ្នាទាំងសងខាងក្នុងការឆ្លងឆ្លើយគ្នា ទោះជាសំឡេងក្តី ជាអក្សរក្តី ហៅតាមភាសាបច្ចេកទេសថា end-to-end encryption។

ចំណែកឯ Telegram ទោះជាមានការប្រើប្រាស់ប្រកបដោយសុវត្ថិភាពពាសពេញពិភពលោកក៏ដោយ មិនបានផ្តល់ដល់អ្នកប្រើប្រាស់នូវបច្ចេកទេសរារាំងភ្ជិតការជ្រៀតជ្រែកពីក្រៅដល់ភាគីទាក់ទងគ្នាទាំងសងខាងក្នុងការឆ្លើយឆ្លងគ្នានោះទេ លើកលែងតែអ្នកប្រើប្រាស់ប្រើបណ្ដាញសន្ទនាសម្ងាត់ secret chats ដើម្បីឆ្លើយឆ្លងគ្នា។

នេះមានន័យថា បើមានភ្នាក់ងារលួចចូលស្តាប់ ឬស្រង់យកខ្លឹមសារនៃការឆ្លងឆ្លើយគ្នា គេអាចធ្វើបានដោយថតចម្លងនៅពាក់កណ្តាលផ្លូវរវាងភាគីទាំងពីរក្នុងការបញ្ជូនសារ។

ទោះជាមានការអះអាងអំពីគុណភាព Cool App ថាប្រសើរជាង Telegram ខាងផ្នែកខ្លះក្តី អ្នកសង្កេតការណ៍ការងារបច្ចេកវិទ្យាយល់ថា គួបផ្សំរបៀបគ្រប់គ្រងបែបផ្ដាច់ការក្នុងប្រទេស ជាមួយនឹងបណ្ដាញទាក់ទងសង្គមបញ្ជូនសារដែលស្និទ្ធនឹងរដ្ឋអំណាច កិច្ចការបញ្ជូនសារទាក់ទងគ្នាជាសំឡេងក្តី ជាអក្សរក្តី រវាងភាគីម្ខាងនិងម្ខាងទៀត ភាគីទីបីអាចជ្រៀតចូលលួចយកព័ត៌មានពីកិច្ចសន្ទនាឆ្លងឆ្លើយពេលណាក៏បាន បើគេគិតថាមិនមែនជាការឆ្លងឆ្លើយសួរសុខទុក្ខគ្នាជាគ្រួសារ ជាមិត្តភាពជាធម្មតាទេនោះ។

គេមិនទាន់ជឿជាក់ថា Cool App មានសុវត្ថិភាព ១០០% នោះទេ។ គេរំឭកថា អ្នកប្រើប្រាស់គប្បីយល់ដឹងថែមទៀតក្នុងការសម្រេចចិត្តប្រើប្រាស់ប្រភេទណាមួយ ដើម្បីជៀសវាងការដើរចូលអន្ទាក់ដោយមិនដឹងខ្លួន៕