ប្រធានព្រឹទ្ធសភា និងជាប្រធានគណបក្សប្រជាជនកម្ពុជា លោក ហ៊ុន សែន បញ្ជាក់ប្រាប់ឯកអគ្គរដ្ឋទូតថ្មីរបស់វៀតណាមប្រចាំកម្ពុជាជាថ្មីម្តងទៀតថា ទោះកម្ពុជាចេញពីគម្រោងតំបន់ត្រីកោណអភិវឌ្ឍន៍ (CLV-DTA) ប៉ុន្តែកម្ពុជានៅតែបន្តពង្រឹងទំនាក់ទំនងត្រីភាគីក្នុងការពង្រឹង និងពង្រីកកិច្ចសហប្រតិបត្តិការ ទាំងក្នុងក្របខ័ណ្ឌបក្ស រដ្ឋាភិបាល និងសភា។
ក្នុងជំនួបសម្ដែងការគួរសមកាលពីថ្ងៃទី១២ ខែកុម្ភៈ ជាមួយលោក NGUYEN Minh Vu ដែលទើបត្រូវបានតែងតាំងជាឯកអគ្គរដ្ឋទូតវៀតណាមប្រចាំកម្ពុជា លោក ហ៊ុន សែន ថាទោះបីកម្ពុជាបានដកខ្លួនពីក្របខ័ណ្ឌ CLV-DTA ប៉ុន្តែកិច្ចសហប្រតិបត្តិការរវាងភាគីទាំងបីត្រូវបានពង្រីកពីលក្ខណៈតំបន់ ទៅជាកម្រិតប្រទេស ហើយប្រទេសទាំងបីនឹងបន្តពង្រឹងយន្តការទំនាក់ទំនង និងកិច្ចសហប្រតិបត្តិការទាំងនៅក្នុងក្របខ័ណ្ឌបក្ស រដ្ឋាភិបាល និងសភា។
លោក ហ៊ុន សែន សង្ឃឹមថា ក្នុងបេសកកម្មរបស់អ្នកការទូតវៀតណាមរូបនេះ នឹងរួមចំណែកជំរុញបន្ថែមទៀតនូវទំនាក់ទំនងដ៏ស្អិតល្មួត ភូមិផងរបងតែមួយ និងដែលបានរួមសុខរួមទុក្ខជាមួយគ្នា តស៊ូដើម្បីឯករាជ្យ និងអធិបតេយ្យភាពពីបនប្រល័យពូជសាសន៍ ប៉ុល ពត។
ជាការឆ្លើយតប លោក NGUYEN Minh Vu បានអះអាងថា ទិសដៅការងារក្នុងបេសកកម្មការទូតរបស់ខ្លួននៅកម្ពុជា មានជាអាទិ៍ការបន្តលើកកម្ពស់កិច្ចសហប្រតិបត្តិការនយោបាយ និងការទូត ក៏ដូចជាការបន្តលើកកម្ពស់កិច្ចសហប្រតិបត្តិការការពារជាតិ និងសន្តិសុខ ដើម្បីរក្សាសន្តិសុខ សណ្ដាប់ធ្នាប់ និងការបង្ក្រាបបទល្មើសឆ្លងដែន។
អ្នកវិភាគនយោបាយ លោក គឹម សុខ ប្រាប់សារព័ត៌មាន The Cambodia Daily ថា លោក ហ៊ុន សែន កំពុងប្រើល្បិចកលនយោបាយបោកប្រាស់ពលរដ្ឋខ្មែរជុំវិញការប្រកាសដកខ្លួនចេញពីគម្រោងអភិវឌ្ឍន៍ត្រីកោណនៅពេលនេះ។ លោកថា នៅទីក្រុងវៀងចន្ទន៍ ប្រទេសឡាវ កាលពីថ្ងៃទី០៩ ខែតុលា ឆ្នាំ២០២៤ នាយករដ្ឋមន្ត្រីទាំងបីបានប្ដេជ្ញាបង្កើនប្រសិទ្ធភាព និងភាពសំខាន់ជាងមុននៃការអនុវត្តកិច្ចសហប្រតិបត្តិការរដ្ឋត្រីភាគីជាប្រពៃណី។
កាលពីថ្ងៃទី២០ ខែកញ្ញា ឆ្នាំ២០២៤ លោក ហ៊ុន សែន បានប្រកាសថា កម្ពុជាសម្រេចចិត្តបញ្ចប់ការចូលរួមតំបន់ត្រីកោណអភិវឌ្ឍន៍កម្ពុជា ឡាវ វៀតណាម (CLV-DTA) ចាប់ពីថ្ងៃទី២០ ខែកញ្ញា ឆ្នាំ២០២៤ តទៅ ដើម្បីកុំឱ្យក្រុមប្រឆាំងបន្តយកលេស CLV-DTA មកធ្វើមធ្យោបាយវាយប្រហារលើរដ្ឋាភិបាល ឬបង្កចលនាជ្រុលនិយមដែលធ្វើឲ្យពលរដ្ឋមានការភ័ន្តច្រឡំលើរដ្ឋាភិបាល៕
© 2025, ឌឹ ខេមបូឌា ដេលី. All rights reserved.