ប្រធានអាស៊ានប្តូរវេន លោក អាន់វ៉ា អ៊ីប្រាហ៊ីម រំពឹងថាជម្លោះព្រំដែនកម្ពុជា-ថៃ នឹងត្រូវបានដោះស្រាយក្នុងកិច្ចប្រជុំគណៈកម្មាធិការព្រំដែនទូទៅ (GBC) នៅថ្ងៃព្រហស្បតិ៍ សប្តាហ៍នេះ ខណៈម៉ាឡេស៊ី ក៏បានប្រើផ្កាយរណប និងក្រុមអ្នកតាមដានបទឈប់បាញ់រវាងប្រទេសទាំងពីរ។
ទីភ្នាក់ងារព័ត៌មានរដ្ឋ Bernama បានស្រង់សម្ដីនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម នៅថ្ងៃទី៥ ខែសីហា ឆ្នាំ២០២៥ នេះថា រដ្ឋមន្ត្រីការពារជាតិនៃប្រទេសទាំងពីរនឹងចូលរួមកិច្ចប្រជុំក្នុងការចរចាគ្នាទៅវិញទៅមក ដើម្បីរក្សា និងបញ្ជាក់ឡើងវិញនូវបទឈប់បាញ់គ្នា រួមទាំងធានាមិនឲ្យមានការរំលោភបំពានបន្តទៅទៀត។
នាយករដ្ឋមន្ត្រីម៉ាឡេស៊ី រូបនេះអះអាងថា ជម្លោះព្រំដែនកម្ពុជា-ថៃ នាពេលនេះ មិនត្រឹមតែប៉ះពាល់ដល់ទំនាក់ទំនងទ្វេភាគីប៉ុណ្ណោះទេ តែក៏ប៉ះពាល់ដល់ភាពជឿជាក់លើអាស៊ានផងដែរ ខណៈប្រទេសម៉ាឡេស៊ី នៅតែជួយសម្របសម្រួលប្រទេសសមាជិកអាស៊ានទាំងពីរនេះតទៅទៀត ទោះជាម៉ាឡេស៊ី លែងកាន់មុខនាទីជាប្រធានអាស៊ានក៏ដោយ។
លោក អាន់វ៉ា អ៊ីប្រាហ៊ីម បញ្ជាក់ថា ស្ថានការណ៍ជម្លោះព្រំដែនកម្ពុជា-ថៃ ទោះបីជានៅមានភាពតានតឹង និងរសើបក៏ដោយ តែស្ថិតក្រោមការគ្រប់គ្រងបាន ហើយលោកជឿជាក់ថាចំណុចនៃកិច្ចព្រមព្រៀងសម្របសម្រួលមួយចំនួនដែលសម្របសម្រួលដោយម៉ាឡេស៊ី អាចនឹងត្រូវបានអនុវត្តជាផ្លូវការនៅថ្ងៃទី៧ ខែសីហា ខាងមុខនេះ។
កិច្ចប្រជុំវិសាមញ្ញនៃគណៈកម្មាធិការព្រំដែនទូទៅ (GBC) កម្ពុជា-ថៃ នឹងធ្វើឡើងនៅថ្ងៃទី០៧ ខែសីហា ឆ្នាំ២០២៥ ខាងមុខនេះ នៅប្រទេសម៉ាឡេស៊ី ខណៈកិច្ចប្រជុំក្រុមលេខាគណៈកម្មាធិការកិច្ចការព្រំដែនទូទៅកម្ពុជា-ថៃ (GBC) ក៏កំពុងធ្វើឡើងអស់រយៈពេល ២ថ្ងៃមកហើយដែរ ចាប់តាំងពីថ្ងៃទី០៤ ខែសីហា មក ដែលនឹងត្រូវបញ្ចប់នៅថ្ងៃទី០៦ ខែសីហា នេះ។
ជុំវិញបញ្ហានេះ សារព័ត៌មាន Thai Enquirer បានចុះផ្សាយនៅថ្ងៃទី៥ សីហា ថា ភាគីថៃ បានដាក់សំណើបទឈប់បាញ់លម្អិតដល់កម្ពុជា ក្នុងកិច្ចប្រជុំលេខាធិការដ្ឋានគណៈកម្មាធិការព្រំដែនទូទៅ (GBC) មុននឹងកិច្ចប្រជុំវិសាមញ្ញនៃគណៈកម្មាធិការព្រំដែនទូទៅ (GBC) ចាប់ផ្តើមដំណើរការនៅថ្ងៃព្រហស្បតិ៍ ខាងមុខ។
ជុំវិញបញ្ហានេះ អ្នកផ្តល់ប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ លើកឡើងថា បើថៃ នៅតែបន្តប្រើកម្លាំងប្រដាប់អាវុធរំលោភទឹកដីកម្ពុជា ដូចពេលនេះ ជម្រើសជាក់ស្តែងសម្រាប់កម្ពុជា គឺត្រូវប្តឹងថៃ ទៅកាន់ក្រុមប្រឹក្សាសន្តិសុខអង្គការសហប្រជាជាតិ (UNSC) ដើម្បីស្នើឱ្យអនុវត្តវិធានការសន្តិភាព ឬវិធានការបង្ខាំង ដូចជា ការដាក់ទណ្ឌកម្មផ្សេងៗ និងការឃាត់លើទំនាក់ទំនងខាងសព្វាវុធ ជាដើម (sanctions, arms embargo, etc.)។
ដំណាលពេលគ្នានេះ យោធាថៃ បាននាំតំណាងស្ថានទូត និងអ្នកកាសែតទៅពិនិត្យតំបន់ព្រំដែនឲ្យឃើញការខូចខាតពីគ្រាប់ផ្លោងពីកងទ័ពខ្មែរ។ អ្នកជំនាញដោះគ្រាប់មិនទាន់ផ្ទុះនៃយោធាថៃ កំពុងតែព្យាយាមដោះគ្រាប់ BM-21 ដែលភាគីយោធាប្រទេសកម្ពុជា បាញ់ចូលខេត្តសុរិន្ទ និងខេត្តស៊ីសាកេត ប៉ុន្តែមិនផ្ទុះ៕
© 2025, ឌឹ ខេមបូឌា ដេលី. All rights reserved.