កាលពីថ្ងៃអង្គារ ទី២៨ តុលា ប្រទេសដែនកោះ Madagascar ស្ថិតក្នុងមហាសមុទ្រឥណ្ឌាបានប្រកាសពីការបង្កើតរដ្ឋាភិបាលថ្មី បន្ទាប់ពីពួកយោធាឆក់យកអំណាចពីរដ្ឋាភិបាលពុករលួយនៃប្រធានាធិបតី Andry Rajoelina ដែលរត់ចោលប្រទេស។
តាមការចុះផ្សាយរបស់សារព័ត៌មាននានានៃដែនកោះ Madagascar រដ្ឋាភិបាលថ្មីនៃប្រទេស Madagascar ជារដ្ឋាភិបាលចម្រុះ ក្នុងនោះបក្សនយោបាយប្រឆាំងទទួលបានឋានៈជារដ្ឋមន្ត្រីចំនួន ៣ស្ថាប័នសុទ្ធតែជាស្ថាប័នសំខាន់របស់ប្រទេស Madagascar។
ពិធីប្រកាសគណៈរដ្ឋមន្ត្រីថ្មីនៃរដ្ឋាភិបាលលោកវរសេនីយ៍ឯក Michael Randrianirina ដែលដឹកនាំកងទ័ពធ្វើរដ្ឋប្រហារទម្លាក់ប្រធានាធិបតី Andry Rajoelina ដោយសហការជាមួយក្រុមយុវជន GenZ មានគម្រោងប្រកាសគណៈរដ្ឋមន្ត្រីរបស់ខ្លួនតាំងពីសប្ដាហ៍មុន តែត្រូវបានលើកពេល ២ដង ព្រោះតែសមាសភាពគណៈរដ្ឋមន្ត្រីខ្លះត្រូវបានជំទាស់ដោយក្រុមយុវជន GenZ ដែលជាអ្នកផ្ចុងផ្ដើមធ្វើបាតុកម្មដេញប្រធានាធិបតី Rajoelina ពីអំណាច។
សូមបញ្ជាក់ថា យុវជន GenZ ជាយុវជនកើតចន្លោះពីចុងឆ្នាំ១៩៩០ ដល់ដើមឆ្នាំ២០១០ គេច្រើនរាប់ជាពិសេសអ្នកកើតពីឆ្នាំ១៩៩៧ ដល់ឆ្នាំ២០១២។ បាតុកម្មផ្ទុះពាសពេញប្រទេសនៅថ្ងៃទី២៥ កញ្ញា ហើយបិទបញ្ចប់នៅថ្ងៃទី១៣ តុលា។ ការតវ៉ារបស់យុវជន GenZ ព្រោះតែរឿងពុករលួយ រឿងខ្វះទឹកស្អាតប្រើប្រាស់ និងការខ្វះភ្លើងអគ្គិសនីបំភ្លឺតាមផ្លូវសាធារណៈ បែរជាភូមិគ្រឹះអ្នកមានអំណាចអ្នកមានប្រាក់ស្ដុកស្ដម្ភ មិនដែលដាច់ភ្លើងអគ្គិសនី។
គណៈរដ្ឋមន្ត្រីថ្មីមានសមាជិក ២៩រូប ក្នុងនោះមានស្ត្រី ១០រូប ដែលស្ត្រីទាំងនោះមានឋានៈជារដ្ឋមន្ត្រី និងជាអនុរដ្ឋមន្ត្រីដែលខុសពីគណៈរដ្ឋមន្ត្រីនៃរដ្ឋាភិបាលមុនៗកម្រមានស្ត្រីឡើងកាន់តំណែងរដ្ឋមន្ត្រី។
អាទិភាពនៃរដ្ឋាភិបាលផ្សះផ្សាជាតិនៃដែនកោះ Madagascar ក្នុងនោះការបំបាត់និទណ្ឌភាព ភាពគ្មានទោសពៃរ៍របស់ពួកមន្ត្រីណាដែលមានកំហុស ប្រព្រឹត្តអំពើពុករលួយ ឬប្រព្រឹត្តបទឧក្រិដ្ឋ គឺមិនអាចលើកលែងបានឡើយសម្រាប់ប្រព័ន្ធយុត្តិធម៌ថ្មីក្រោយរដ្ឋប្រហារ។
ការបង្កើតបរិយាកាសការងារដល់យុវជន និស្សិតចេញពីសាកលវិទ្យាល័យ គឺជាអាទិភាពដ៏ធំ ហើយគ្មានទេប្រព័ន្ធការិយាធិបតេយ្យបង្កការសូកប៉ាន់ និងពុករលួយ។ នេះជាការបញ្ជាក់របស់លោកវរសេនីយ៍ឯក Michael Randrianirina ដែលបានថ្លែងនៅឯពិធីប្រកាសគណៈរដ្ឋមន្ត្រី។
រដ្ឋមន្ត្រី អនុរដ្ឋមន្ត្រី និងប្រធានស្ថាប័នរដ្ឋ ត្រូវតែបង្ហាញទ្រព្យសម្បត្តិរបស់ខ្លួនដោយគ្មានលាក់បាំងឡើយ។ រដ្ឋមន្ត្រី និងអនុរដ្ឋមន្ត្រី និងប្រធានស្ថាប័នរដ្ឋនីមួយៗ ត្រូវធ្វើឱ្យមានលទ្ធផលជាវិជ្ជមានសម្រាប់ជាតិក្នុងរយៈពេល ២ខែ។ ការមិនស្រេចបានអ្វីមួយដើម្បីប្រយោជន៍ជាតិក្នុងរយៈពេល ២ខែ គឺជាការបរាជ័យក្នុងការកាន់មុខតំណែង ដែលប្រឈមមុខនឹងការដោះដូរ ឬស្នើឱ្យលាលែងពីតំណែង។
ប៉ុន្តែអ្នកសង្កេតការណ៍មើលឃើញថា គណៈរដ្ឋមន្ត្រីថ្មី ភាគច្រើនជាអ្នកនយោបាយមិនសូវលេចឈ្មោះ តែជាអ្នកនយោបាយស្អាតស្អំទោះជាបទពិសោធនៅមានកម្រិតក្ដី។
យ៉ាងតិចរដ្ឋមន្ត្រី ៣រូបមកពីបក្សនយោបាយប្រឆាំង ត្រូវបានស្នើកាន់កាប់ស្ថាប័នសំខាន់ៗ ក្នុងនោះមានក្រសួងការបរទេស ក្រសួងយុត្តិធម៌ និងក្រសួងសេដ្ឋកិច្ច និងហិរញ្ញវត្ថុ។
ក្នុងឱកាសនៃពិធីប្រកាសគណៈរដ្ឋមន្ត្រីថ្មី ប្រជាជនដែនកោះនៃប្រទេស Madagascar បានសម្ដែងការសាទរ ដោយក្ដីសង្ឃឹមថា៖ ផលប្រយោជន៍ជាតិ គឺជាអាទិភាពសម្រាប់ប្រជាជន។ ការគ្រប់គ្រងធនធានសម្បត្តិជាតិ ត្រូវមានតម្លាភាព គ្មានការកិបកេងឡើយ។ ជាមួយគ្នានេះ សង្គមត្រូវតែមានយុត្តិធម៌សម្រាប់អ្នកទន់ខ្សោយ។ សង្គមស្អាតស្អំគ្មានទេអយុត្តិធម៌។ អ្នកបង្កអំពើអយុត្តិធម៌ អ្នកមានអំណាចជិះជាន់គាបសង្កត់អ្នកទន់ខ្សោយដោយបំពានច្បាប់ ត្រូវតែមានទោស។
ហេតុអ្វីបានជាថ្នាក់ឧត្ដមសេនីយ៍ឯកមិនដឹកនាំធ្វើរដ្ឋប្រហារទម្លាក់ប្រធានាធិបតី Rajoelina ពីអំណាច?
នៅប្រទេសណាក៏មានដែរ ឧត្ដមសេនីយ៍ផ្កាយ១ ផ្កាយ២ ផ្កាយ៣ ហើយប្រទេសខ្លះមានរហូតផ្កាយ៤។ ចុះហេតុអ្វីបានជាវរសេនីយ៍ឯកម្នាក់ឋានន្តរស័ក្ដិត្រឹមស័ក្ដិ៥ បែរជាមានភាពក្លាហានដឹកនាំរដ្ឋប្រហារទម្លាក់ប្រធានាធិបតីរបស់ខ្លួន ដែលជាកំពូលរដ្ឋបុរសរបស់ប្រទេស។ តើរដ្ឋមន្ត្រីការពារជាតិរបស់ប្រទេស Madagascar នៅឯណា? តើអគ្គមេបញ្ជាការកងទ័ពនៅឯណា? បែរជាវរសេនីយ៍ឯកម្នាក់ឋានន្តរស័ក្ដិត្រឹមស័ក្ដិ៥ ចេញមុខធ្វើរដ្ឋប្រហារ។ គេថាព្រោះតែលោកវរសេនីយ៍ឯក Michael Randrianirina ជាមេអង្គភាពកងទ័ព ដែលមានបន្ទាយនៅជាយរដ្ឋធានី Antananarivo។ គាត់នៅជាប់នឹងបាតុករក្រុមយុវជន Gen Z ប៉ុន្តែការពិត គេថាឧត្ដមសេនីយ៍របស់គាត់ជាក្រុមមនុស្សចាក់ខ្សែ មិនចង់ផ្ដួលប្រធានាធិបតី Andry Rajoelina ព្រោះតែមនោសញ្ចេតនា និងការយោគយល់។
ដូច្នេះ បើមានមេទ័ពណា ទោះឋានៈនាទីតូចតាចក្ដីដឹកនាំរដ្ឋប្រហារឱ្យតែបានជោគជ័យ យើងក៏ជោគជ័យដែរ។ គេថា អ្នកបានជ័យជម្នះ យើងក៏បានផលប្រយោជន៍ពីអ្នកដែរ។ តែបើអ្នកស្លាប់ ឬគ្រោះថ្នាក់ យើងឈរមើលអ្នក។
តើប្រធានាធិបតីថ្មីប្រទេស Madagascar មានជីវប្រវត្តិដូចម្ដេច?
វរសេនីយ៍ឯក Michael Randrianirina កើតនៅក្នុងឆ្នាំ១៩៧៤។ គាត់ធ្លាប់ជាមន្ត្រីជាន់ខ្ពស់យោធា និងជាអ្នកនយោបាយ។ គាត់ជានិស្សិតយោធារៀននៅសាលាយោធាជាន់ខ្ពស់កម្រិត Academy។
គាត់ធ្លាប់ជាអភិបាលក្រុង Androy ពីឆ្នាំ២០១៦ ដល់ឆ្នាំ២០១៨ ហើយក្រោយមកគាត់ឡើងឋានៈជាវរសេនីយ៍ឯក ជាមេអង្គភាពកងទ័ពមួយមានបន្ទាយនៅជាប់នឹងរដ្ឋធានី Antananarivo។
វរសេនីយ៍ឯក Michael Randrianirina ធ្លាប់ជាប់ពន្ធនាគារក្នុងឆ្នាំ២០២៣ ដោយសារតែគាត់ប្រឆាំងការដឹកនាំរដ្ឋាភិបាលរបស់លោកប្រធានាធិបតី Andry Rajoelina។ គាត់ជាប់ទោសពីបទញុះញង់ឱ្យមានចលនាប្រឆាំងរបបលោកប្រធានាធិបតី Andry Rajoelina។
វរសេនីយ៍ឯក Michael Randrianirina ត្រូវបានតុលាការរដ្ឋធម្មនុញ្ញប្រកាសទទួលស្គាល់ជាផ្លូវការជាប្រធានាធិបតីដែនកោះនៃប្រទេស Madagascar។ ឥឡូវនេះ វរសេនីយ៍ឯក Michael Randrianirina បានក្លាយជាប្រធានាធិបតីទី៩ របស់ដែនកោះដ៏ធំទី៤ នៃពិភពលោក ដែលមានប្រជាជនជាង ៣១លាននាក់ ស្ថិតនៅតំបន់កោះនៃមហាសមុទ្រឥណ្ឌា។ គាត់សន្យាថាដឹកនាំប្រទេស Madagascar ឋានៈជាប្រធានាធិបតីតែ ២ឆ្នាំប៉ុណ្ណោះ នឹងផ្ទេរអំណាចទៅឱ្យប្រធានាធិបតីដែលជាប់ឆ្នោត៕
© 2025, ឌឹ ខេមបូឌា ដេលី. All rights reserved.