នាយករដ្ឋមន្ត្រីថៃ លោក អនុធីន ឆានវីរៈគុល (Anutin Charnvirakul) អះអាងថា កងកម្លាំងថៃ ធ្វើបានល្អបំផុតចំពោះការបាញ់លើពលរដ្ឋខ្មែរបណ្តាលឱ្យមានអ្នករងរបួស និងស្លាប់ ហើយថាថៃ មានវិធីផ្ទាល់ខ្លួនក្នុងការដោះស្រាយរួចរាល់ហើយ។
កាសែតថៃ Thai Enquirer បានចុះផ្សាយសម្ដីនាយករដ្ឋមន្ត្រីថៃ នៅថ្ងៃទី១៣ វិច្ឆិកា នេះថា ការផ្ទុះអាវុធនៅតំបន់ព្រំដែនជាប់នឹងភូមិព្រៃចាន់ ឬ បានណងយ៉ាកែវ កាលពីថ្ងៃទី១២ វិច្ឆិកា គឺជាកាតព្វកិច្ចទាហានថៃ ដែលធ្វើអ្វីៗគ្រប់យ៉ាងដើម្បីទឹកដី ស្របតាមបទបញ្ជានៃកងទ័ព ព្រោះថៃ គ្មានចេតនាឈ្លានពាននរណាម្នាក់ទេ ប៉ុន្តែថៃ ក៏មិនអនុញ្ញាតឱ្យនរណាម្នាក់គំរាមកំហែងដល់អធិបតេយ្យជាតិរបស់ខ្លួនដែរ។
លោកបន្តថា ទោះបីថៃ សង្ឃឹមពីសន្តិភាពក៏ដោយ ក៏ថៃ ត្រូវត្រៀមខ្លួនសម្រាប់សង្គ្រាមដែរ ជាក់ស្តែងលោកបានផ្តល់សិទ្ធិយ៉ាងពេញលេញឱ្យកងទ័ពតាំងពីថ្ងៃចូលកាន់តំណែងមកម្ល៉េះ។
ប្រភពដដែល បញ្ជាក់ថា ថៃ បានត្រៀមខ្លួនជម្លៀសពលរដ្ឋរួចរាល់ហើយ ខណៈទាហានថៃ ក៏បានត្រៀមយុទ្ធសាស្ត្រគ្រប់គ្រាន់ដែរ ចំណែកឯរដ្ឋាភិបាលបានគាំទ្រយុទ្ធសាស្ត្រទាំងនោះពេញទំហឹង។
អ្នកនាំពាក្យក្រសួងការពារជាតិនៃប្រទេសកម្ពុជា ឧត្ដមសេនីយ៍ឯក ម៉ាលី សុជាតា ចេញសេចក្តីប្រកាសព័ត៌មាននៅថ្ងៃទី១៣ វិច្ឆិកា នេះថា នៅថ្ងៃទី១៣ វិច្ឆិកា នេះ ក្រុមអ្នកសង្កេតការណ៍អាស៊ាន (AOT) មកដល់មណ្ឌលជនភៀសសឹកនៃអ្នកភូមិព្រៃចាន់ ដែលបានភៀសខ្លួនមកកាន់ជម្រកសុវត្ថិភាព ក្រោយហេតុការណ៍យោធាថៃ បើកការបាញ់ប្រហារមកលើប្រជាពលរដ្ឋស៊ីវិលស្លូតត្រង់កម្ពុជា ដោយគ្មានមូលហេតុកាលពីថ្ងៃទី១២ វិច្ឆិកា។
អ្នកស្រី ម៉ាលី សុជាតា បញ្ជាក់ថា ក្រុមអ្នកសង្កេតការណ៍អាស៊ាន (AOT) ក៏បានចុះទៅដល់មន្ទីរពេទ្យមិត្តភាពកម្ពុជា-ជប៉ុនមង្គលបុរី ក្នុងខេត្តបន្ទាយមានជ័យ ដើម្បីពិនិត្យជនស៊ីវិលខ្មែរដែលរងរបួសចំនួន ០៣រូប និងបាត់បង់ជីវិតនៅនឹងកន្លែងម្នាក់ ក្នុងហេតុការណ៍ដែលយោធាថៃ បានបាញ់ប្រហារនោះផងដែរ។
ជុំវិញបញ្ហានេះ នាយករដ្ឋមន្ត្រី ហ៊ុន ម៉ាណែត កាលពីថ្ងៃទី១២ វិច្ឆិកា បានប្រកាសថ្កោលទោសចំពោះការប្រើប្រាស់អំពើហិង្សាពីភាគីថៃ មកលើប្រជាពលរដ្ឋស៊ីវិលស្លូតត្រង់ខ្មែរនៅភូមិព្រៃចាន់ ខេត្តបន្ទាយមានជ័យ យ៉ាងដាច់អហង្ការ។
លោក ហ៊ុន ម៉ាណែត អំពាវនាវឱ្យភាគីថៃ បញ្ឈប់ជាបន្ទាន់នូវការប្រើប្រាស់កម្លាំងមកលើប្រជាពលរដ្ឋស៊ីវិលស្លូតត្រង់កម្ពុជា នៅភូមិព្រៃចាន់ ក៏ដូចជាការប្រើប្រាស់កម្លាំងក្នុងការដោះស្រាយបញ្ហាព្រំដែនរវាងប្រទេសទាំងពីរផងដែរ ព្រោះទង្វើរបស់ថៃ មកលើពលរដ្ឋកម្ពុជា នាពេលនេះ គឺផ្ទុយទៅនឹងស្មារតីមនុស្សធម៌ទាំងស្រុង។
នាយករដ្ឋមន្ត្រីខ្មែររូបនេះ បញ្ជាក់ថា កម្ពុជានៅតែរក្សាជំហរក្នុងការដោះស្រាយបញ្ហាដោយសន្តិវិធី ស្របតាមស្មារតីនៃសេចក្តីថ្លែងការណ៍រួមទីក្រុងកូឡាឡាំពួរ នៅថ្ងៃទី២៦ ខែតុលា ឆ្នាំ២០២៥ ដើម្បីឈានទៅរកការបញ្ចប់ជម្លោះ និងកសាងសន្តិភាពរវាងប្រទេសទាំងពីរឡើងវិញ។
ចំពោះការធានាថាដោះលែងទាហានខ្មែរ ១៨នាក់ ថៃចាត់ទុកជាឈ្លើយសឹកនៅថ្ងៃទី១២ ខែវិច្ឆិកា ត្រូវផ្អាកទៅវិញ ដោយសារឧប្បត្តិហេតុផ្ទុះមីនបណ្តាលឲ្យទាហានថៃ របួសចំនួន ៥នាក់។
ក្នុងពេលជាមួយគ្នានោះ អនុរដ្ឋមន្ត្រីក្រសួងការពារជាតិថៃ ឧត្ដមសេនីយ៍ឯក អដុន ប៊ុណចម្រើន អះអាងប្រាប់កាសែតកាលពីថ្ងៃទី១០ ខែវិច្ឆិកា កន្លងទៅនេះថា ទាហានខ្មែរខ្លះមិនចង់វិលត្រឡប់ទៅស្រុកកំណើតវិញទេ ព្រោះថាគេចង់រស់នៅក្នុងស្រុកថៃ ស្រួលជាង។ ខាងភាគីថៃ ថាគេនឹងធ្វើការយ៉ាងជិតស្និទ្ធជាមួយរាជរដ្ឋាភិបាលកម្ពុជា និងក្រុមអ្នកសង្កេតការណ៍អាស៊ានក្នុងដំណើរការធ្វើមាតុភូមិនិវត្តន៍នៃទាហានខ្មែរទាំង ១៨នាក់នោះ។
ចំណែកឯគណៈកម្មាធិការសិទ្ធិមនុស្សកម្ពុជា បានចេញសេចក្តីប្រកាសព័ត៌មាន កាលពីថ្ងៃទី១២ វិច្ឆិកា ថា ខ្លួនបានដាក់ញត្តិទៅកាន់ឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) នៅទីក្រុងហ្សឺណែវ ឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំតំបន់អាស៊ីអាគ្នេយ៍ នៅទីក្រុងបាងកក និងស្ថាប័នសិទ្ធិមនុស្សជាតិឯករាជ្យក្នុងតំបន់អាស៊ាន ព្រមទាំងប្រធានប្តូរវេនអាស៊ាន រួចរាល់ដែរហើយ ជុំវិញការបាញ់ប្រហារពីខាងកងទ័ពថៃ លើពលរដ្ឋនៃប្រទេសកម្ពុជា កាលពីថ្ងៃទី១២ វិច្ឆិកា នោះ៕
© 2025, ឌឹ ខេមបូឌា ដេលី. All rights reserved.