នាយករដ្ឋមន្ត្រីថៃ គ្រោងពិភាក្សាជាមួយលោក ដូណាល់ ត្រាំ តាមទូរសព្ទនៅយប់ថ្ងៃសុក្រនេះអំពីជម្លោះព្រំដែនជាមួយកម្ពុជា

ឌឹ ខេមបូឌា ដេលី

6 months ago

នាយករដ្ឋមន្ត្រីថៃ លោក អនុធីន ឆានវីរៈគុល (Anutin Charnvirakul) និងប្រធានាធិបតីសហរដ្ឋអាមេរិក លោក ដូណាល់ ត្រាំ

នាយករដ្ឋមន្ត្រីថៃ លោក អនុធីន ឆានវីរៈគុល (Anutin Charnvirakul) អះអាងថា លោកនឹងពិភាក្សាជាមួយប្រធានាធិបតីអាមេរិក លោក ដូណាល់ ត្រាំ ប្រហែលម៉ោង ០៩ និង ២០នាទីយប់ថ្ងៃសុក្រ នេះ អំពីការប៉ះទង្គិចគ្នាតាមព្រំដែនរវាងកម្ពុជា និងថៃ ដែលបានអូសបន្លាយពេលអស់រយៈពេល ៥ថ្ងៃមកនេះ។

ទីភ្នាក់ងារសារព័ត៌មាន រ៉យទ័រ (Reuters) រាយការណ៍នៅថ្ងៃទី១២ ធ្នូ នេះថា កងទ័ពថៃ និងកម្ពុជា បានប្រយុទ្ធគ្នានៅចំណុចជាច្រើនតាមបណ្តោយព្រំដែនប្រវែង ៨១៧គីឡូម៉ែត្ររបស់ប្រទេសទាំងពីរ ដែលនេះគឺជាការប្រយុទ្ធដ៏ខ្លាំងក្លាបំផុតមួយចាប់តាំងពីការប្រយុទ្ធគ្នារយៈពេល ៥ថ្ងៃកាលពីខែកក្កដា កន្លងទៅ។

ប្រភពដដែលអះអាងថា ប្រធានាធិបតីអាមេរិក លោក ដូណាល់ ត្រាំ មានបំណងចង់ធ្វើអន្តរាគមន៍ម្តងទៀត ដើម្បីបញ្ឈប់ការប្រយុទ្ធគ្នា និងស្ដារបទឈប់បាញ់ ដែលលោកបានសម្របសម្រួលកាលពីខែកក្កដា កន្លងទៅ ដោយលោកបានសន្យាថា លោកនឹងហៅទូរសព្ទទៅកាន់មេដឹកនាំនៃប្រទេសទាំងពីរ ដើម្បីព្យាយាមបញ្ឈប់ការប្រយុទ្ធតាមព្រំដែនរវាងប្រទេសទាំងពីរ។

រ៉យទ័រ (Reuters) បានចុះផ្សាយទៀតថា នៅក្នុងពិធីលៀងសាយភោជន៍រដ្ឋសភាកាលពីយប់ថ្ងៃទី១១ ខែធ្នូ លោក ដូណាល់ ត្រាំ បានលើកតម្កើងកេរ្តិ៍ឈ្មោះរបស់លោកថាជាអ្នកបង្កើតសន្តិភាពសកល ហើយបានសម្ដែងការជឿជាក់ថា លោកនឹងអាចធ្វើឱ្យបទឈប់បាញ់ត្រឡប់មកដូចដើមវិញ។

ប្រភពដដែលបញ្ជាក់ថា ប្រធានាធិបតីអាមេរិករូបនេះអះអាងថា លោកបានដោះស្រាយសង្គ្រាមចំនួនប្រាំរួចមកហើយ រីសង្គ្រាមរវាងថៃ និងកម្ពុជា លោកនឹងហៅទូរសព្ទទៅកាន់មេដឹកនាំនៃប្រទេសទាំងពីរ ដើម្បីធ្វើឱ្យបញ្ហាមួយនេះវិលទៅរកសភាពដើមវិញ។

ការអះអាងនេះ ធ្វើឡើងបន្ទាប់ពីប្រធានាធិបតីអាមេរិក គ្រោងចេញមុខអន្តរាគមន៍សាជាថ្មីជុំវិញការផ្ទុះសង្គ្រាមរវាងកម្ពុជា-ថៃ លើកទី២ នាពេលនេះ។

កាសែត Bloomberg របស់អាមេរិក បានរាយការណ៍កាលពីថ្ងៃទី១០ ខែធ្នូ ថា ប្រធានាធិបតីអាមេរិក លោក ដូណាល់ ត្រាំ គ្រោងបើកកិច្ចសន្ទនាតាមទូរសព្ទជាមួយមេដឹកនាំកម្ពុជា និងថៃ នៅថ្ងៃពុធ ទី១១ ខែធ្នូ ដើម្បីបញ្ចប់សង្គ្រាមតាមព្រំដែនរវាងប្រទេសទាំងពីរដែលបានផ្ទុះឡើងសាជាថ្មីនាពេលនេះ។

យ៉ាងណាក៏ដោយ មកដល់ពេលនេះ កិច្ចសន្ទនាអំពីជម្លោះព្រំដែនរវាងកម្ពុជា-ថៃ ជាមួយប្រធានាធិបតីអាមេរិក មិនទាន់កើតឡើងនៅឡើយទេ ខណៈមេដឹកនាំកម្ពុជា ក៏មិនទាន់បញ្ជាក់អំពីបញ្ហានេះដែររហូតមកទល់ពេលនេះ។

ចំណែកអ្នកនាំពាក្យសេតវិមាន អ្នកស្រី ខារ៉ូឡាញ ឡេវីដ (Karoline Leavitt) បានប្រាប់ក្រុមអ្នកសារព័ត៌មានកាលពីថ្ងៃទី១១ ខែធ្នូ នេះថា ប្រសិនបើប្រធានាធិបតីអាមេរិក លោក ដូណាល់ ត្រាំ ទូរសព្ទទៅមេដឹកនាំកម្ពុជា និងថៃ មែន គាត់ច្បាស់ជាប្រាប់រឿងនេះដោយផ្ទាល់ទៅអ្នកសារព័ត៌មាន។

អ្នកនាំពាក្យរូបនេះបញ្ជាក់ថា សហរដ្ឋអាមេរិកនៅតែបន្តតាមដានស្ថានការណ៍ជម្លោះព្រំដែនកម្ពុជា-ថៃ យ៉ាងយកចិត្តទុកដាក់ ហើយបញ្ហានេះក៏ត្រូវបានពិភាក្សាជាមួយរដ្ឋមន្ត្រីក្រសួងការបរទេសអាមេរិក លោក ម៉ាកូ រ៉ូប៊ីយ៉ូ ដែរ។

កាលពីថ្ងៃទី១០ ខែធ្នូ រដ្ឋមន្ត្រីការបរទេសសហរដ្ឋអាមេរិក លោក ម៉ាកូ រ៉ូប៊ីអូ (Marco Rubio) បានសម្ដែងការព្រួយបារម្ភអំពីការប៉ះទង្គិចគ្នាដោយអាវុធរវាងកម្ពុជា-ថៃ ក្នុងតំបន់ជាច្រើននៅតាមបណ្តោយព្រំដែនដែលកំពុងផ្ទុះឡើងវិញ។

លោក ម៉ាកូ រ៉ូប៊ីអូ (Marco Rubio) ជំរុញឱ្យកម្ពុជា-ថៃ គោរពបទឈប់បាញ់ដើម្បីការពារជនស៊ីវិលរបស់ប្រទេសទាំងពីរ ដែលភាគីទាំងសងខាងបានឯកភាពក្នុងកិច្ចព្រមព្រៀងសន្តិភាពកូឡាឡាំពួរ កាលពីចុងខែតុលា ដែលមានប្រធានាធិបតីអាមេរិក លោក ដូណាល់ ត្រាំ និងនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ជាសាក្សី។

ដោយឡែកនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម សរសេរលើទំព័រហ្វេសប៊ុករបស់លោកកាលពីថ្ងៃទី១០ ខែធ្នូ ថា កាលពីយប់ថ្ងៃទី៩ ខែធ្នូ លោកបានជជែកតាមទូរសព្ទជាមួយនាយករដ្ឋមន្ត្រីកម្ពុជា និងថៃ ដើម្បីពិភាក្សាអំពីភាពចលាចលដែលកំពុងកើតឡើងនៅតំបន់ព្រំដែននៃប្រទេសទាំងពីរ ប៉ុន្តែដំណោះស្រាយពេញលេញមិនទាន់ត្រូវបានសម្រេចនៅឡើយទេ។

លោក អាន់វ៉ា អ៊ីប្រាហ៊ីម បញ្ជាក់ថា ម៉ាឡេស៊ីនឹងបន្តគាំទ្រកិច្ចសន្ទនាប្រកបដោយសន្តិភាព ដោយផ្អែកលើច្បាប់អន្តរជាតិ និងកិច្ចសហប្រតិបត្តិការក្នុងតំបន់ ដើម្បីការពារស្ថិរភាព និងសន្តិសុខនៃតំបន់។

ជុំវិញបញ្ហានេះ អង្គការសង្គមស៊ីវិល សហព័ន្ធសហជីព និងសហគមន៍ក្នុងស្រុកចំនួន ២០៤ស្ថាប័ន នៅថ្ងៃទី១២ ខែធ្នូ នេះ បានចេញសេចក្តីថ្លែងការណ៍រួម ថ្កោលទោសចំពោះការបាញ់ប្រហាររបស់យោធាថៃ ជាថ្មីមកលើដែនអធិបតេយ្យភាពរបស់កម្ពុជា។

ប្រភពដដែល អំពាវនាវដល់សហគមន៍អន្តរជាតិដាក់សម្ពាធលើប្រទេសថៃ ឱ្យបញ្ឈប់ជាបន្ទាន់នូវរាល់ទម្រង់នៃការឈ្លានពានមកលើទីតាំងជនស៊ីវិលកម្ពុជា ដោយងាកទៅគោរពឲ្យបានពេញលេញនូវព្រំដែនដែលទទួលស្គាល់ដោយអន្តរជាតិ និងប្រើប្រាស់យន្តការដោះស្រាយដោយសន្តិភាព។

អង្គការសង្គមស៊ីវិលកម្ពុជាទាំងនេះ ទាមទារឲ្យថៃ ធានាការគោរពសិទ្ធិមនុស្ស សុវត្ថិភាព និងសេចក្តីថ្លៃថ្នូររបស់កម្មករចំណាកស្រុកទាំងអស់ដែលរស់នៅ និងធ្វើការក្នុងប្រទេសថៃ នាពេលនេះផងដែរ។

សារព័ត៌មាន The Cambodia Daily មិនអាចទាក់ទងអ្នកនាំពាក្យរដ្ឋាភិបាលកម្ពុជា លោក ប៉ែន បូណា ដើម្បីសុំការបញ្ជាក់អំពីគម្រោងពិភាក្សាតាមទូរសព្ទរបស់ប្រធានាធិបតីអាមេរិកជាមួយមេដឹកនាំកម្ពុជា បាននៅឡើយទេ រហូតដល់ម៉ោងផ្សាយនេះ៕