អ្នកឃ្លាំមើលជំរុញឱ្យកម្ពុជា ទាញថៃ និងអាស៊ាន ចូលរួមពន្លត់ភ្លើងសង្គ្រាមដែលថៃ បានឈ្លានពានខ្លួនក្រោមផលប្រយោជន៍រួម គឺវិបុលភាពរបស់អាស៊ាន។
ប្រភពដដែល បញ្ជាក់ថា កម្ពុជាមិនត្រូវផ្ដេកផ្ដួលស្រែកយំសុំឱ្យគេអាណិតឡើយ ព្រោះគ្មាននរណាចេញមុខច្បាំងជាមួយកងទ័ពឈ្លានពានថៃ ក្រៅពីកម្ពុជាខ្លួនឯងនោះទេ។
អតីតមេធាវីសាលាក្ដីខ្មែរក្រហម លោក កង ឫទ្ធិគិរី សរសេរលើគណនីហ្វេសប៊ុករបស់ខ្លួននៅថ្ងៃទី២៣ ធ្នូ នេះថា បើកម្ពុជា ទាញថៃ និងអាស៊ានឱ្យចូលរួមពន្លត់ភ្លើងសង្គ្រាមជាមួយខ្លួនក្រោមផលប្រយោជន៍រួម គឺវិបុលភាពអាស៊ាន នោះទាំងថៃ និងអាស៊ាន ប្រាកដជានឹងប្រឹងប្រែងរកវិធីបញ្ចប់សង្គ្រាមនេះជាមួយកម្ពុជាជាមិនខាន ហើយក៏ជាឱកាសសម្រាប់កម្ពុជាការពារផលប្រយោជន៍ជាតិខ្លួនឯងដែរ។
លោក កង ឫទ្ធិគិរី លើកឡើងថា ពិតមែនតែលទ្ធផលកិច្ចប្រជុំរដ្ឋមន្ត្រីការបរទេសអាស៊ានជុំវិញសង្គ្រាមកម្ពុជា-ថៃ កាលពីថ្ងៃចន្ទ មិនអាចបញ្ចប់សង្គ្រាមរវាងប្រទេសទាំងពីរបាន ប៉ុន្តែវាក៏ជាវិធីបន្ធូរភាពតានតឹងដើម្បីវិលទៅរកកិច្ចព្រមព្រៀងសន្តិភាពរវាងកម្ពុជា-ថៃ ដែរ ព្រោះជាលទ្ធផល ក្រុមប្រទេសអាស៊ានកំពុងតែបង្កើតយន្តការដោះស្រាយជុំវិញជម្លោះនេះហើយ។
លោក កង ឫទ្ធិគិរី បញ្ជាក់ថា បើមិនមានកិច្ចប្រជុំពិសេសរដ្ឋមន្ត្រីការបរទេសអាស៊ាននាពេលនេះទេ ក៏មិនមានការសន្យាស្វែងរកដំណោះស្រាយបន្ធូរភាពតានតឹងជម្លោះរវាងកម្ពុជា-ថៃ នៅពេលបន្ទាប់ដែរ។
ការអះអាងនេះ ធ្វើឡើងបន្ទាប់ពីជម្លោះព្រំដែនកម្ពុជា-ថៃ ត្រូវបានដាក់លើតុដោះស្រាយក្នុងកិច្ចប្រជុំរដ្ឋមន្ត្រីការបរទេសអាស៊ាន កាលពីថ្ងៃចន្ទដើមសប្តាហ៍នេះ។
រដ្ឋមន្ត្រីការបរទេស និងសហប្រតិបត្តិការអន្តរជាតិ លោក ប្រាក់ សុខុន បានចូលរួមកិច្ចប្រជុំពិសេសរដ្ឋមន្ត្រីការបរទេសអាស៊ាន ស្ដីពីស្ថានភាពតានតឹងរវាងកម្ពុជា និងថៃ នៅទីក្រុងកូឡាឡាំពួរ ប្រទេសម៉ាឡេស៊ី កាលពីថ្ងៃចន្ទ។
ក្រោយបញ្ចប់កិច្ចប្រជុំនេះ ប្រធានអាស៊ានបានចេញសេចក្តីថ្លែងការណ៍ភ្លាមៗ ដោយសម្រេចបង្កើតឱ្យមានលក្ខខណ្ឌ ១០ចំណុច ក្នុងនោះក៏បានរំឭកឡើងវិញអំពីកិច្ចព្រមព្រៀងបទឈប់បាញ់កាលពីថ្ងៃទី២៨ ខែកក្កដា ការសម្រេចរបស់កិច្ចប្រជុំគណៈកម្មាធិការព្រំដែនទូទៅពិសេស (GBC) ថ្ងៃទី៧ ខែសីហា ព្រមទាំងសេចក្តីថ្លែងការណ៍រួមក្រុងកូឡាឡាំពួរ ផងដែរ ដើម្បីជំរុញឱ្យកម្ពុជា និងថៃ អនុវត្តឱ្យបានពេញលេញ និងមានប្រសិទ្ធភាព។
សេចក្តីថ្លែងការណ៍នេះ បញ្ជាក់ថា រដ្ឋមន្ត្រីការបរទេសអាស៊ាន ឯកភាពឱ្យបើកកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ (GBC) នៅថ្ងៃទី២៤ ខែធ្នូ ក្នុងបំណងពិភាក្សាអំពីការអនុវត្ត និងការផ្ទៀងផ្ទាត់បទឈប់បាញ់ និងដើម្បីស្ដារបទឈប់បាញ់ឡើងវិញ រួមទាំងការបញ្ឈប់សកម្មភាពអរិភាពនានាឱ្យបានឆាប់ផងដែរ។
ជុំវិញបញ្ហានេះ អតីតមន្ត្រីជាន់ខ្ពស់គណបក្សសង្គ្រោះជាតិ លោក ហ៊ីង សុខសាន្ត បានលើកឡើងថា តាមរយៈសេចក្តីថ្លែងការណ៍របស់ប្រធានអាស៊ានស្ដីពីកិច្ចប្រជុំពិសេសរបស់រដ្ឋមន្ត្រីការបរទេសអាស៊ានជុំវិញសង្គ្រាមកម្ពុជា និងថៃ បង្ហាញថាកិច្ចប្រជុំនេះមិនមានលទ្ធផលអ្វីទាំងអស់។
ចំណែកអ្នកជំនាញផ្នែកច្បាប់ លោកមេធាវី សុក សំអឿន បានសរសេរលើគណនីហ្វេសប៊ុករបស់ខ្លួននៅថ្ងៃទី២៣ ធ្នូ នេះថា សង្គ្រាមកម្ពុជា-ថៃ គឺត្រូវខ្លួនទីពឹងខ្លួន ព្រោះអាស៊ានគ្រាន់តែជាសហគមន៍សេដ្ឋកិច្ចមួយប៉ុណ្ណោះ មិនមានយន្តការដោះស្រាយជម្លោះរវាងសមាជិក និងសមាជិកទេ ហើយក៏មិនមានវិធានការប្រើប្រាស់ទ័ពអាស៊ានដើម្បីបញ្ចប់ជម្លោះរវាងសមាជិក និងសមាជិកដែរ។
លោកមេធាវី សុក សំអឿន បញ្ជាក់ថា អាស៊ានបានត្រឹមសម្រុះសម្រួលប៉ុណ្ណោះ តែបើភាគីណាមួយមិនព្រមបញ្ឈប់នោះ អាស៊ានក៏មិនមានវិធានការអ្វីដែរ ដ្បិតអាស៊ានមិនមានឥទ្ធិពលអ្វីលើសមាជិករបស់ខ្លួនឡើយ៕
© 2025, ឌឹ ខេមបូឌា ដេលី. All rights reserved.