ព្រឹទ្ធសភាកម្ពុជា អនុម័តយល់ព្រមដោយឯកច្ឆន្ទទាំងស្រុងលើសេចក្តីព្រាងច្បាប់ស្ដីពីការប្រឆាំងការឆបោកតាមបច្ចេកវិទ្យា (Online Scam) នៅព្រឹកថ្ងៃសុក្រនេះ ក្នុងចំណោម ៥៨សំឡេងនៃសមាជិកព្រឹទ្ធសភាទាំងមូល។
ព្រឹទ្ធសភាកម្ពុជា បានចេញសេចក្តីប្រកាសព័ត៌មាននៅថ្ងៃសុក្រនេះថា ក្នុងកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា មានរបៀបវារៈចំនួនពីរ គឺពិនិត្យឱ្យយោបល់លើសេចក្តីព្រាងច្បាប់ស្ដីពីការប្រឆាំងការឆបោកតាមប្រព័ន្ធបច្ចេកវិទ្យា និងសេចក្តីស្នើច្បាប់ស្ដីពី វិសោធនកម្មច្បាប់ស្ដីពីការបោះឆ្នោតជ្រើសតាំងសមាជិកព្រឹទ្ធសភា។
ព្រឹទ្ធសភាកម្ពុជា បញ្ជាក់ថា អង្គប្រជុំព្រឹទ្ធសភាបានពិនិត្យ និងឱ្យយោបល់ឯកភាពទាំងស្រុងលើសេចក្តីព្រាងច្បាប់ស្ដីពីការប្រឆាំងការឆបោកតាមបច្ចេកវិទ្យា (Online Scam) ដោយឥតកែប្រែចំនួន ៥៨សំឡេងនៃចំនួនសមាជិកព្រឹទ្ធសភាទាំងមូល។
សេចក្តីព្រាងច្បាប់ស្ដីពីការប្រឆាំងការឆបោកតាមបច្ចេកវិទ្យា (Online Scam) រួមបញ្ចូលបទល្មើសព្រហ្មទណ្ឌថ្មីចំនួន ៥ ដែលត្រូវបានបង្កើតឡើងដើម្បីធានាដល់ប្រសិទ្ធភាពក្នុងការអនុវត្ត រួមមាន បទឆបោកតាមប្រព័ន្ធបច្ចេកវិទ្យា និងបទរៀបចំ ឬដឹកនាំមជ្ឈមណ្ឌលឆបោកតាមប្រព័ន្ធបច្ចេកវិទ្យាផងដែរ។
លើសពីនេះ ក៏មានបទល្មើសជ្រើសរើស ឬបណ្ដុះបណ្ដាលអ្នកដទៃឱ្យចូលរួមប្រព្រឹត្តអំពើឆបោកតាមប្រព័ន្ធបច្ចេកវិទ្យា បទប្រមូលក្នុងចេតនាទុច្ចរិតនូវឯកសារសម្គាល់អត្តសញ្ញាណ ឬឯកសារព័ត៌មានផ្ទាល់ខ្លួននានារបស់អ្នកដទៃ និងការបង្កើតទម្រង់ពិសេសនៃបទល្មើសសម្អាតប្រាក់ថែមទៀត។
បទល្មើសទាំងនេះ បានកំណត់ប្រឈមនឹងការជាប់ពន្ធនាគារខ្ពស់បំផុតដល់ ១ជីវិត និងពិន័យជាប្រាក់ដល់ទៅ ១ពាន់លានរៀល (១០០០លានរៀល) ហើយថែមទាំងរឹបអូសទ្រព្យសម្បត្តិរបស់ជនល្មើសផងដែរ។
រដ្ឋមន្ត្រីក្រសួងយុត្តិធម៌ លោក កើត រិទ្ធ បានលើកឡើងក្នុងសន្និសីទសារព័ត៌មានស្ដីពី «ច្បាប់ស្ដីពីការប្រឆាំងការឆបោកតាមប្រព័ន្ធបច្ចេកវិទ្យា» នៅថ្ងៃទី៣ ខែមេសា ឆ្នាំ២០២៦ នេះថា ការប្ដេជ្ញាចិត្តខាងនយោបាយរបស់រាជរដ្ឋាភិបាល មិនដកថយជាដាច់ខាតចំពោះការបោសសម្អាតការឆបោកតាមប្រព័ន្ធបច្ចេកវិទ្យា (Online Scams) នៅកម្ពុជា។
លោក កើត រិទ្ធ បញ្ជាក់ថា សម្រាប់ច្បាប់ស្ដីពីការប្រឆាំងការឆបោកតាមបច្ចេកវិទ្យា (Online Scam) ថ្មីនេះ មិនបានចែងថា «ផ្ទះ ឬអគារ ឬទ្រព្យសម្បត្តិណាដែលជួលឱ្យស្កេមអនឡាញហើយ ត្រូវរឹបអូសជាសម្បត្តិរដ្ឋ» នោះទេ លើកលែងតែផ្តើមគំនិត ឬសមគំនិត ចំណែកអ្នករត់តាក់ស៊ីដែលមិនដឹងខ្លួនថាកំពុងដឹកឧក្រិដ្ឋជនដែលសមត្ថកិច្ចកំពុងតាមចាប់ខ្លួន ក៏មិនមានទោសដែរ។
រដ្ឋមន្ត្រីក្រសួងយុត្តិធម៌រូបនេះ អំពាវនាវកុំឱ្យពលរដ្ឋជួលគណនីធនាគាររបស់ខ្លួនឱ្យអ្នកដទៃប្រើប្រាស់ ព្រោះងាយនឹងចាញ់បោកក្រុមឧក្រិដ្ឋកម្មអនឡាញ ដ្បិតបញ្ហានឹងកើតមាននៅពេលដែលជនខិលខូចបោកប្រាស់គណនីនោះដើម្បីផ្ទេរលុយ។ លើសពីនេះ ក៏មិនត្រូវផ្តល់អត្តសញ្ញាណប័ណ្ណរបស់ខ្លួនឱ្យជនដែលដើរប្រមូលក្នុងបំណងមិនច្បាស់លាស់ដែរ។
ចំណែកប្រធានលេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា លោក ឆៃ ស៊ីណារិទ្ធ បានលើកឡើងក្នុងសន្និសីទសារព័ត៌មាននេះដែរថា គិតត្រឹមខែមេសា នេះ យ៉ាងហោចណាស់មានបទល្មើស Online Scams ចំនួន ២៥០ករណី ស្មើនឹង ២៥០ទីតាំង ត្រូវបានបង្ក្រាប។
លោកបន្តថា ក្នុងនោះ ទីតាំងកាស៊ីណូមានចំនួន ៩២កន្លែង ដែលបានឃុំខ្លួនមនុស្សជាង ៨០០នាក់ និងជិត ៧០០នាក់ទៀតមានដីកាចាប់ខ្លួន ដែលស្ថិតនៅក្នុងបញ្ជីត្រួតពិនិត្យអន្តោប្រវេសន៍។ ដោយឡែកជនសង្ស័យ ៩៣នាក់ផ្សេងទៀត ត្រូវបានបញ្ជូនទៅតុលាការ។
ផ្អែកតាមរបាយការណ៍ប៉ូលិសអន្តរជាតិអាំងទែរប៉ូល (INTERPOL) កាលពីខែមីនា ឆ្នាំ២០២៦ ស្ដីពីការវាយតម្លៃការគំរាមកំហែងនៃការឆបោកហិរញ្ញវត្ថុសកល និងរបាយការណ៍របស់ Global Anti Scam Alliance បានបញ្ជាក់ថា រយៈពេលមួយឆ្នាំក្នុងឆ្នាំ២០២៥ កន្លងទៅ ចំនួនទឹកប្រាក់ដែលបានបាត់បង់ដោយសារប្រព័ន្ធបច្ចេកវិទ្យា និងការបន្លំផ្នែកហិរញ្ញវត្ថុនៅទូទាំងពិភពលោក ត្រូវបានប៉ាន់ស្មានថាមានចំនួនជាង ៤០០ពាន់លានដុល្លារ (៤៤២ពាន់លានដុល្លារអាមេរិក)។
កាលពីថ្ងៃទី៥ ខែកុម្ភៈ ឆ្នាំ២០២៦ ក្រសួងមហាផ្ទៃ បានផ្សព្វផ្សាយចំណាត់ការបង្ក្រាបឧក្រិដ្ឋកម្មតាមអនឡាញ ថា កម្ពុជាប្ដេជ្ញាបោសសម្អាតបទល្មើសអនឡាញឱ្យអស់ត្រឹមខែមេសា ឆ្នាំ២០២៦ នេះ៕
© 2026, ឌឹ ខេមបូឌា ដេលី. All rights reserved.