សមាជិកព្រឹទ្ធសភាពីខាងគណបក្សសម រង្ស៊ីលោកសោ ចាន់ដេតបានប្រាប់សារព័ត៌មានThe Cambodia Dailyនៅថ្ងៃពុធនេះថា ចំណាត់ការរបស់តុលាការខេត្តបាត់ដំបងនៅថ្ងៃនេះមានគោលដៅតែមួយ តែបែងចែកជាពីរករណី។
លោកបន្តថា ដំណើរការប្តឹងអតីតមន្រ្តីគណបក្សសង្គ្រោះជាតិថ្នាក់មូលដ្ឋានខេត្តបាត់ដំបង ត្រូវបានក្រុមលោកហ៊ុន សែនចែកចេញជា«ពីរសំណុំរឿង»ផ្សេងគ្នា ក្នុងគោលបំណងតែមួយគឺការបំភ័យ។ លោកបន្តថា សំណុំរឿងទី១ ជាសំណុំរឿងលេខ ៣៣៨៖ ករណី«ម្រាមដៃស្អាតឆ្នាំ២០១៨»ដើម្បីដាក់បន្ទុកទៅលើលោកជា ជីវ។
ហើយសំណុំរឿងទី២ជាសំណុំរឿងលេខ៣៣៩៖ករណី«ញាំនំបញ្ចុក»ដើម្បីដាក់បន្ទុកទៅលើកញ្ញាស៊ិន ចាន់ពៅរ៉ូហ៊្សេតដែលជាអតីតចៅសង្កាត់អូរចារ ខេត្តបាត់ដំបង។ លោកសោ ចាន់ដេតបន្តថា ករណីទាំងពីរខាងលើនេះ មានគោលដៅតែមួយដូចគ្នាគឺទប់ស្កាត់កម្លាំងរង់ចាំទទួលលោកសម រង្ស៊ីនាពេលខាងមុខ។
អតីតចៅសង្កាត់អូរចារកញ្ញាស៊ិន ចាន់ពៅរ៉ូហ្សិត ដែលនឹងត្រូវចូលខ្លួនបំភ្លឺចំពោះមុខតុលាការខេត្តបាត់ដំបងនៅថ្ងៃស្អែកនោះបានសរសេរនៅលើគណនីហ្វេសប៊ុករបស់កញ្ញាកាលពីថ្ងៃទី៥ខែឧសភាថា កញ្ញានៅតែមិនអស់ចិត្តចំពោះការចេញដីកាកោះហៅឱ្យកញ្ញាចូលខ្លួនឆ្លើយបំភ្លឺនៅថ្ងៃទី៩ខែឧសភានេះ។
កញ្ញាបញ្ជាក់ថា តុលាការកំពូលបានរំលាយបក្សរបស់កញ្ញាហើយហើយបានដកតួនាទីដែលពលរដ្ឋសង្កាត់អូរចារផ្តល់ឲ្យកញ្ញា ព្រមទាំងធ្វើទុក្ខបុកម្នេញ និងគំរាមកំហែងមកលើកញ្ញាស្ទើរគ្រប់បែបយ៉ាង ហើយចុងក្រោយតុលាការក៏ចេញដីកាកោះហៅកញ្ញាឲ្យចូលខ្លួនឆើ្លយបំភ្លឺថែមទៀត។ ប៉ុន្តែកញ្ញាអះអាងថា នឹងចូលខ្លួនឆ្លើយបំភ្លឺតាមការចង់បានរបស់តុលាការ ដោយមិនរួញរាហើយនៅតែតស៊ូបន្តទៀតដើម្បីសង្គម និងប្រទេសជាតិមួយនេះ៕