មន្ត្រីជាន់ខ្ពស់របស់អង្គការឃ្លាំមើលសិទ្ធិមនុស្សអន្តរជាតិ (Human Rights Watch) បានរិះគន់ថា ការប្រើវិធានការសុខភាពសាធារណៈដើម្បីគាបសង្កត់បញ្ឈប់ការតវ៉ារបស់ក្រុមកូដករនៃក្រុមហ៊ុនណាហ្គាវើលដ៍ (NAGA World) បានធ្វើឱ្យពលរដ្ឋបាត់ជំនឿលើរដ្ឋាភិបាលកម្ពុជា ដែលកំពុងប្រយុទ្ធប្រឆាំងនឹងការរីករាលដាលនៃជំងឺ Covid-19 នៅពេលនេះ។
នាយករងអង្គការឃ្លាំមើលសិទ្ធិមនុស្សអន្តរជាតិ (Human Rights Watch) ប្រចាំតំបន់អាស៊ី លោក ហ្វីល រ៉ូបឺតសុន (Phil Robertson) បានលើកឡើងនៅថ្ងៃទី១៥ ខែកុម្ភៈ ថា អាជ្ញាធរកម្ពុជាត្រូវតែបញ្ឈប់នូវការបំពានលើវិធានការសុខភាពសាធារណៈ ដើម្បីគាបសង្កត់សិទ្ធិធ្វើកូដកម្មរបស់កម្មករ និងសិទ្ធិជាមូលដ្ឋានផ្សេងៗទៀតលើក្រុមកូដករនៃក្រុមហ៊ុនណាហ្គាវើលដ៍ជាបន្ទាន់។
លោក ហ្វីល រ៉ូបឺតសុន អះអាងថា សព្វថ្ងៃនេះ អាជ្ញាធរកម្ពុជាកំពុងអនុវត្តការបង្ក្រាបចូលដល់កម្រិតដ៏អាក្រក់ថ្មីបន្ថែមទៀត ដោយការចោទប្រកាន់ពីបទឧក្រិដ្ឋក្រោមលេសអនុវត្តវិធានការសុខភាពសាធារណៈ ដើម្បីបញ្ចប់កូដកម្មរបស់បុគ្គលិកក្រុមហ៊ុនណាហ្គាវើលដ៍។
មន្ត្រីជាន់ខ្ពស់របស់អង្គការឃ្លាំមើលសិទ្ធិមនុស្សអន្តរជាតិរូបនេះរិះគន់ថា ការចាប់ខ្លួនកូដករទៅឃុំក្នុងគុកចង្អៀតដែលជាកន្លែងងាយឆ្លងវីរុស Covid-19 សព្វថ្ងៃនេះ បង្ហាញថាការព្រួយបារម្ភរបស់រដ្ឋាភិបាលកម្ពុជា មិនមែនបញ្ហាសុខភាពសាធារណៈនោះទេ ករណីនេះគឺជាចេតនានយោបាយប៉ុណ្ណោះ។
ការអះអាងនេះ ធ្វើឡើងបន្ទាប់ពីរដ្ឋាភិបាលកម្ពុជាចាប់ផ្តើមអនុវត្តវិធានការសុខាភិបាល និងវិធានការរដ្ឋបាលនានាលើក្រុមកូដករនៃក្រុមហ៊ុនណាហ្គាវើលដ៍ ដើម្បីបញ្ឈប់ការធ្វើកូដកម្មនៅពេលនេះ។
រដ្ឋបាលក្រុងភ្នំពេញ បានចេញសេចក្តីជូនដំណឹងស្ដីពីការមិនអនុញ្ញាតឱ្យក្រុមកូដករក្រុមហ៊ុនណាហ្គាវើលដ៍ ធ្វើកូដកម្មនៅថ្ងៃទី១៥ ខែកុម្ភៈ ឆ្នាំ២០២២ នេះថា ដើម្បីទប់ស្កាត់ការឆ្លងរាលដាលនៃជំងឺ Covid-19 បំប្លែងថ្មី អូមីក្រុង ចូលក្នុងសហគមន៍ រដ្ឋបាលក្រុងភ្នំពេញមិនអនុញ្ញាតឱ្យមានការប្រមូលផ្តុំធ្វើកូដកម្មជាដាច់ខាត។
ប្រភពដដែលបញ្ជាក់ថា ក្នុងករណីក្រុមកូដករទាំងនោះមិនអនុវត្តតាមសេចក្តីជូនដំណឹងនេះ រដ្ឋបាលក្រុងភ្នំពេញនឹងចាត់វិធានការរដ្ឋបាល និងវិធានការច្បាប់ដោយគ្មានករណីលើកលែងនោះឡើយ។
អ្នកនាំពាក្យរបស់សមាគមការពារសិទ្ធិមនុស្សអាដហុក លោក ស៊ឹង សែនករុណា បានប្រាប់សារព័ត៌មាន The Cambodia Daily នៅថ្ងៃទី១៥ កុម្ភៈ នេះថា ប្រសិនបើអាជ្ញាធរអនុវត្តច្បាប់ឱ្យបានត្រឹមត្រូវ គឺជារឿងល្អសម្រាប់កូដករទាំងនោះ ប៉ុន្តែការអនុវត្តរបស់អាជ្ញាធរលើក្រុមកូដករណាហ្គាវើលដ៍កន្លងមក ត្រូវគេមើលឃើញថា គ្រាន់តែជាវិធានការមួយដើម្បីបំបិទសេរីភាពបញ្ចេញមតិប៉ុណ្ណោះ ហើយក៏ប៉ះពាល់ទៅដល់តម្លៃខ្លឹមសាររបស់ច្បាប់យ៉ាងធ្ងន់ធ្ងរផងដែរ។
លោកអះអាងថា ការអនុវត្តច្បាប់ដែលមានការរិះគន់ថា ធ្វើឡើងក្នុងរបៀបវារៈនយោបាយបែបនេះ នឹងធ្វើឱ្យមហាជនកាន់តែបាត់ជំនឿចិត្តលើវិធានការរបស់រដ្ឋាភិបាលកាន់តែខ្លាំង។ ដូច្នេះ ជម្រើសល្អសម្រាប់រដ្ឋាភិបាលកម្ពុជានៅពេលនេះ គឺមានតែដោះលែងសកម្មជនដែលត្រូវបានចាប់ខ្លួន ដើម្បីចូលតុចរចារកដំណោះស្រាយរវាងក្រុមកូដករ និងក្រុមហ៊ុនណាហ្គាវើលដ៍ប៉ុណ្ណោះ មិនគួរប្រើវិធានការជាបន្តបន្ទាប់លើជនរងគ្រោះដូចសព្វថ្ងៃនេះទេ។
ជុំវិញបញ្ហានេះ កាលពីថ្ងៃទី៩ ខែកុម្ភៈ ឆ្នាំ២០២២ កន្លងទៅនេះ សាលាដំបូងក្រុងភ្នំពេញបានចោទប្រកាន់លើក្រុមកូដករ ៣នាក់រហូតឈានដល់ការចាប់ខ្លួន ដូចជាលោក សេង វណ្ណារិទ្ធ ជាដើម ពីបទរារាំងវិធានការការពារជំងឺ Covid-19 ដែលនឹងត្រូវផ្ដន្ទាទោសដាក់ពន្ធនាគាររហូតដល់ទៅ ៥ឆ្នាំ ខណៈកូដករទាំង ៤នាក់ទៀត សមត្ថកិច្ចកំពុងតាមចាប់ខ្លួនតាមការបញ្ជាឱ្យចូលខ្លួនរបស់តុលាការពីបទរារាំងវិធានការសុខាភិបាលផងដែរ៕