សកម្មជនបក្សប្រឆាំងប្រចាំប្រទេសជប៉ុន លោក ហៃ វណ្ណា ប្រកាសចូលរួមរស់ក្នុងជីវភាពនយោបាយជាមួយគណបក្សប្រជាជនកម្ពុជា និងអំពាវនាវឱ្យបញ្ញវន្តខ្មែរគ្រប់រូបនាំគ្នាទៅចុះចូលជាមួយគណបក្សកាន់អំណាច ដោយបញ្ឈប់ការចូលរួមក្នុងចលនាជ្រុលនិយមរបស់ក្រុមប្រឆាំង។
សមាជិកក្រុមប្រឹក្សាភិបាលនៃចលនាខ្មែរដើម្បីប្រជាធិបតេយ្យ លោក ហៃ វណ្ណា ចេញវីដេអូប្រកាសផ្ដាច់ខ្លួនពីលោក សម រង្ស៊ី និងសុំទោសលោក ហ៊ុន សែន រួមទាំងសុំចុះចូលជីវភាពនយោបាយជាមួយគណបក្សប្រជាជនកម្ពុជា ដែលត្រូវបានលោក ហ៊ុន សែន ផ្សព្វផ្សាយលើទំព័រហ្វេសប៊ុករបស់លោកថ្ងៃទី១៨ ខែតុលា ឆ្នាំ២០២៤ នេះ។
ក្នុងវីដេអូប្រវែងជាង ៣នាទី លោក ហៃ វណ្ណា អះអាងថា អំពើជ្រុលនិយមរបស់លោកដែលប្រកាសពីការបះបោរប្រឆាំងនឹងរដ្ឋាភិបាលកម្ពុជាកន្លងមក គឺធ្វើតាមក្រុមប្រឆាំងជ្រុលនិយមប៉ុណ្ណោះ ដូច្នេះចាប់ពីពេលនេះតទៅ លោកនឹងចូលទៅរួមរស់ជាមួយគណបក្សប្រជាជនកម្ពុជាវិញម្តង។
លោក ហៃ វណ្ណា អំពាវនាវឱ្យបញ្ញវន្តខ្មែរគ្រប់រូបបញ្ឈប់ទង្វើជ្រុលនិយម ហើយនាំគ្នាទៅចុះចូលជាមួយគណបក្សប្រជាជនកម្ពុជា ដើម្បីកុំឱ្យមានការបង្កចលាចលណាមួយដូចកាលពីថ្ងៃទី១៨ សីហា កន្លងទៅ និងដើម្បីរួមគ្នាកសាងប្រទេសជាតិឱ្យរួចផុតពីប្រទេសក្រីក្រ និងមានការអភិវឌ្ឍទៅថ្ងៃមុខ។
ជុំវិញការចេញវីដេអូប្រកាសចុះចូលជាមួយបក្សកាន់អំណាចនេះ លោក ហ៊ុន សែន បានសរសេរភ្ជាប់នឹងវីដេអូនេះថា ក្នុងនាមគណបក្សប្រជាជនកម្ពុជា លោកសូមស្វាគមន៍យ៉ាងកក់ក្តៅចំពោះលោក ហៃ វណ្ណា ដែលបានធ្វើការសូមអភ័យទោសចំពោះការខុសឆ្គងរបស់ខ្លួនកាលពីថ្ងៃទី១៨ ខែសីហា ឆ្នាំ២០២៤ និងបានប្រកាសផ្ដាច់ខ្លួនចេញពីក្រុមប្រឆាំងជ្រុលនិយមមកចូលរួមជីវភាពនយោបាយជាមួយគណបក្សប្រជាជនកម្ពុជា ដើម្បីកសាងប្រទេសជាតិវិញ។
លោក ហ៊ុន សែន អំពាវនាវឱ្យសមាជិកបក្សកាន់អំណាចបញ្ឈប់ការខឹងសម្បានឹងលោក ហៃ វណ្ណា ដើម្បីចាប់ដៃគ្នាកសាងអនាគតរបស់កម្ពុជា ហើយលោកសង្ឃឹមថាសមាជិកបក្សប្រឆាំងផ្សេងទៀតនឹងយកគំរូតាមលោក ហៃ វណ្ណា ដោយផ្ដាច់ខ្លួនចេញពីមេក្រុមជ្រុលនិយម ដើម្បីមកចូលរួមកសាងប្រទេសជាតិជាមួយគណបក្សប្រជាជនកម្ពុជាវិញ។
មេដឹកនាំបក្សកាន់អំណាចរូបនេះព្រមានថា សូមកុំធ្វើនយោបាយដង្ហែសពមេក្រុមប្រឆាំងជ្រុលនិយមចូលរណ្តៅធ្វើអ្វី ព្រោះខ្លួនគេមិនអាចជួយខ្លួនឯងបានផង ថែមទាំងរត់ចោលស្រុកថែមទៀត។
លោក ហៃ វណ្ណា ត្រូវមេដឹកនាំបក្សកាន់អំណាច លោក ហ៊ុន សែន កំណត់មុខសញ្ញាថាជាមេដឹកនាំបាតុកម្មប្រឆាំងដ៏ធំក្នុងសំណុំរឿងអភិវឌ្ឍន៍តំបន់ត្រីកោណ (CLV) ដែលញុះញង់ឲ្យប្រជាពលរដ្ឋប្រឆាំងតាមរយៈនៃការធ្វើបាតុកម្មនៅថ្ងៃទី១៨ ខែសីហា ឆ្នាំ២០២៤ កន្លងទៅ។
សារព័ត៌មាន The Cambodia Daily មិនទាន់អាចទាក់ទងលោក ហៃ វណ្ណា សុំការបំភ្លឺបន្ថែមជុំវិញបញ្ហានេះបាននៅឡើយទេរហូតដល់ពេលនេះ៕
© 2024, ឌឹ ខេមបូឌា ដេលី. All rights reserved.