ក្រសួងយុត្តិធម៌ លើកឡើងថា ទណ្ឌិតចំនួន ៣៩០នាក់ដែលឃុំខ្លួននៅក្នុងពន្ធនាគាររាជធានី-ខេត្តចំនួន ២២ នឹងទទួលបានការបន្ធូរបន្ថយ និងលើកលែងទោសក្នុងឱកាសពិធីបុណ្យឯករាជ្យជាតិ និងព្រះរាជពិធីបុណ្យអុំទូកខាងមុខនេះ។
ទំព័រហ្វេសប៊ុកផ្លូវការរបស់ក្រសួងយុត្តិធម៌ នៅថ្ងៃទី៦ វិច្ឆិកា នេះ បានឲ្យដឹងថា លោក កើត រិទ្ធ រដ្ឋមន្ត្រីក្រសួងយុត្តិធម៌ និងជាប្រធានគណៈកម្មការថ្នាក់ជាតិ ពិនិត្យ និងវាយតម្លៃបញ្ជីឈ្មោះទណ្ឌិតដែលស្នើសុំបន្ធូរបន្ថយទោស និងលើកលែងទោស បានប្រជុំពិនិត្យ និងវាយតម្លៃបញ្ជីឈ្មោះទណ្ឌិតចំនួន ៦៧១នាក់ ដែលបានដាក់ស្នើសុំ។
ប្រភពដដែលអះអាងថា ក្នុងចំណោមអ្នកទោសចំនួន ៦៧១នាក់ដែលស្នើសុំបន្ធូរបន្ថយទោស មានទណ្ឌិតចំនួន ៣៦៣នាក់បានស្នើសុំបន្ធូរបន្ថយ និងលើកលែងទោសក្នុងឱកាសពិធីបុណ្យឯករាជ្យជាតិ និងទណ្ឌិតចំនួន ៣០៨នាក់បានស្នើក្នុងឱកាសព្រះរាជពិធីបុណ្យអុំទូក។
ប្រភពដដែលអះអាងថា ឆ្លងតាមការវាយតម្លៃ គណៈកម្មការថ្នាក់ជាតិដែលទទួលបានពីពន្ធនាគាររាជធានី-ខេត្តចំនួន២២ មណ្ឌលអប់រំកែប្រែចំនួន៤ និងមណ្ឌលយុវនីតិសម្បទា បានរកឃើញទណ្ឌិតដែលមានលក្ខណៈសម្បត្តិ និងលក្ខខណ្ឌគ្រប់គ្រាន់អាចទទួលបានការបន្ធូរបន្ថយទោស និងការលើកលែងទោសមានចំនួន ៣៩០នាក់ ក្នុងនោះមានស្រី ៣៥នាក់។
ក្រសួងយុត្តិធម៌ បានអះអាងថា ក្នុងចំណោមទណ្ឌិត ៣៩០នាក់ មានទណ្ឌិតចំនួន ៣០៤នាក់អាចទទួលការបន្ថយទោសរយៈពេល ៣ខែ ទណ្ឌិតចំនួន ៨១នាក់អាចទទួលការបន្ថយទោសរយៈពេល ៦ខែ ទណ្ឌិតចំនួន ៤នាក់អាចទទួលការបន្ថយទោសរយៈពេល ៩ខែ និងទណ្ឌិតម្នាក់អាចទទួលការលើកលែងទោស។
ប្រធានអង្គការប្រជាធិបតេយ្យខ្មែរ លោក ស៊ឹង សែនករុណា បានឲ្យដឹងថា ការសុំលើកលែង និងបន្ធូរបន្ថយទោសកន្លងមក តែងតែមានភាពមិនប្រក្រតីនៃការជ្រើសរើសទណ្ឌិត ដោយសារតែមានការពាក់ព័ន្ធករណីអំពើពុករលួយ និងរឿងនយោបាយ។
លោក ស៊ឹង សែនករុណា អះអាងថា កន្លងមក មន្ត្រីអតីតបក្សប្រឆាំង សកម្មជនព្រៃឈើ សកម្មជនដីធ្លី កម្រនឹងមានឈ្មោះក្នុងបញ្ជីស្នើសុំបន្ធូរបន្ថយ ឬលើកលែងទោសណាស់ បើទោះបីជាពួកគាត់បានអនុវត្តខ្លួនល្អ និងអនុវត្តទោសបានពីរភាគបីក្នុងការជាប់ឃុំក៏ដោយ។
លោកទទូចឲ្យមន្ត្រីមានសមត្ថកិច្ចធ្វើការជ្រើសរើសដោយមានតម្លាភាព ដើម្បីផ្តល់យុត្តិធម៌ដល់ទណ្ឌិតដែលបានខិតខំកែប្រែខ្លួននៅក្នុងពន្ធនាគារ។
កាលពីដើមឆ្នាំ២០១៩ លោក ហ៊ុន សែន បានជំរុញដល់ស្ថាប័នពាក់ព័ន្ធពិនិត្យមើលលទ្ធភាពដោះ បន្ធូរបន្ថយ ឬលើកលែងទោសដល់អ្នកជាប់ឃុំជាស្ត្រី ដើម្បីឱ្យពួកគាត់បានមកជួបក្រុមគ្រួសារ ហើយមានឱកាសប្រកបមុខរបរចិញ្ចឹមគ្រួសារឡើងវិញ ដោយលោកចាត់ទុកថាស្ត្រីជាបង្គោលគ្រួសារដ៏សំខាន់ទៀតផង។
យោងតាមព្រះរាជក្រឹត្យស្ដីពីការបន្ធូរបន្ថយទោស និងលើកលែងទោសដល់ទណ្ឌិត ចុះថ្ងៃទី១២ ខែមករា ឆ្នាំ២០២១ លើកឡើងថា ការលើកលែង និងបន្ធូរបន្ថយទោសដល់ទណ្ឌិតជាប់ពន្ធនាគារ ធ្វើឡើងចំនួន ៥លើកក្នុងមួយឆ្នាំ គឺក្នុងទិវាជ័យជម្នះលើរបបប្រល័យពូជសាសន៍ ពិធីបុណ្យចូលឆ្នាំខ្មែរ បុណ្យវិសាខបូជា បុណ្យឯករាជ្យជាតិ និងព្រះរាជពិធីបុណ្យអុំទូក។
ការបន្ធូរបន្ថយទោស លុះត្រាតែទណ្ឌិតបានអនុវត្តទោស ១ភាគ៣ នៃទោសដាក់ពន្ធនាគារសរុប ដែលតុលាការបានកំណត់ ហើយសម្រាប់ទោសដាក់ពន្ធនាគារមួយជីវិត ទណ្ឌិតត្រូវទទួលរងទោស ១០ឆ្នាំជាមុនសិន៕
© 2024, ឌឹ ខេមបូឌា ដេលី. All rights reserved.